លោក Honda នឹងមកកម្ពុជា ជួបអ្នកសារព័ត៌មាន ដើម្បីផ្ញើពាក្យពេចន៍ទៅកាន់អ្នកគាំទ្រ

អ្នកចាត់ការទូទៅក្រុមជម្រើសជាតិកម្ពុជា លោក Keisuke Honda បានប្រកាសថា នឹងជួបអ្នកសារព័ត៌មាន ដោយនឹងមានជាការដេញដោលសួរសំណួរ ដើម្បីផ្ញើពាក្យពេចន៍ទៅកាន់អ្នកគាំទ្រ។

តាមការប្រកាសរបស់អ្នកចាត់ការជនជាតិជប៉ុនរូបនេះបានបញ្ជាក់ថា «ខ្ញុំនឹងមកកម្ពុជា ដើម្បីមានពាក្យបាននិយាយទៅកាន់អ្នកគាំទ្រ និងក្លិបបាល់ទាត់នានា នៅថ្ងៃទី២៦ ខែតុលា។ ជួបគ្នាឆាប់ៗ។»

ក្រោយការប្រកាសនេះរួច ‘កម្ពុជាថ្មី’ បានស៊ើបសួរ និងបានដឹងថា លោកមានគម្រោងជួបជាមួយអ្នកសារព័ត៌មាន ក៏ដូចជាក្លិបនានានៅលីគបាល់ទាត់កម្ពុជា នៅការិយាល័យរបស់ក្រុមហ៊ុនលីគ (CPL) ខណៈពេលវេលាពុំទាន់ត្រូវបានបញ្ជាក់ឱ្យដឹងនៅឡើយ។

ការជួបជាមួយអ្នកសារព័ត៌មានផ្ទាល់បែបនេះ ត្រូវបានគេរំពឹងថា លោកទំនងជាមានពាក្យនិយាយក្នុងចិត្តជាច្រើន ដ្បិតលទ្ធផលរបស់ក្រុមជម្រើសជាតិកម្ពុជា ទាំងឈុតធំ និងឈុតយុវជន ជាពិសេសឈុតដែលត្រូវលេងស៊ីហ្គេម​ ឆ្នាំ២០២៣​ហាក់ធ្វើពុំសូវបានល្អ និងទទួលការរិះគន់ពីអ្នកគាំទ្រ។

នេះអាចជាការចង់បញ្ជាក់ពីផែនការ ក៏ដូចជាគោលដៅថ្មីសម្រាប់បាល់ទាត់កម្ពុជា ដែលនៅចុងឆ្នាំនេះ មានការប្រកួតជើង​ឯកប្រចាំតំបន់អាស៊ីអាគ្នេយ៍ (AFF Mitsubishi Electric Cup 2022) ឬគេនិយមស្គាល់ថា ‘AFF Suzuki Cup’​​​ នៅខែពាក់កណ្ដាលខែធ្នូខាងមុខ និងរឹតតែពិសេសគឺឆ្នាំក្រោយ មានការប្រកួតកីឡាអាស៊ីអាគ្នេយ៍​ លើកទី៣២​ដែលកម្ពុជាធ្វើជាម្ចាស់ផ្ទះ ហើយបានដាក់គោលដៅយូរឆ្នាំមកហើយថាចង់ឈ្នះមេដាយមាស៕

អត្ថបទ៖ មន្នីរ័ត្ន