៤ សំណួរ ជួប​កំពូលអ្នករកគ្រាប់បាល់ក្លិបព្រះខ័នរាជស្វាយរៀងជាមួយ ‘កម្ពុជាថ្មី’

តារាឆ្នើមរបស់ក្លិបព្រះខ័នរាជស្វាយរៀង Marcus Haber កំពុងធ្វើបានយ៉ាងល្អនៅក្របខណ្ឌខេមបូឌានព្រីមៀរលីគ ដោយក្រៅតែពីជួយឱ្យក្លិបឈរកំពូលតារាងនៃលីគហើយនោះក៏រកគ្រាប់បាល់បានច្រើនផងដែរ ដោយឈរនៅកំពូលតារាងដូចគ្នា។

គិតត្រឹមបច្ចុប្បន្ន Marcus Haber រកបាន ២៣គ្រាប់ ឈរលើគេនៃតារាង Top Scorer ក្នុងចំណោមនៃការបង្ហាញខ្លួន ២០ប្រកួត ដែលជាចំណែកជួយឱ្យព្រះខ័នរាជស្វាយរៀង ឈរកំពូលតារាងលីគ ដោយរកបាន ៤៥ពិន្ទុ ដែលជាពិន្ទុមួយអាចមានភាគរយច្រើនក្នុងការគ្រងជើងឯកលីគកំពូលកម្ពុជា ផងដែរ។

កីឡាករសញ្ជាតិកាណាដា រូបនេះក៏បានផ្ដល់កិច្ចសម្ភាសន៍ផ្ដាច់មុខជាមួយ ‘កម្ពុជាថ្មី’ ដូចខាងក្រោម។

កម្ពុជាថ្មី៖ តើលោកយល់ឃើញចំពោះខ្លួនឯង សម្រាប់ការសម្របខ្លួនជាមួយក្រុមនៅរដូវកាលនេះ?

Marcus Haber៖ រហូតមកដល់ពេលនេះ ខ្ញុំរីករាយហើយយល់ច្បាស់អំពីតួនាទីរបស់ខ្ញុំនៅក្នុងក្រុម។ យើងមានវប្បធម៌ដ៏ល្អនៅក្នុងក្រុមរបស់យើង ដែលគ្រប់គ្នាដឹងពីតួនាទីរបស់ពួកគេរៀងៗខ្លួន ហើយកំពុងកសាងឆ្ពោះទៅរកគោលដៅរួមដូចគ្នា។

កម្ពុជាថ្មី៖ សូមលោកនិយាយអំពីការរកគ្រាប់បាល់ជារឿយៗជូនក្រុម?

Marcus Haber៖ ខ្ញុំគ្រាន់តែចង់រក្សាភាពជាប់លាប់ពេញមួយរដូវកាលជាមួយនឹងការបង្ហាញទម្រង់លេងរបស់ខ្ញុំ។ ការស៊ុតបញ្ចូលទីគឺជាផ្នែកមួយដ៏ធំនៃការប្រកួតរបស់ខ្ញុំ ប៉ុន្តែរឿងសំខាន់គឺការរួមចំណែកដល់ក្រុម ជាមួយនឹងលក្ខណៈសម្បត្តិជុំវិញរបស់ខ្ញុំ និងធ្វើឱ្យមិត្តរួមក្រុមរបស់ខ្ញុំនៅជុំវិញខ្ញុំកាន់តែប្រសើរឡើង។

កម្ពុជាថ្មី៖ តើស្បែកជើងមាសពិតជាសំខាន់សម្រាប់លោកដែរឬទេ?

Marcus Haber៖ ស្បែកជើងមាសនឹងក្លាយជាអ្វីដែលខ្ញុំមានមោទកភាពក្នុងការឈ្នះ សម្រាប់លក្ខខណ្ឌផ្ទាល់ខ្លួន។ ប៉ុន្តែវាក៏នឹងជាការឆ្លុះបញ្ចាំងពីក្រុមរបស់ខ្ញុំនៅជុំវិញខ្ញុំ និងការខិតខំប្រឹងប្រែងដែលយើងបានដាក់ចូលទៅក្នុងការកសាងការប្រយុទ្ធដ៏រឹងមាំមួយ។

កម្ពុជាថ្មី៖ តើលោកជឿជាក់ប៉ុណ្ណាថាក្លិបនឹងទទួលបានជោគជ័យលើកពាននៅរដូវកាលនេះ?

Marcus Haber៖ យើងមានផ្នត់គំនិតដូចគ្នាតាំងពីដើមរដូវកាលមក។ ដែលត្រូវបានបញ្ជូលទៅក្នុងវិធីសាស្ត្រនានានៅក្នុងការហ្វឹកហាត់ ហើយត្រូវគ្នានឹងជំនឿ និងបំណងចង់ធ្វើឱ្យប្រសើរឡើង និងខិតខំប្រឹងប្រែង។ យើងបានដាក់កំហិតនឹងតម្លៃស្នូលទាំងនោះគ្រប់រដូវកាល ដូច្នេះចិត្តគំនិតរបស់យើងរឹងមាំ។

ព្រះខ័នរាជស្វាយរៀង នឹងបញ្ចប់ការប្រកួតជុំទី៣ នៅយប់ថ្ងៃទី២២ ខែតុលា ឆ្នាំ២០២២នេះ ដោយត្រូវជួបក្រុមដែលនៅកៀកនឹងការប្រជែងពានគឺក្លិបវិសាខា នាវេលាម៉ោង ៦:៣០នាទីល្ងាច។

ក្រោយចប់សប្ដាហ៍នេះ ក្រុមកំពូលទាំង៤ ព្រះខ័នរាជស្វាយរៀង (៤៥ពិន្ទុ), វិសាខា (៣៩ពិន្ទុ) បឹងកេត (៣៥ពិន្ទុ) និង ភ្នំពេញក្រោន (៣៣ពិន្ទុ) នឹងមានសិទ្ធិបន្តទៅប្រកួតវគ្គ ៤ ក្រុមចុងក្រោយ ដែលនឹងត្រូវប្រកួតចំនួន ៦ ប្រកួតទៀត ដើម្បីសម្រេចជើងឯក ឆ្នាំ២០២២ ដូចដែល Marcus Haber ដាក់ការតាំងចិត្តសម្រាប់ប្រកួតដែលសេសសល់នេះ៕

អត្ថបទ៖ មន្នីរ័ត្ន