កីឡា

ស្អែក ក្រុមបាល់ទះកម្ពុជាប៉ះសិង្ហបុរី លើកទី២ ក្រោយធ្លាប់ឈ្នះ៣-០ ស៊ីហ្គេម២០១៥

បានផុស

២ years មុន

នៅ

ថ្ងៃសុក្រ ១៤ តុលា ២០២២

ដោយ

ក្រុមបាល់ទះជម្រើសជាតិកម្ពុជា នឹងប្រកួតមិត្តភាពអន្តរជាតិកម្តៅសាច់ដុំជាមួយក្រុមបាល់ទះជម្រើសជាតិសិង្ហបុរី វេលាម៉ោង៧យប់ ថ្ងៃសៅរ៍ ទី១៥ ខែតុលានេះ នៅទីលានបាល់ទះវិសាខា។

ក្រុមបាល់ទះជម្រើសជាតិទាំងពីរកម្របានជួបគ្នាណាស់ទាំងការប្រកួតមិត្តភាព និងពានរង្វាន់ផ្លូវការ។ តាមប្រវត្តិប្រហែលជា២០ឆ្នាំចុងក្រោយនេះ ក្រុមទាំងពីរធ្លាប់ជួបគ្នាតែម្តងប៉ុណ្ណោះកាលនោះក្នុងព្រឹត្តិការណ៍កីឡាស៊ីហ្គេម ឆ្នាំ២០១៥ ដែលសិង្ហបុរីធ្វើជាម្ចាស់ផ្ទះ។ ការប្រកួតនោះក្រុមបាល់ទះជម្រើសជាតិកម្ពុជាបានយកឈ្នះម្ចាស់ផ្ទះសិង្ហបុរី ដោយលទ្ធផល ៣-០ វគ្គសន្សំពិន្ទុក្នុងពូល។ សិតទី១ កម្ពុជាឈ្នះ ២៥-១៩, សិតទី២ ឈ្នះ ២៥-២៣, និងសិតទី៣ ឈ្នះ ២៥-១៦។

រូបភាពកម្ពុជា ប្រកួតជាមួយ សិង្ហបុរី ស៊ីហ្គេម ២០១៥

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលណោះក្រុមបាល់ទះកម្ពុជាស្ថិតនៅចំណាត់ថ្នាក់លេខ៥ក្នុងចំណោមប្រទេសចូលរួមចំនួន៨ ខណៈក្រុមសិង្ហបុរីដែលជាម្ចាស់ផ្ទះស្ថិតនៅចំណាត់ថ្នាក់លេខ៨។

បើក្រឡេកមើលប្រវត្តិក្នុងកីឡាស៊ីហ្គេម ក្រុមបាល់ទះសិង្ហបុរីធ្វើបានល្អជាងកម្ពុជាកន្លងមកដោយសារប្រទេសនេះធ្លាប់ឈ្នះមេដាយសំរឹទ្ធ២ដងគឺនៅឆ្នាំ១៩៨៥ និងឆ្នាំ១៩៩៣ ខណៈកម្ពុជា ទើបតែឈ្នះមេដាយសំរឹទ្ធបាន១ដង ពីស៊ីហ្គេមឆ្នាំ២០២១ (លើកឆ្នាំ២០២២) នៅប្រទេសវៀតណាម។

ការជួបគ្នាស្អែកនេះជាជំនួបមិត្តភាពដើម្បីចូលរួមអបអរពិធីបើកការប្រកួតបាល់ទះពានរង្វាន់សម្តេចអគ្គមហាសេនាបតីតេជោ ហ៊ុន សែន ឆ្នាំ២០២២ ដែលជាព្រឹត្តិការណ៍ប្រកួតសម្រាប់កីឡាករបាល់ទះកម្ពុជាពង្រឹងខ្លួន និងត្រៀមខ្លួនសម្រាប់ស៊ីហ្គេម ២០២៣។

បន្ទាប់មក ក្រុមបាល់ទះកម្ពុជានឹងប្រកួតមិត្តភាពអន្តរជាតិជាមួយក្រុមបាល់ទះគុយបានៅថ្ងៃទី២០ ខែតុលានេះ ដែលជាផ្នែកមួយនៃការពង្រឹង និងអភិវឌ្ឍសមត្ថភាពផងដែរមុនពេលចេញដំណើរប្រកួតមិត្តភាពអន្តរជាតិបន្តទៀតក្នុងតំបន់អាស៊ាននាពេលខាងមុខ៕