កីឡា

កម្ពុជាកំពុងត្រៀមខ្លួនទាំងស៊ីហ្គេម និងអាស៊ានប៉ារ៉ាហ្គេម២០២៣បានល្អដូចគ្នា

បានផុស

២ years មុន

នៅ

ថ្ងៃពុធ ១៤ ធ្នូ ២០២២

ដោយ

កម្ពុជាកំពុងត្រៀមខ្លួនបានល្អដូចគ្នាទាំងការរៀបចំសម្រាប់ការប្រកួតកីឡា ស៊ីហ្គេម លើកទី៣២ និង អាស៊ានប៉ារ៉ាហ្គេម លើកទី១២ ឆ្នាំ២០២៣ ដែលនឹងចូលមកដល់នាពេលប៉ុន្មានខែខាងមុខនេះ។

លោក វ៉ាត់ ចំរើន អគ្គលេខាធិការជាតិរៀបចំកីឡាស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣ (CAMSOC /CAMAPGOC) បានប្រាប់ថា កាលពីថ្ងៃទី១៣ ខែធ្នូ គណៈកម្មការជំនាញពាក់ព័ន្ធបានរៀបចំកិច្ចប្រជុំដើម្បីត្រៀមខ្លួនរៀបចំកិច្ចប្រជុំកីឡាជនពិការអាស៊ានជាមួយសហព័ន្ធកីឡាជនពិការអាស៊ានដែលនឹងធ្វើពីថ្ងៃទី១៥ ដល់ទី១៧ ខែធ្នូ ខាងមុខនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកលើកឡើងថា ៖«ដើម្បីឱ្យកិច្ចប្រជុំនេះ ដំណើរដោយរលូន និងទទួលបានលទ្ធផលល្អ ក្នុងកិច្ចសហប្រតិការឱ្យបានស៊ីជម្រៅ យើងត្រូវធ្វើការរួមគ្នា និងធ្វើឱ្យកិច្ចប្រជុំនេះ មានកិត្តិយស ក្នុងនាមយើងជាម្ចាស់ផ្ទះ។ អ៊ីចឹងយើងបានពិភាក្សាគ្នា និងផ្តល់ជាមតិយោបល់ ក្នុងការរៀបចំឱ្យគណៈកម្មការនីមួយៗទទួលខុសត្រូវ ក្នុងបដិសណ្ឋារកិច្ច ទទួលភ្ញៀវ ការរៀបចំកិច្ចប្រជុំ ការរៀបចំខ្លឹមសារ ការរៀបចំបន្ស៊ីគ្នារវាងគណៈកម្មការជំនាញយើង និងគណៈកម្មការសហព័ន្ធកីឡាជនពិការអាស៊ាន ដោយនេះជាភារកិច្ច និងជាតួនាទីរបស់យើងទាំងអស់គ្នា»។

កិច្ចប្រជុំនេះមានសារសំខាន់ណាស់ ពីព្រោះជាកិច្ចប្រជុំមួយចុងក្រោយ ដែលបានជជែកគ្នាច្បាស់លាស់ និងមានការចុះអនុស្សរណៈនៃការយោគយល់គ្នាដែលបែងចែកការទទួលខុសត្រូវរៀងៗខ្លួន និងឲ្យយល់គ្នារវាងការងាររបស់ APSF និងការងាររបស់ម្ចាស់ផ្ទះកម្ពុជា។ នេះគឺជាទិសដៅតែមួយ ជោគជ័យរួមគ្នាតែមួយ ក្នុងព្រឹត្តិការណ៍អាស៊ានប៉ារ៉ាហ្គេម លើកទី១២ ឆ្នាំ២០២៣ នៅកម្ពុជា។

«យើងឃើញថា សកម្មភាពរបស់ CAMSOC និង CAMAPGOC ដែលជាគណៈកម្មាធិការជាតិទទួលខុសត្រូវរៀបចំការប្រកួតស៊ីហ្គេម និងអាស៊ានប៉ារ៉ាហ្គេមនេះ គឺពីមួយថ្ងៃទៅមួយថ្ងៃ យើងកាន់តែមានការងារមមាញឹក ហើយជាមួយការមមាញឹកនេះ យើននឹងមានកម្មវិធីការងារ កាន់តែច្បាស់លាស់ពីមួយជំហានទៅមួយជំហាន។ អ៊ីចឹងអ្វីដែលយើងធ្វើនេះ គឺយើងធ្វើទន្ទឹមគ្នា។ យើងមិនទុកចោលផ្នែកណាមួយនោះទេ គណៈកម្មការជំនាញទាំងអស់ ត្រូវការរួមគ្នាទាំងស៊ីហ្គេម និងអាស៊ានប៉ារ៉ាហ្គេម ឱ្យបានល្អប្រសើរ»។ លោកបានបញ្ជាក់។

លោកបន្ថែមថា ៖«ជារួម ដំណើរការនៃវឌ្ឍនភាពការងារស៊ីហ្គេមប៉ុណ្ណា គឺវឌ្ឍនភាពការងាររបស់អាស៊ានប៉ារ៉ាហ្គេម ក៏ប៉ុណ្ណឹងដែរ ដូច្នេះយើងអត់មានអ្វីត្រូវបារម្ភទេ គឺយើងធ្វើឱ្យដូចគ្នា តែយើងធ្វើឱ្យពិសេស សម្រាប់បងប្អូនជាកីឡាករ កីឡាការិនីជនពិការប៉ុណ្ណោះ»៕

អត្ថបទ៖ វីរបុត្រ

Related Topics:កីឡាស៊ីហ្គេម ឆ្នាំ២០២៣