បើកឆាកដំបូងនៃពានរង្វាន់ «មិត្តភាពយុវជនអន្តរក្រសួង-ស្ថាប័ន» លើកទី៨ រកឃើញក្រុមទទួលបាន៣ពិន្ទុ

បើកឆាកដំបូងនៃការប្រកួតកីឡាបាល់ទាត់ «មិត្តភាពយុវជនអន្តរក្រសួង-ស្ថាប័ន» លើទី៨ ឆ្នាំ២០២២ បានចាប់ផ្ដើម ដំណើរការប្រកួត កាលពីថ្ងៃទី២៤ ខែធ្នូ  ឆ្នាំ២០២២ហើយ ខណៈក្រុមកីឡាបាល់ទាត់ដែលមកពី ក្រសួងចំនួន៣ រកបាន៣ពិន្ទុ ក្រោយយកឈ្នះដៃគូប្រកួតរបស់ខ្លួន។

 ក្នុងនោះ ក្រុមក្រសួងការងារនិងបណ្តុះបណ្តាលវិជ្ជាជីវៈ យកឈ្នះក្រុម ក្រសួងពាណិជ្ជកម្ម ក្នុងលទ្ធផល ៣ទល់១ ខណៈក្រុមក្រសួងកសិកម្ម រុក្ខាប្រមាញ់ និង នាសាទ ឈ្នះ ក្រសួងរ៉ែ និង ថាមពល ក្នុងលទ្ធផល៤ ទល់១ ។ រីឯក្រុម ក្រសួងបរិស្ថាន យកឈ្នះ ក្រុមក្រសួងទំនាក់ទំនងជាមួយរដ្ឋសភា ព្រឹទ្ធសភា និង អធិការកិច្ច ក្នុងលទ្ធផល៣ទល់០ ។

រំលឹកដែរថា បន្ទាប់ពីខកខានអស់រយ:ពេល២ឆ្នាំ នៅឆ្នាំ២០២០-២១ នៅឆ្នាំ២០២២នេះ សហភាពសហព័ន្ធយុវជន កម្ពុជា​ (ស.ស.យ.ក) បានរៀបចំការប្រកួតពានរង្វាន់កីឡាបាល់ទាត់«មិត្តភាពយុវជនអន្តរក្រសួង-ស្ថាប័ន» លើកទី៨ ឆ្នាំ២០២២ ឡើងវិញក្នុងគោលបំណង ដើម្បីបង្កើនស្មារតីសាមគ្គីភាព មិត្តភាព ពង្រីង និងពង្រឹកកិច្ចសហប្រតិបត្តិការ​រវាងមន្ត្រីរាជការនៅតាមក្រសួង និងស្ថាប័ន ជាពិសេសជំរុញនិងបំផុសស្មារតី ស្រលាញ់ចូលចិត្ត និងលេងកីឡា ដើម្បីសុខភាព។ លើសពីនេះទៅទៀត កម្មវិធីនេះក៏បានបង្ហាញឲ្យឃើញពីចលនាចូលរួមជាមួយកម្មវិធី Beyond The Games ក្នុងឆន្ទៈគាំទ្រនិងអបអរសាទរ ខណៈកម្ពុជានឹងធ្វើជាម្ចាស់ផ្ទះកីឡាស៊ីហ្គេម ឆ្នាំ២០២៣ខាងមុខ ក្រោមទិសស្លោក កីឡាក្នុងសន្តិភាព។

សម្រាប់ការប្រកួតគឺចាប់ពីថ្ងៃទី២៤ ខែធ្នូ ឆ្នាំ២០២២ រហូតដល់ថ្ងៃទី១៩ខែមីនា ឆ្នាំ២០២៣ នៅមជ្ឈមណ្ឌលកីឡា The Blue Sport សែនសុខ ដោយមានក្រុមមកពីបណ្តា ក្រសួង-ស្ថាប័នចូលរួម ចំនួន៣០ កីឡាករសរុប៧៥០ នាក់ ដោយធ្វើការប្រកួតតាមរូបមន្តនៃការប្រកួត ចែកជា៨ពូល (A-H) ដោយក្នុង១ពូលមាន៤ក្រុម ដោយឡែកពូល​ចុងក្រោយគេគឺពូល G & H មានតែ៣ក្រុមប៉ុណ្ណោះ ហើយក្នុង១ពូលគឺយកតែ២ ក្រុមឡើងទៅវគ្គបន្ត។

បញ្ជាក់ដែរថា ពិធីបើកការប្រកួតពានរង្វាន់កីឡាបាល់ទាត់«មិត្តភាពយុវជនអន្តរក្រសួង-ស្ថាប័ន» លើទី៨នេះ មានការអញ្ជើញជាគណៈអធិបតីពីសំណាក់លោក ស សុខា ប្រធានកិត្តិយសនៃគណៈកម្មាធិការ កីឡាបាល់ទាត់អន្តរក្រសួង លោក សុខ សប្បាយណា ប្រធានគណៈកម្មាធិការកីឡាបាល់ទាត់ អន្តរក្រសួង លោក សូវ៉ាត សីលា ប្រធានគណ:កម្មាធិការប្រតិបត្តិ រួមជាមួយតំណាងក្រុមហ៊ុន ដៃគូរសហការឧបត្ថម និងប្រតិភូ កីឡាករតំណាងក្រសួងស្ថាប័នដែលត្រូវចូលរួមប្រកួតក្នុងព្រឹត្តិការណ៍នេះផងដែរ ៕