កីឡាករបាល់ទាត់អ៊ីរ៉ង់មួយរូប ប្រឈមការប្រហារជីវិត

សហព័ន្ធកីឡាករបាល់ទាត់អាជីពអន្តរជាតិ (FIFPRO) បាននិយាយថា ខ្លួនមានការភ្ញាក់ផ្អើល និងឈឺចាប់យ៉ាងខ្លាំង ចំពោះរបាយការណ៍ដែលថា កីឡាករអាជីព Amir Nasr-Azadani របស់ក្លិប Tractor កំពុងប្រឈមមុខនឹងការប្រហារជីវិត នៅក្នុងប្រទេសអ៊ីរ៉ង់ ហើយបានអំពាវនាវឲ្យដកទណ្ឌកម្មនេះចេញវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មានការតវ៉ាប្រឆាំងរដ្ឋាភិបាលទ្រង់ទ្រាយធំ នៅក្នុងប្រទេសអ៊ីរ៉ង់ ដែលបង្កឡើងដោយការបាត់បង់របស់នាង Mahsa Amini អាយុ២២ឆ្នាំ ដែលបានស្លាប់នៅក្នុងមន្ទីរឃុំឃាំងកាលពីខែកញ្ញា។ នាងត្រូវបានឃុំខ្លួនដោយការចោទប្រកាន់ពីបទមិនគោរពតាមច្បាប់សម្លៀកបំពាក់ឥស្លាមរបស់ប្រទេស។

សារបង្ហោះដោយគណនី Twitter ផ្លូវការរបស់ FIFPRO កាលពីដើមសប្តាហ៍នេះ បាននិយាយថា “FIFPRO មានការភ្ញាក់ផ្អើល និងឈឺចាប់ចំពោះរបាយការណ៍ដែលថា កីឡាករបាល់ទាត់អាជីព Amir Nasr-Azadani ប្រឈមនឹងការប្រហារជីវិតនៅក្នុងប្រទេសអ៊ីរ៉ង់ បន្ទាប់ពីយុទ្ធនាការទាមទារសិទ្ធិនារី និងសេរីភាពជាមូលដ្ឋាននៅក្នុងប្រទេសរបស់គាត់។ យើងឈរដោយសាមគ្គីភាពជាមួយ Amir ហើយអំពាវនាវឲ្យមានការដកទណ្ឌកម្មរបស់គាត់ចេញជាបន្ទាន់”។

គួរបញ្ជាក់ថា សាធារណរដ្ឋឥស្លាម កាលពីថ្ងៃចន្ទ បានព្យួរកបុរសម្នាក់នៅទីសាធារណៈ ដែលប្រព័ន្ធផ្សព្វផ្សាយរដ្ឋនិយាយថា គាត់ត្រូវបានកាត់ទោសពីបទសម្លាប់កងកម្លាំងសន្តិសុខពីរនាក់។

នោះគឺជាការប្រហារជីវិតលើកទីពីរក្នុងរយៈពេលតិចជាងមួយសប្តាហ៍ ពាក់ព័ន្ធនឹងមនុស្សដែលចូលរួមក្នុងបាតុកម្មប្រឆាំងនឹងការគ្រប់គ្រងរបស់ប្រទេសអ៊ីរ៉ង់៕

ប្រែសម្រួល៖ ​Vann Vann

ប្រភព៖ Daily Mail

ចុចអាន៖ Messi បង្កើតកំណត់ត្រាអស្ចារ្យយ៉ាងច្រើន ត្រឹមមួយប្រកួតជាមួយក្រូអាត