កីឡា

លោក Scaloni ថា ក្រូអាត មានកីឡាករអាចធ្វើឲ្យ អាហ្សង់ទីន ឈឺចាប់ តែសុំមិននិយាយឈ្មោះ

បានផុស

២ years មុន

នៅ

ថ្ងៃអង្គារ ១៣ ធ្នូ ២០២២

ដោយ

គ្រូបង្វឹកអាហ្សង់ទីន លោក Lionel Scaloni កាលពីថ្ងៃចន្ទ បាននិយាយថា ក្រុមរបស់លោករំពឹងថា នឹងមានការប្រកួតវគ្គពាក់កណ្ដាលផ្ដាច់ព្រ័ត្រ World Cup ដ៏ស្វិតស្វាញជាមួយក្រូអាត បន្ទាប់ពីក្រុមអាមេរិកខាងត្បូងមួយនេះ ហត់នឿយក្នុងការយកឈ្នះលើ ហូឡង់ ក្នុងវគ្គ ៨ ក្រុមចុងក្រោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អាហ្សង់ទីន នឹងទទួល ក្រូអាត នៅកីឡដ្ឋាន Lusail ដែលមានសមត្ថភាពផ្ទុកទស្សនិកជន ៨៩,០០០ នាក់ នៅថ្ងៃអង្គារ វេលាម៉ោង ២ រំលងអធ្រាត្រយប់នេះ ដើម្បីដណ្ដើមកន្លែងនៅក្នុងវគ្គផ្ដាច់ព្រ័ត្រ។

“យើងរំពឹងថា នឹងមានការប្រកួតដ៏ស្វិតស្វាញមួយ ហើយទល់នឹងក្រុមដ៏ល្អមួយ។ ពួកគេជាក្រុមត្រឹមត្រូវ ហើយពួកគេលេងជាក្រុម។ ” Scaloni បានប្រាប់អ្នកសារព័ត៌មានក្នុងសន្និសីទមុនការប្រកួតនៅទីក្រុង Doha។ “ពួកគេនឹងធ្វើឲ្យរឿងលំបាកសម្រាប់យើង”។

“ពួកគេមានទម្រង់លេងជាក់លាក់។ ខ្ញុំមិនគិតថាពួកគេនឹងផ្លាស់ប្ដូរវាទេ។ ពួកគេមានកីឡាករល្អៗណាស់។ ហើយពួកគេមានប្រពៃណីបាល់ទាត់យូរអង្វែង”។ អតីតកីឡាករជម្រើសជាតិអាហ្សង់ទីន បាននិយាយ។

“យើងមានប្រព័ន្ធ និងរបៀបលេងរបស់យើង។ យើងនឹងមិនផ្លាស់ប្ដូររបៀបលេងរបស់យើងទេ។ យើងដឹងថា ពួកគេមានកីឡាករឆ្នើម។ ពួកគេមានកីឡាករដែលអាចធ្វើឲ្យយើងឈឺចាប់។ ខ្ញុំនឹងមិននិយាយឈ្មោះទេ”។ លោក Scaloni បានបន្ថែម។

ក្រុមទាំង ២ បានប៉ះគ្នាចំនួន ៥ លើកន្លងមក ដោយទាំងសងខាងដណ្ដើមបានជ័យជម្នះ ២ លើកដូចគ្នា ហើយការប្រកួតទី ៥ បញ្ចប់ដោយស្មើ។ នោះរាប់បញ្ចូលទាំងការជួបគ្នាពីរលើកនៅ World Cup។ នៅឆ្នាំ ១៩៩៨ អាហ្សង់ទីន បានយកឈ្នះ ក្រូអាត ១-០។ ពីរទសវត្សរ៍ក្រោយមក នៅឆ្នាំ ២០១៨ ក្រូអាត បានសងសឹកដោយយកឈ្នះអាហ្សង់ទីន ៣-០។ ប៉ុន្តែការប្រកួតទាំងពីរនោះស្ថិតក្នុងវគ្គចែកពូល ៖ នៅថ្ងៃអង្គារនេះ វានឹងខ្ពស់ជាងអ្វីដែលភាគីទាំងពីរបានជួបប្រទះពេលប្រឈមមុខដាក់គ្នា។

ក្រូអាត ប្រសិនបើពួកគេឈ្នះ – នោះនឹងក្លាយទៅជាក្រុមឡើងវគ្គផ្ដាច់ព្រ័ត្រ World Cup ២ ឆ្នាំជាប់ៗគ្នាជាលើកដំបូង ចាប់តាំងពីប្រេស៊ីល ធ្វើបានក្នុងឆ្នាំ ២០០២៕

ប្រភព ៖ aljazeera.com

អត្ថបទ ៖ មន្នីរ័ត្ន