កីឡា

គ្រូចិន សង្កត់ធ្ងន់ថា U-17 កម្ពុជា គឺជាក្រុមមិនអាចមើលស្រាលបាន

បានផុស

២ years មុន

នៅ

ថ្ងៃពុធ ៥ តុលា ២០២២

ដោយ

លោក Yang Chen គ្រូបង្វឹកនៃក្រុមជម្រើសជាតិចិនអាយុក្រោម ១៧ ឆ្នាំ បានបញ្ជាក់ថាជំនួបជាមួយ U-17 កម្ពុជា គឺត្រូវការឈ្នះដាច់ខាត ក្នុងការប្រកួតក្នុងវគ្គជម្រុះពានយុវជនអាស៊ីអាយុក្រោម ១៧ ឆ្នាំ (AFC U-17 Asian Cup) ដែលចាប់ផ្ដើមនៅម៉ោង ១២:០០ ថ្ងៃត្រង់នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងក្នុងកិច្ចសម្ភាសន៍ លោក Yang Chen បាននិយាយថា៖ «អូស្ត្រាលីជាក្រុមដែលមានប្រៀបជាងគេ និងជាម្ចាស់ផ្ទះក្នុងវគ្គចែកពូលផងដែរ។ វាគឺជាគូប្រជែងខ្លាំងបំផុតនៅក្នុងក្រុមនេះ។ យើងមានទំនុកចិត្តក្នុងការតទល់នឹងអូស្ត្រាលី។ ក្រុមកម្ពុជា ជាក្រុមដែលមិនអាចមើលស្រាលបានឡើយ។ យើងមានទំនុកចិត្តក្នុងការឡើងទៅវគ្គបន្ត និងលេងយ៉ាងមានស្ថិរភាព។»

«យើងបានរៀបចំក្រុមយ៉ាងប្រុងប្រយ័ត្ន និងការដាក់ពង្រាយគោលដៅសម្រាប់ការប្រកួតនីមួយៗ ដោយសង្ឃឹមថានឹងបង្ហាញការប្រកួតដ៏អស្ចារ្យដល់អ្នកគាំទ្រ។» លោក Yang Chen បាននិយាយបន្ថែម។

ទាក់ទងនឹងគោលដៅនៃការប្រកួតលើកនេះ លោក Yang Chen បាននិយាយថាក្រុមនឹងខិតខំប្រឹងប្រែងដើម្បីទទួលបានចំណាត់ថ្នាក់លេខ ១ ក្នុងពូល ដើម្បីឈានទៅប្រកួតប្រជែងដ៏សំខាន់។

សូមបញ្ជាក់ថាពីថ្ងៃទី ០៥ ដល់ថ្ងៃទី ០៩ នៅខែតុលា ឆ្នាំ ២០២២ U-17 កម្ពុជា នឹងចូលរួមប្រកួតវគ្គជម្រុះពានយុវជនអាស៊ីអាយុក្រោម ១៧ ឆ្នាំ (AFC U-17 Asian Cup) នៅប្រទេសអូស្ត្រាលី។ កម្ពុជា ស្ថិតនៅពូល G ជាមួយម្ចាស់ផ្ទះទឹកដីកណ្ដាល អូស្ត្រាលី, ចិន និងកោះម៉ារីណាខាងជើង៕

អត្ថបទ៖ មន្នីរ័ត្ន