ភ្លេចឬនៅ? World Cup វគ្គ Semi Final កាលពី៨ឆ្នាំមុន ធ្វើឲ្យប្រេស៊ីល ឈឺចាប់គ្មានថ្ងៃភ្លេច

ការប្រកួតបាល់ទាត់ដណ្តើមពានរង្វាន់ពិភពលោកឆ្នាំ២០២២នៅប្រទេសកាតា បានឈានដល់វគ្គពាក់កណ្តាលផ្តាច់ព្រ័ត្រហើយ។ ថ្ងៃនេះគឺជាជំនួបរវាងអាហ្សង់ទីនជាមួយក្រូអាត ខណៈថ្ងៃស្អែក គឺជាជំនួបរវាងបារាំងជាមួយម៉ារ៉ុក។

ទោះបីជាយ៉ាងណាក៏ដោយ ថ្ងៃនេះ កម្ពុជាថ្មី សូមរម្លឹករឿងដែលធ្វើឲ្យពិភពលោកភ្ញាក់ផ្អើល និងជារឿងដែលធ្វើឲ្យម្ចាស់ផ្ទះប្រេស៊ីល ឈឺចាប់បំផុត គ្មានថ្ងៃភ្លេច។

នៅថ្ងៃទី០៩ខែកក្កដាឆ្នាំ២០១៤ អ្នកគាំទ្របាល់ទាត់បានចូលរួមទស្សនាការប្រកួត World Cup ​វគ្គ Semi Final រវាងម្ចាស់ផ្ទះប្រេស៊ីល ជាមួយអាល្លឺម៉ង់ ក្នុងកីឡដ្ឋាន​ Mineirão ដោយភាពរីករាយ ទឹកមុខញញឹម និងក្តីសង្ឃឹម។

ប៉ុន្តែពេលការប្រកួតចាប់ផ្តើម គ្រប់យ៉ាងហាក់ប្រែក្រឡាស់ និងរឿងមិនគួរឲ្យជឿបានកើតឡើង។ ការប្រកួតមិនបាន៣០នាទីផង អាល្លឺម៉ង់ អាចរកគ្រាប់បាល់បានរហូតដល់ទៅ៥គ្រាប់។

គ្រាប់ដំបូងរបស់អាល្លឺម៉ង់ រកបានដោយកីឡាករ Thomas Müller នៅនាទីទី១១ ខណៈ៤គ្រាប់ទៀតនៃតង់ទី១ រកបានដោយ Miroslav Klose នៅនាទីទី២៣, Toni Kroos នាទី២៤ និង២៦, និងSami Khedira នៅនាទីទី២៩។

ចូលដល់តង់ទី២ អាល្លឺម៉ង់ រកបាន២គ្រាប់ទៀត ដោយកីឡាករ André Schürrle ទាំង២គ្រាប់នៅនាទីទី៦៩និង៧៩។ យ៉ាងណាក្តី ប្រេស៊ីល រកបានមួយគ្រាប់វិញដោយកីឡាករ Oscar នៅនាទី៩០។

នោះជាបរាជ័យវគ្គ Semi Final ដ៏អាក្រក់បំផុតនៅក្នុងប្រវត្តិសាស្រ្តបាល់ទាតពានរង្វាន់ពិភពលោក ខណៈអ្នកគាំទ្រប្រេស៊ីល បាននិយាយនៅពេលនោះថា វាជារឿងឈឺចាប់បំផុតក្នុងពិភពបាល់ទាត់ ដែលគ្មានថ្ងៃអាចបំភ្លេចបាន៕

សូមទស្សនាវីដេអូ៖

អត្ថបទ​៖ Vann Vann

ចុចអាន៖ ក្រុមហ៊ុនអាកាសចរណ៍ម៉ារ៉ុក រៀបចំជើងហោះហើរពិសេស ដឹកហ្វេនៗ ទៅគាំទ្រដល់ កាតា