កីឡា

រកឃើញដៃគូហើយ ខាន់ ចេសា ប៉ះកីឡាការិនីអាស៊ាន ថ្ងៃត្រង់នេះ

បានផុស

២ years មុន

នៅ

ថ្ងៃពុធ ២ វិច្ឆិកា ២០២២

ដោយ

កីឡាការិនីជឺជីតស៊ូជម្រើសជាតិកម្ពុជា ខាន់ ចេសា ត្រូវបានចាប់ឆ្នោតរកឃើញដៃគូហើយសម្រាប់ការប្រកួតវគ្គ១៧រូបដំបូងក្នុងព្រឹត្តិការណ៍ប្រកួតជឺជីតស៊ូជើងឯកពិភពលោកវេលាម៉ោង១២ថ្ងៃត្រង់នេះ នៅទីក្រុងអាប៊ុយដាប៊ី ប្រទេសអារ៉ាប់រួម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការឲ្យដឹងពីលោក Peter Khan ឪពុកបង្កើតរបស់ ខាន់ ចេសា បានប្រាប់ថា កូនស្រីរបស់លោកប៉ះកីឡាការិនីហ្វីលីពីន BALUYOT ASHLEY JERAINE នៅជុំដំបូង។ អ្នកឈ្នះនឹងឡើងទៅវគ្គបន្ត ខណៈអ្នកចាញ់នឹងអស់ឱកាស។ ខាន់ ចេសា មានចំណាត់ថ្នាក់លេខ៣៦ ខណៈកីឡាការិនីហ្វីលីពីនលេខ៣៧។

លោក Peter បាននិយាយថា លោកជឿជាក់លើកូនស្រីរបស់លោកនឹងទទួលបានជ័យជម្នះសម្រាប់ការប្រកួតនេះ។

អ្វីដែលគួរឲ្យកត់សំគាល់នោះ ក្នុងចំណោមបេក្ខនារី១៧រូប មានកីឡាការិនីមកពីតំបន់អាស៊ានតែ២រូបប៉ុណ្ណោះគឺកម្ពុជា និងហ្វីលីពីន ហើយចាប់ឆ្នោតប៉ះគ្នាទៀត។ អ្នកទាំងពីរអាចនឹងក្លាយជាដៃគូសម្រាប់ការប្រកួតស៊ីហ្គេម ឆ្នាំ២០២៣ នៅប្រទេសកម្ពុជា។

សម្រាប់ប្រភេទទម្ងន់ -៥២គីឡូក្រាមនេះមានកីឡាការិនីសរុប១៧នាក់ មកពី១៥ប្រទេសប្រទេសផ្សេងគ្នាចូលរួមប្រកួត។

សហព័ន្ធជឺជីតស៊ូកម្ពុជាបានចាត់ទុកការប្រកួតនេះ គឺជាឱកាសមួយដ៏ល្អ សម្រាប់កីឡាករ កីឡាការិនីជឺជីតស៊ូកម្ពុជា ធ្វើការវាស់ស្ទង់ ក៏ដូចជាពង្រឹងសមត្ថភាព និងបច្ចេកទេស តាមរយៈការប្រកួតប្រជែងជាមួយដៃគូខ្លាំងៗជុំពិភពលោកដែលចូលរួម ក្នុងន័យសម្រួចគុណផលកម្រិតខ្ពស់ ត្រៀមការប្រកួតកីឡាស៊ីហ្គេម ឆ្នាំ២០២៣ នៅកម្ពុជា៕

អត្ថបទ៖ វីរបុត្រ