កីឡា

បាល់ទះពានរង្វាន់សម្ដេចតេជោ ហ៊ុន សែន រកឃើញ ៨ ក្រុមចុងក្រោយហើយ

បានផុស

២ years មុន

នៅ

ថ្ងៃសុក្រ ២១ តុលា ២០២២

ដោយ

ការប្រកួតកីឡាបាល់ទះដណ្ដើមពានរង្វាន់សម្ដេចអគ្គមហាសេនាបតីតេជោ ហ៊ុន សែន ឆ្នាំ ២០២២ បានរកឃើញក្រុមចំនួន ៨ ឡើងវគ្គ ៨ ក្រុមចុងក្រោយហើយ បន្ទាប់ពីប្រកួតយ៉ាងស្វិតស្វាញ អស់ ១ សប្ដាហ៍រួចមក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកួតដែលបានចាប់ផ្ដើមពីថ្ងៃទី ១៥ ខែតុលា ឆ្នាំ ២០២២ នៅពហុកីឡដ្ឋានព្រីនស៍ រាជធានីភ្នំពេញ បែងចែកចេញជា ៤ ពូល ទីបំផុតក្រុមដែលបានឡើងរួមមាន សមាគមបាល់ទះវិសាខា, សមាគមបាល់ទះក្រសួងមហាផ្ទៃ, ក្លិបបាល់ទះកងពលធំអន្តរាគមន៍លេខ ៣, ក្លិបបាល់ទះស្នងការដ្ឋាននគរបាលខេត្តស្វាយរៀង, រដ្ឋបាលខេត្តព្រះសីហនុ, ក្លិបបាល់ទះរដ្ឋបាលរាជធានីភ្នំពេញ, ក្លិបបាល់ទះបញ្ជាការដ្ឋានអង្គរក្ស និងក្លិបបាល់ទះស្នងការដ្ឋាននគរបាលខេត្តត្បូងឃ្មុំ។

ក្រុមទាំង ៨ នឹងបែងចែកចេញជា ២ ពូលផ្សេងទៀត ដើម្បីប្រកួតវិលជុំបន្ត រួមមាន ពូល E វិសាខា, កងពលធំអន្តរាគមន៍លេខ ៣, រដ្ឋបាលខេត្តព្រះសីហនុ និងរដ្ឋបាលរាជធានីភ្នំពេញ។ ដោយឡែកពូល F មាន បញ្ជាការដ្ឋានអង្គរក្ស, ស្នងការដ្ឋាននគរបាលខេត្តស្វាយរៀង, ក្រសួងមហាផ្ទៃ និងស្នងការដ្ឋាននគរបាលខេត្តត្បូងឃ្មុំ។

សម្រាប់ការប្រកួត នឹងធ្វើឡើងនៅថ្ងៃទី ២៤ ដល់ថ្ងៃទី ២៧ ខែតុលា ឆ្នាំ ២០២២ ក្រុមលេខ ១ លេខ ២ ប្រចាំពូល នឹងឡើងទៅវគ្គពាក់កណ្ដាលផ្ដាច់ព្រ័ត្រ រួចបន្តទៅវគ្គផ្ដាច់ព្រ័ត្រ ដែលគ្រោងធ្វើនៅថ្ងៃទី ៣០ ខែតុលា ខាងមុខ។

សូមរំឭកថា ថ្មីៗនេះសហព័ន្ធកីឡាបាល់ទះកម្ពុជា ទើបតែបញ្ចប់ការប្រកួតកីឡាបាល់ទះដណ្ដើមពានរង្វាន់សម្ដេចក្រឡាហោម ស ខេង ដែលពានរង្វាន់ទាំងអស់នេះសុទ្ធតែរួមចំណែកសម្រាប់ការត្រៀមប្រកួតស៊ីហ្គេម ឆ្នាំ ២០២៣ ដែលកម្ពុជា ធ្វើជាម្ចាស់ផ្ទះ៕

អត្ថបទ ៖ មន្នីរ័ត្ន