ដឹងទេ បាល់សម្រាប់ព្រឹត្តិការណ៍ World Cup នៅកាតា មានទម្ងន់ និងតម្លៃ​ប៉ុន្មាន?

ការប្រកួតបាល់ទាត់ពិភពលោកឆ្នាំ ២០២២ ដែលរៀបចំឡើងនៅប្រទេសកាតាបានចាប់ផ្ដើមហើយកាលពីយប់ថ្ងៃអាទិត្យ ទី២០ ខែវិច្ឆិកា ដោយប្រទេសម្ចាស់ផ្ទះបានប្រកួតចាញ់ក្រុមជម្រើសជាតិអេក្វាឌ័រ ក្នុងលទ្ធផល ២-០ ។

ចំណែកបាល់ដែលក្រុមទាំងពីរទាត់កាលពីយប់មិញ និងសម្រាប់ព្រឹត្តិការណ៍ World Cup ទាំងមូលគឺមានតម្លៃ ១៦៥ ដុល្លារក្នុងមួយបាល់ និងមានទម្ងន់ ៤៥០ ក្រាម ជាបាល់ដែលស្រាល និងមានល្បឿនលឿននៅលើអាកាស ។

បាល់ទាត់សម្រាប់ព្រឹត្តិការណ៍ World Cup ឆ្នាំ ២០២២ នេះមានឈ្មោះអារ៉ាប់ថា Al Rihla មានន័យថា “ការធ្វើដំណើរ” ។ វាសំដៅដល់ការធ្វើដំណើររបស់ប្រទេសកាតា ទម្រាំក្លាយជាប្រទេសអារ៉ាប់ដំបូងគេ ដែលបានធ្វើជាម្ចាស់ផ្ទះសម្រាប់ព្រឹត្តិការណ៍ World Cup ឆ្នាំនេះ ។

បាល់នេះផលិតឡើងដោយក្រុមហ៊ុន Adidas មានស្រទាប់រហូតទៅដល់ ២០ និងមានទង់ជាតិរបស់ប្រទេសកាតានៅលើបាល់នោះផងដែរ ។ វាមានរូបចម្លាក់ចម្រុះពណ៌នៅលើផ្ទៃបាល់ពណ៌ស និងមានរូបសញ្ញា ៣ ជ្រុងដែលរំឭកដល់កប៉ាល់មួយគ្រឿងដែលមានប្រជាប្រិយភាពនៅក្នុងរដ្ឋឈូងសមុទ្រមួយនេះ ។

គួរបញ្ជាក់ថា ការប្រកួតបាល់ទាត់ World Cup ឆ្នាំ ២០២២ ដែលធ្វើឡើងនៅទីក្រុងដូហា ប្រទេសកាតា បានចាប់ផ្ដើមកាលពីថ្ងៃទី២០ ខែវិច្ឆិកា ហើយការប្រកួតវគ្គផ្ដាច់ព្រ័ត្រនឹងប្រព្រឹត្តទៅនៅថ្ងៃទី១៨ ខែធ្នូ ឆ្នាំ ២០២២ ៕

ប្រែសម្រួលដោយ ៖ ជីវ័ន្ត

ប្រភព ៖ Sport Brief

ចុចអាន ៖ ចាញ់អេក្វាឌ័រយប់មិញ ម្ចាស់ផ្ទះកាតា បង្កើតប្រវត្តិសាស្រ្តដ៏អាក្រក់មួយនៅ World Cup