Mason Greenwood នឹងដោះលែងពីពន្ធនាគារវិញ ក្រោយត្រូវបានអនុញ្ញាតឱ្យនៅក្រៅឃុំជាថ្មី

តារាឆ្នើមរបស់ក្លិប Man Utd កីឡាករ Mason Greenwood នឹងត្រូវដោះលែងពីពន្ធនាគារនៅថ្ងៃស្អែក បន្ទាប់ពីទទួលបានការឱ្យនៅក្រៅឃុំ ខណៈរូបគេនៅតែប្រឈមមុខនឹងការចោទប្រកាន់ពីបទប៉ុនប៉ងរំលោភបំពាន និងការគ្រប់គ្រងអាកប្បកិរិយាបង្ខិតបង្ខំ។

ខ្សែប្រយុទ្ធជម្រើសជាតិអង់គ្លេសវ័យ ២១ឆ្នាំនឹងត្រូវបានអនុញ្ញាតឱ្យត្រឡប់ទៅផ្ទះវិញបន្ទាប់ពីជាប់ពន្ធនាគាររយៈពេល ២យប់ ក្រោយពេលដែលក្រុមមេធាវីរបស់គេ បានដាក់ពាក្យសុំនៅក្រៅឃុំ។

ចៅក្រម John Potter បានផ្តល់ការនៅក្រៅឃុំ Greenwood បន្ទាប់ពីសវនាការខ្លីមួយនៅតុលាការ Minshull Street Crown របស់ទីក្រុង Manchester ។

តារាឆ្នើមរបស់ Man Utd រូបនេះត្រូវបានចោទប្រកាន់ពីបទប៉ុនប៉ងរំលោភ ការគ្រប់គ្រង និងអាកប្បកិរិយាបង្ខិតបង្ខំ និងការរំលោភលើសិស្សជំទង់។ Greenwood មិនមានវត្តមានក្នុងសវនាការសង្ខេបនៅតុលាការព្រឹកនេះទេ។

លក្ខខណ្ឌនៅក្រៅឃុំរបស់ Greenwood មានន័យថាគេត្រូវស្នាក់នៅផ្ទះជួលរបស់ខ្លួននៅ Bowdon, Gtr Manchester ហើយមិនត្រូវបានអនុញ្ញាតឱ្យទាក់ទងអ្នកប្តឹងតវ៉ា ឬសាក្សីឡើយ។ កីឡាករបាល់ទាត់រូបនេះត្រូវបានចោទប្រកាន់ពីបទប៉ុនប៉ងរំលោភនារីម្នាក់ នៅថ្ងៃទី២២ ខែតុលា ឆ្នាំ២០២១។

គេក៏ត្រូវបានចោទប្រកាន់ពីបទចូលរួមក្នុងការគ្រប់គ្រង ឬអាកប្បកិរិយាបង្ខិតបង្ខំ ពោលគឺ “គ្រប់គ្រងគណនីបណ្ដាញទំនាក់ទំនងសង្គមរបស់នាង និងធ្វើឱ្យមានការគំរាមកំហែង និងការបញ្ចេញមតិប្រមាថមកលើនាង ដែលបណ្តាលឱ្យមានផលប៉ះពាល់យ៉ាងធ្ងន់ធ្ងរដល់នាង”៕

ប្រភព៖ dailymail.co.uk

អត្ថបទ៖ មន្នីរ័ត្ន