កីឡា

ហេតុអ្វី លោក Honda មានមោនទភាពចំពោះក្រុមកម្ពុជា?

បានផុស

២ years មុន

នៅ

ថ្ងៃអង្គារ ៣ មករា ២០២៣

ដោយ

ក្រុមបាល់ទាត់ជម្រើសជាតិកម្ពុជាបានបញ្ចប់ភារកិច្ចក្នុងយុទ្ធនាការ AFF Championship ប្រចាំ២០២២ហើយ បន្ទាប់ពី៤ប្រកួតសម្រាប់វគ្គសន្សំពិន្ទុក្នុងពូលរកបាន៦ពីការប្រកួតឈ្នះ២ និងចាញ់២។

លោក Honda អបអរពេលកម្ពុជាឈ្នះ ព្រុយណេ ៥-១

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការប្រកួតចុងក្រោយរបស់ក្រុមកម្ពុជាបរាជ័យក្រោមថ្វីជើងម្ចាស់ផ្ទះថៃ ១-៣ កាលពីយប់ថ្ងៃចន្ទ ទី២ ខែមករា ឆ្នាំ២០២៣។ លទ្ធផលនេះបានធ្វើឲ្យ លោក Keisuke Honda អ្នកចាត់ការទូទៅជម្រើសជាតិកម្ពុជាសូមទោសអ្នកគាំទ្រ ប៉ុន្តែលោកមានមោទនភាពចំពោះកូនក្រុមរបស់លោក។

លោក Honda បាននិយាយថា ៖«សូមទោសសម្រាប់លទ្ធផល ប៉ុន្តែខ្ញុំមានមោទនភាពចំពោះកីឡាកររបស់យើង ហើយសូមអរគុណសម្រាប់អ្វីៗគ្រប់យ៉ាង»។

ក្នុងយុទ្ធនាការ AFF Cup ឆ្នាំ២០២២ នេះ ក្រុមបាល់ទាត់ជម្រើសជាតិកម្ពុជាទទួលបានការចាប់អារម្មណ៍ខ្លាំងពីអ្នកវិភាគ ក៏ដូចជាថ្នាក់ដឹកនាំរបស់ជម្រើសជាតិនានានៅតំបន់អាស៊ានលើការដឹកនាំរបស់ លោក Keisuke Honda។ ពួកគាត់បានលើកឡើងថា អ្នកចាត់ការទូទៅសញ្ជាតិជប៉ុនមានផែនការច្បាស់លាស់ក្នុងការអភិវឌ្ឍក្រុមជម្រើសជាតិកម្ពុជា និងយករបៀបលេងតាមក្រុមជម្រើសជាតិជាច្រើនដែលបានលេងក្នុងព្រឹត្តិការណ៍ World Cup ឆ្នាំ២០២២ កាលពីពេលថ្មីៗនេះនៅប្រទេសកាតា។

៤ប្រកួតវគ្គសន្សំពិន្ទុក្នុងពូល កម្ពុជាទទួលបានជ័យជម្នះ២ប្រកួតនៅក្នុងដីរបស់ខ្លួន និងចាញ់២ប្រកួតនៅក្រៅដី។ កម្ពុជាបានឈ្នះហ្វីលីពីន ៣-២ និងឈ្នះ ព្រុយណេ ៥-១ ប៉ុន្តែចាញ់ ឥណ្ឌូនេស៊ី ១-២ និងចាញ់ថៃ ៣-១។ លទ្ធផលទាំងនេះ កម្ពុជាបានបង្កើតប្រវត្តិសាស្ត្រផ្ទាល់ខ្លួនជាច្រើនក្នុងពានរង្វាន់លំដាប់ទី១នៅអាស៊ាននេះ ដូចជា រកបាន៦ពិន្ទុជាលើកដំបូង ឈ្នះបាន២ប្រកួតជាលើកដំបូង និងរកបានគ្រាប់បាល់ច្រើនគ្រាប់ជាលើកដំបូង បើគិតចាប់តាំងពីចូលរួមប្រកួតពានរង្វាន់មួយនេះ៨លើកកន្លងមកតាំងពីឆ្នាំ១៩៩៦មក។

ការលេងសហការគ្នាបានល្អ តំបន់ការពាររឹងមាំ ហើយកីឡាករវ័យក្មេងច្រើនមានទេពកោសល្យ ក្រុមកម្ពុជាបានកសាងទម្រង់លេងល្អមួយដែលធ្វើឲ្យមានការចាប់អារម្មណ៍ពីមហាជនទាំងក្នុង និងក្រៅប្រទេស បើទោះបីនៅមិនទាន់អាចប្រៀបធៀបជាមួយប្រទេសខ្លាំងក្នុងតំបន់ជាមួយគ្នាក៏ដោយ។

អ្វីដែលគួរឲ្យចាប់អារម្មណ៍ទៀតនោះ កីឡាករជាច្រើនស្ថិតនៅក្រោមអាយុ២៣ឆ្នាំ ដូច្នេះពួកគេនឹងក្លាយជាក្រុមល្អមួយសម្រាប់ព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះជាលើកដំបូង។ ប្រសិនបើលោកនាំក្រុមកម្ពុជាឈ្នះមេដាយស៊ីហ្គេម នៅទឹកដីកម្ពុជា ទោះមេដាយអ្វីក៏ដោយគឺនឹងចារប្រវត្តិសាស្ត្ររបស់ខ្លួនលើឆាកអន្តរជាតិ។

ប្រការខាងលើនេះហើយដែលធ្វើឲ្យ លោក Keisuke Honda មានមោទនភាពចំពោះកូនក្រុមរបស់លោក ថ្វីបើមិនទាន់ឈានដល់កម្រិតដែលលោកចង់បាន ប៉ុន្តែក៏ស្ថិតនៅលើផ្លូវត្រូវឆ្ពោះទៅបង្កើតជម្រើសជាតិដ៏រឹងមាំមួយក្នុងរយៈពេលពីរបីឆ្នាំខាងមុខ៕

អត្ថបទ៖ វីរបុត្រ