អ្នកគាំទ្របាល់ទាត់ ប្រេស៊ីល នាំគ្នានិយាយពាក្យលា មុខមឈូស Pele ជាលើកចុងក្រោយ

អ្នកគាំទ្របាល់ទាត់ក្នុងប្រទេសប្រេស៊ីលបានប្រមូលផ្តុំគ្នានៅទីក្រុងកំពង់ផែ Santos ដើម្បីនិយាយពាក្យលាទៅកាន់វីរបុរសបាល់ទាត់ Pele ដែលបានទទួលមរណភាពកាលពីថ្ងៃព្រហស្បតិ៍ ក្នុងវ័យ ៨២ ឆ្នាំ ។

មឈូសរបស់ Pele ត្រូវបានដឹកចេញពីមន្ទីរពេទ្យទៅកាន់កីឡដ្ឋាន Vila Belmiro ក្នុងទីក្រុងកាលពីថ្ងៃចន្ទ ហើយបានដាក់តម្កល់នៅកណ្ដាលទីលានតែម្ដង ខណៈ​សមាជិក​គ្រួសារ និង​សាច់​ញាតិ​របស់​គាត់​ឈរ​នៅ​ក្បែរ​នោះ ។

ក្មេងប្រុសអាយុ ១៧ ឆ្នាំម្នាក់បាននិយាយថា រូបគេមកទីនេះ ដើម្បីនិយាយពាក្យលាជាលើកចុងក្រោយទៅកាន់ Pele បន្ទាប់ពីធ្វើដំណើរ ១២ ម៉ោងពីភាគខាងត្បូងរបស់ប្រទេស ។

ចំណេកស្ត្រី​ម្នាក់​បាន​និយាយ​ថា នាង​មាន​ការ​គោរព​យ៉ាង​ខ្លាំង​ចំពោះ Pele ដោយ​អរគុណ​វីរបុរសបាល់ទាត់រូបនេះ​ ដែល​បាន​ជួយឲ្យ​ប្រេស៊ីល មានការទទួលស្គាល់ និងមានវត្តមានលើពិភពលោក​ក្នុងវិស័យកីឡាបាល់ទាត់​ ។

មឈូសរបស់ Pele នឹងតម្កល់ទុកនៅកីឡដ្ឋានរយៈពេល ២៤ ម៉ោង បន្ទាប់មកមឈូសនឹងត្រូវដឹកយកទៅធ្វើបុណ្យដោយសមាជិកគ្រួសារ និងសាច់ញាតិនៅឯផ្ទះរបស់គាត់ ។

គួរបញ្ជាក់ថា Pele ដែល​មាន​ឈ្មោះ​ពិត Edson Arantes do Nascimento បាន​ចំណាយ​ពេល ១៨ ឆ្នាំរស់នៅ​ក្នុង​ទីក្រុង Santos ​ក្នុង​នាម​ជា​កីឡាករ​អាជីព និង​បានជួយឲ្យក្លឹបបាល់ទាត់ Santos FC ឈ្នះជើងឯក Intercontinental Cup ចំនួន ២ លើក ជាពិសេសវីរបុរសបាល់ទាត់រូបនេះ បាននាំប្រេស៊ីលឈ្នះជើងឯក World Cup បីសម័យកាលផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ FIFA ស្នើឲ្យគ្រប់ប្រទេស ដាក់ឈ្មោះកីឡដ្ឋានបាល់ទាត់ថា Pele