ទីបំផុត Messi នាំពាន World Cup ទៅដល់ទឹកដី អាហ្សង់ទីន ហើយ

យន្តហោះដឹកម្ចាស់ជើងឯក World Cup គឺក្រុមជម្រើសជាតិអាហ្សង់ទីន និងប្រធានក្រុម Lionel Messi បានចាកចេញពីប្រទេសកាតា ទៅដល់អាកាសយានដ្ឋានអន្តរជាតិ Ezeiza ក្នុងទីក្រុង ប៊ុយណូស៊ែ ហើយ នៅម៉ោង២:៤០ នាទីព្រឹកថ្ងៃអង្គារទី២០ខែធ្នូ (ពេលវេលានៅអាហ្សង់ទីន)។

បន្ទាប់ពីបានយកឈ្នះបារាំងក្នុងវគ្គផ្តាច់ព្រ័ត្រកាលពីថ្ងៃអាទិត្យទី១៨ខែធ្នូ កីឡាករអាហ្សង់ទីន នឹងត្រូវចំណាយពេលមួយយប់នៅឯកន្លែងហ្វឹកហាត់របស់សមាគមបាល់ទាត់អាហ្សង់ទីន (AFA) ក្បែរអាកាសយានដ្ឋាន ជាកន្លែងអ្នកគាំទ្ររាប់ម៉ឺននាក់ រង់ចាំស្វាគមន៍ពួកគេ។

បន្ទាប់មក ពួកគេនឹងចាប់ផ្តើមដំណើរទៅកាន់កណ្តាលទីក្រុង ប៊ុយណូស៊ែ ចាប់ពីពាក់កណ្តាលអធ្រាត្រថ្ងៃអង្គារទៅ ដោយមនុស្សរាប់លាននាក់នឹងប្រមូលផ្តុំគ្នាអបអរនៅតាមដងផ្លូវ។

Messi ដែលស៊ុតបាល់បញ្ចូលទីពីរគ្រាប់ក្នុងវគ្គផ្តាច់ព្រ័ត្រ គឺជាកីឡាករដំបូងគេដែល ចេញពីយន្តហោះ កាន់ពាន World Cup ខណៈគ្រូបង្វឹកលោក Lionel Scaloni នៅពីក្រោយ។

រូបភាព​របស់ Messi ត្រូវ​បាន​គេ​តុបតែង​លើ​កន្ទុយ​យន្តហោះ​ ជាមួយ​ពាក្យ​ថា “ក្រុម​មួយ ប្រទេស​មួយ ក្តី​សុបិន​មួយ” នៅ​ចំហៀង។

កីឡាករ បានចុះពីយន្តហោះតាមកម្រាលព្រំពណ៌ក្រហម ឆ្ពោះត្រង់ទៅកាន់ឡានក្រុងដែលកំពុងរង់ចាំ ខណៈបទចម្រៀង World Cup របស់ពួកគេ ចំណងជើង “Muchachos” ត្រូវបានបន្លឺឡើង៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ CNA

ចុចអាន៖ ប្រធាន FIFA ចង់ឲ្យ World Cup លេង ៣ឆ្នាំម្តង