កីឡា

ប្រាក់រង្វាន់ជិត ៤ ពាន់លានរៀល ប្រគល់ដល់ជយលាភីមេដាយស៊ីហ្គេម

បានផុស

២ years មុន

នៅ

ថ្ងៃអង្គារ ២៧ ធ្នូ ២០២២

ដោយ

សម្ដេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណៈកម្មាធិការជាតិរៀបចំការប្រកួតកីឡាស៊ីហ្គេមលើកទី៣២ ឆ្នាំ២០២៣ បានប្រគល់ប្រាក់រង្វាន់លើកទឹកចិត្តប្រមាណជិត ៤ពាន់លានរៀល(៣,៤៥៨,២០០,០០០រៀល) របស់រដ្ឋាភិបាលដល់ជយលាភីមេដាយ និងគ្រូបង្វឹក គ្រូជំនួយពីការចូលរួមប្រកួតកីឡា ស៊ីហ្គេមលើកទី៣១ ឆ្នាំ២០២២ កាលពីថ្ងៃទី១២-២៣ ខែឧសភា នៅប្រទេសវៀតណាម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រគល់ប្រាក់រង្វាន់លើកទឹកចិត្តស៊ីហ្គេម បានធ្វើឡើងនៅទីស្ដីការក្រសួងការពារជាតិ ដោយក្នុងនោះតាមអនុក្រឹត្យរាជរដ្ឋាភិបាល អ្នកដែលទទួលបានមេដាយមាស១ គ្រឿង (១វិញ្ញាសា) បានប្រាក់រង្វាន់ ៤០លានរៀល, មេដាយប្រាក់ ១គ្រឿងទទួលបាន ៣០លានរៀល និងមេដាយសំរឹទ្ធ ១គ្រឿងទទួលបាន ១៦លានរៀល។

ដោយឡែកគ្រូបង្វឹកទទួលបានប្រាក់រង្វាន់ ១០០% ស្មើកម្រិតមេដាយខ្ពស់ជាងគេ ចំណែកឯគ្រូជំនួយវិញទទួលបាន ៧០%នៃមេដាយដែលអត្តពលិករបស់ខ្លួនដណ្ដើមបាន។

សម្ដេចពិជ័យសេនាបានបញ្ជាក់ថា ក្នុងរយៈពេលប៉ុន្មានឆ្នាំចុងក្រោយនេះ រាជរដ្ឋាភិបាលបានធ្វើការវិនិយោគលើវិស័យកីឡាកាន់តែច្រើនឡើងៗ។

គួរបញ្ជាក់ថា កម្ពុជាដណ្ដើមបានមេដាយពីកីឡាស៊ីហ្គេមលើកទី៣១ ឆ្នាំ២០២២ នៅទីក្រុងហាណូយប្រទេសវៀតណាម លើ ១៥ ប្រភេទកីឡា ក្នុងនោះមេដាយមាស ៩ គ្រឿង ប្រាក់ ១៣គ្រឿង និងសំរឹទ្ធ ៤១ គ្រឿង៕

ដោយ៖ ថារី

Related Topics:សម្ដេចពិជ័យសេនា ទៀ បាញ់