ដឹងការពិតហើយ រឿងថា ក្លិប Al Nassr បញ្ចប់កុងត្រាកីឡាករដែលមិនព្រមឲ្យអាវលេខ ៧ ទៅ Ronaldo 

ថ្មីៗនេះ មានសារព័ត៌មានជាច្រើនបានចុះផ្សាយថា ម្ចាស់អាវលេខ៧នៅក្លិប Al Nassr ត្រូវបានក្លិបបញ្ចប់កុងត្រាដោយសារតែមិនព្រមប្រគល់លេខនេះ ឲ្យទៅកីឡាករ Ronaldo ប៉ុន្តែព័ត៌មាននេះ ត្រូវបាន​ប្រធាន​ក្លិប​លោក Musalli Al Muammar ចេញមុខ​បដិសេធ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កីឡាករ Jaloliddin Masharipov ត្រូវបានក្លិប Al Nassr ទិញចូលក្នុងឆ្នាំ២០២១។ នៅពេលនោះ កីឡាកររូបនេះបានគ្រងអាវលេខ៧ ដោយសារគេរំពឹងថា គាត់នឹងលេងល្អ។ ប៉ុន្តែគ្រប់យ៉ាងមិនដូចការគិតឡើយ។ នោះហើយជាមូលហេតុដែលកីឡាកររូបនេះ ត្រូវបានដាក់លក់កាលពីរដូវក្តៅមុន ហើយមក​ដល់​រដូវ​កាល​នេះ គាត់​មិន​អាច​ពាក់​អាវ​លេខ៧បាន​ទៀត​ទេ ប៉ុន្តែ​ត្រូវ​ពាក់​លេខ៧៧វិញ។

សារព័ត៌មាន Sportshe បានបញ្ជាក់ថា ការផ្លាស់ប្តូរលេខអាវរបស់ Jaloliddin Masharipov គឺដោយសារតែគាត់ហៀបនឹងផ្ទេរទៅក្លិប Al Ahly របស់ប្រទេសអេហ្ស៊ីបទៅហើយ កាលពីរដូវក្តៅមុន ប៉ុន្តែត្រូវបរាជ័យវិញ។

ប្រធាន​ក្លិប Al Nassr អះអាងថា “ដំបូងឡើយ អ្វីៗដំណើរការយ៉ាងល្អ ប៉ុន្តែនៅចុងបញ្ចប់ ស្រាប់តែ Masharipov សុំស្នាក់នៅវិញ។ ប៉ុន្តែ​អាវ​លេខ ៧ របស់​គាត់ ​ត្រូវ​បាន​ទុក​សម្រាប់​កីឡាករ​ម្នាក់​ទៀតរួចទៅហើយ។ Masharipov ប្រើលេខថ្មី គាត់ពេញចិត្តនឹងការពាក់អាវលេខ៧៧”។

ទោះបីជាយ៉ាងណាក៏ដោយ ការពន្យល់របស់លោក Al Muammar នៅតែមិនអាចធានាអនាគតរបស់ Masharipov បានទេ ព្រោះបច្ចុប្បន្ន ខ្សែបម្រើសញ្ជាតិអ៊ូសបេគីស្ថានរូបនេះ កំពុងតែត្រូវក្លិបដាក់លក់។

យោងតាមច្បាប់នៃលីគអារ៉ាប៊ីសាអូឌីត ក្លិបមួយអាចប្រើប្រាស់កីឡាករបរទេសបានអតិបរមា៧នាក់ក្នុងការប្រកួតមួយ ប៉ុន្តែបញ្ជីឈ្មោះកីឡាករបរទេសរបស់ក្លិប Al Nassr បានកើនដល់៩នាក់ទៅហើយ បន្ទាប់ពីទិញ Ronaldo៕

ប្រែសម្រួល៖ Vann Vann

ប្រភព៖ Vietnam Posts

ចុចអាន៖ ដឹងហើយ ថ្ងៃដែល Ronaldo ចូលលេងប្រកួតដំបូងឲ្យក្លិប Al Nassr