អ៊ុយក្រែន ​ចូលរួមជាមួយប្រទេស២ទៀត ​ដេញថ្លៃធ្វើម្ចាស់ផ្ទះ​ World Cup

សារព័ត៌មាន The Times បានរាយការណ៍កាលពីថ្ងៃចន្ទថា អ៊ុយក្រែននឹងចូលរួមជាមួយ អេស្ប៉ាញ និងព័រទុយហ្គាល់ក្នុងការដេញថ្លៃដើម្បីធ្វើជាម្ចាស់ផ្ទះការប្រកួតបាល់ទាត់ពិភពលោក ឆ្នាំ២០៣០ (FIFA World Cup 2030)។

សារព័ត៌មានខាងលើបាននិយាយថាអ៊ុយក្រែន នឹងធ្វើជាម្ចាស់ផ្ទះនៃពូលមួយ ក្នុងចំណោមពូលនៅក្នុងព្រឹត្តិការណ៍បាល់ទាត់ដ៏ធំនេះ ក្រោមផែនការដែលត្រូវបានគេយល់ថាយល់ព្រមដោយប្រធានាធិបតីអ៊ុយក្រែន លោក Volodymyr Zelenskiy និងរដ្ឋាភិបាលនៃប្រទេសអេស្ប៉ាញ និងព័រទុយហ្គាល់។

របាយការណ៍បានបន្ថែមថា ការសហការគ្នានេះនឹងត្រូវប្រកាសដោយប្រធានសហព័ន្ធកីឡាបាល់ទាត់អេស្ប៉ាញ និង ព័រទុយហ្គាល់ អំឡុងពេលសន្និសីទសារព័ត៌មាននៅទីស្នាក់ការកណ្តាលរបស់ UEFA នៅថ្ងៃពុធនេះ។

ការប្រកួតបាល់ទាត់ពិភពលោក ឆ្នាំ២០២២ នឹងចាប់ផ្តើមនៅថ្ងៃទី២០ ខែវិច្ឆិកា នៅប្រទេសកាតា ខណៈដែលការប្រកួតនៅឆ្នាំ២០២៦ នឹងត្រូវលេងនៅសហរដ្ឋអាមេរិក កាណាដា និងម៉ិកស៊ិក៕

ប្រភព៖ The Times | Reuters

អត្ថបទ៖ មន្នីរ័ត្ន