សហព័ន្ធកីឡាសូហ្វតិន្នីសកម្ពុជា រំលឹកពីស្នាដៃរបស់ខ្លួន ក្រោយបញ្ចប់ការប្រកួតកីឡាជាតិលើក ទី៣ ដោយជោគជ័យ

បន្ទាប់ពីធ្វើការប្រកួតប្រជែងដណ្ដើមមេដាយនៃព្រឹត្តិការណ៍កីឡាជាតិលើកទី៣រយៈ៤ថ្ងៃរួចមក សហព័ន្ធកីឡា សូហ្វតិន្នី បានរកឃើញក្លិបសូហ្វតិន្នីសរបស់ក្រសួងមហាផ្ទៃ បានក្លាយជាជើងឯកនៃព្រឹត្តិការណ៍កីឡាជាតិ​លើកទី៣ ឆ្នាំ២០២២ ក្រោយដណ្ដើមបានមេដាយមាសរហូតទៅដល់ ៦គ្រឿង ។

ការប្រកួតនេះបានដំណើរការយៈពេល៤ថ្ងៃមកហើយនៅក្នុងពហុកីឡដ្ឋានជាតិ( អូឡាំពិក) ពោលគឺចាប់ផ្ដើមពីថ្ងៃទី២៣ ដល់ថ្ងៃទី២៧ ខែវិច្ឆិកា ម្សិលមិញនេះទើបបញ្ចប់។ ខណៈដែលថ្នាក់ដឹកនាំនៃសហព័ន្ធបានថ្លែងរំលឹកពីប្រវត្តិជូរចត់តាំងពីកកើតជាសហព័ន្ធ និងដណ្ដើមបានសមត្តិផលជាច្រើនជូនប្រទេសជាតិ។

ឯកឧត្តម សរ សិទ្ធិ អនុរដ្ឋលេខាធិការក្រសួងមហាផ្ទៃ ទទួលជួយការងារដឹកនាំអគ្គលេខាធិការដ្ឋាននៃក្រុមប្រឹក្សាកីឡាក្រសួងមហាផ្ទៃ បានថ្លែងថា «សហព័ន្ធកីឡាសូហ្វតិន្នីសកម្ពុជា បានផ្ដើមចេញពីបាតដៃទទេរ និងកិច្ចខិតខំប្រឹងប្រែងយ៉ាងសកម្មរបស់ថ្នាក់ដឹកនាំ យើងទទួលបាននូវស្នាដៃ និងលទ្ធផលជោគជ័យដ៍ធំៗជាច្រើន សម្រាប់សហព័ន្ធកីឡាសូហ្វតិន្នីសកម្ពុជា។ យើងមានការអភិវឌ្ឍយ៉ាងឆាប់រហ័ស និងមានសក្កានុពលរីកចម្រើនទាំងថ្នាក់ជាតិ និងអន្តរជាតិ។ ជាពិសេសតាមរយៈលទ្ធផលនៃការចេញទៅប្រកួតជាលក្ខណៈអន្តរជាតិកន្លងមក យើងអាចឆ្លុះបញ្ចាំងពីកម្រិតបច្ចេកទេសកីឡាករយើងមានការរីកចម្រើនខ្លាំង អាចប្រកួតប្រជែងជាមួយបណ្ដាលប្រទេសក្នុងតំបន់អាស៊ី និងអ៊ឺរ៉ុបបាន ក្នុងការប្រកួតកីឡាស៊ីហ្គេម នៅប្រទេសហ្វីលីពីន ឆ្នាំ២០១៩។»

លោកបន្តថែមថា «ក្នុងនាមសហព័ន្ធកីឡាសូហ្វតិន្នីសកម្ពុជា សូមប្ដេជ្ញា និងខិតខំប្រឹងប្រែងពង្រឹងនូវវិស័យកីឡាមួយនេះឲ្យមានសន្ទុះកាន់តែខ្លាំងក្លាពោល គឺកសាង និងអភិវឌ្ឍធនធានមនុស្សក្នុងវិស័យកីឡា មន្ត្រីកីឡា គណៈកម្មការបច្ចេក​ទេស អាជ្ញាកណ្ដាល-ចៅក្រមប្រកបដោយចំណេះដឹង បទពិសោធន៍ និងខិតខំបន្តអភិវឌ្ឍសមត្ថភាពកីឡាករ​កីឡាការិនីក្នុងការហ្វឹកហាត់ ដើម្បីត្រៀមលក្ខណៈចូលរួមការប្រកួតទាំងថ្នាក់ជាតិ និងអន្តរជាតិ ជាពិសេស គឺតម្រង់ទិសដៅក្នុងដំណើរឆ្ពោះទៅធ្វើជាម្ចាស់ផ្ទះក្នុងព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣ នាពេលខាងមុខ»។

ជាមួយគ្នានេះដែរសម្រាប់លទ្ធផលវិញ ក្រសួងមហាផ្ទៃឈរនៅលេខរៀងទី១ ដោយឈ្នះមេដាយមាស៦គ្រឿង ​និងសំរិទ្ធ ១គ្រឿង, លេខរៀងទី២ បានទៅខេត្តត្បួងឃ្មុំ ទទួលបានមេដាយមាស ១គ្រឿង និង សំរិទ្ធ ២គ្រឿង, ខេត្តកណ្ដាល​ឈរលេខរៀងទី៣ ទទួលបានមេដាយប្រាក់ ៣គ្រឿង និង សំរិទ្ធ១គ្រឿង, ក្រសួងការពារជាតិ ឈ្នះមេដាយប្រាក់​២​គ្រឿង​ ខេត្តកំពង់ស្ពឺ ទទួលបានមេដាយប្រាក់ ១គ្រឿង និងសំរិទ្ធ២គ្រឿង, ខេត្តព្រៃវែង ទទួលបានមេដាយប្រាក់១​គ្រឿងនិងខេត្តកំពង់ឆ្នាំង ទទួលបានមេដាយសំរិទ្ធ ១គ្រឿង៕

អត្ថបទ៖ មន្នីរ័ត្ន