Ronaldo នឹងចូលនិវត្តន៍ប្រសិនបើព័រទុយហ្គាល់ ឈ្នះ World Cup 2022

តារាឆ្នើមសញ្ជាតិព័រទុយហ្គាល់បាននិយាយថា គេនឹង ‘១០០%’ ព្យួរស្បែកជើង ប្រសិនបើក្រុមជម្រើសជាតិរបស់ខ្លួនប្រកួតឈ្នះជើងឯកបាល់ទាត់ពិភពលោក (FIFA World Cup 2022) នៅប្រទេសកាតា។ Cristiano Ronaldo បានប្រកាសកាលពីថ្ងៃព្រហស្បតិ៍។

កីឡាកររបស់ Man Utd បាននិយាយនៅក្នុងបទសម្ភាសន៍ទូរទស្សន៍ជាមួយអ្នកកាសែត និងជាពិធីករទូរទស្សន៍អង់គ្លេស លោក Piers Morgan ថា “១០០%” គេ​នឹង​ព្យួរស្បែកជើង ប្រសិនបើក្រុមជម្រើសជាតិឈ្នះជើងឯកការប្រកួតនៅប្រទេសកាតា។

យ៉ាងណាមិញ ប្រធានក្រុមព័រទុយហ្គាល់បាននិយាយថា ក្រុមរបស់ខ្លួនមិនមែនជាបេក្ខភាពក្រុមប្រជែងជើងឯកសម្រាប់ការប្រកួតនាពេលខាងមុខនោះទេ ហើយគិតថាប្រទេសបារាំងគឺជាគូប្រជែងដ៏ស្វិតស្វាញបំផុត។

Ronaldo បាននិយាយថាគូប្រជែងរបស់គេគឺ Lionel Messi ដែលជាកីឡាករ “វេទមន្ត” ហើយបានបន្ថែមថា Messi និងវីរបុរសបារាំង Zinedine Zidane ប្រហែលជាកីឡាករល្អបំផុតនៅក្នុងពិភពលោក ដោយមិនរាប់បញ្ចូលខ្លួនឯង។

កីឡាករវ័យ ៣៧ឆ្នាំរូបនេះក៏បាននិយាយថា ខ្លួនបានបដិសេធមិនក្លាយជាកីឡាករដែលមានប្រាក់ខែច្រើនជាងគេបំផុតក្នុងពិភពលោក ដោយបដិសេធសំណើរ ៣៥០លានអឺរ៉ូ (៣៦២ លានដុល្លារ) ពីក្លិបអារ៉ាប៊ីសាអូឌីត។

ម្ចាស់ពាន Ballon d’Or ៥ សម័យកាលរូបនេះ កំពុងស្ថិតក្នុងរដូវកាលទី២ នៅ Manchester United បន្ទាប់ពីលេងឱ្យ Real Madrid និង Juventus ជាច្រើនរដូវកាល។

Ronaldo បានក្លាយជាកីឡាករដំបូងគេក្នុងប្រវត្តិសាស្ត្រដែលរកបាន ៧០០គ្រាប់របស់ក្លិបកាលពីខែមុន នៅពេលដែលបានស៊ុតបញ្ចូលទីទល់នឹង Everton ក្នុងការប្រកួតក្របខ័ណ្ឌ English Premier League៕

ប្រភព៖ aa.com

អត្ថបទ៖ មន្នីរ័ត្ន