សេត រ៉ូស៊ីប ប្រាប់ពីមូលហេតុក្នុងការចូលរួមជាមួយ ព្រះខ័នរាជស្វាយរៀង

ក្លិបបាល់ទាត់ព្រះខ័នរាជស្វាយរៀង ថ្មីៗនេះបានប្រកាសពីការនាំចូលកីឡាករថ្មីចំនួន ២រូប ដើម្បីត្រៀមសម្រាប់រដូវកាលថ្មីនៃលីគកំពូលកម្ពុជា រួមមានកីឡាករ សេត រ៉ូស៊ីប ខ្សែការពារស្លាបឆ្វេងផ្ទេរមកពីក្លិបបឹងកេត និងម្នាក់ទៀតកីឡាករកូនកាត់ខ្មែរ-បារាំង គួច ដានី ដែលផ្ទេរមកពីក្លិបណាហ្គាវើលដ៍។

ភ្ជាប់ទៅនឹងការផ្ទេរមកចូលរួមជាមួយក្លិបមានមូលដ្ឋាននៅខេត្តស្វាយរៀងមួយនេះ សេត រ៉ូស៊ីប ក៏បានប្រាប់ពីមូលហេតុផងដែរ ត្បិតនេះជាការផ្លាស់ក្លិបថ្មីជាលើកទី៣ បន្ទាប់ពីគេធ្លាប់លេងឱ្យណាហ្គាវើលដ៍ និងបឹងកេតចាប់តាំងពីឆ្នាំ២០១៤ មក។

សេត រ៉ូស៊ីប បាននិយាយថា៖ «ខ្ញុំសប្បាយចិត្តមែនទែនដែលបានចូលរួមជាមួយក្លិបព្រះខ័នរាជស្វាយរៀងនៅរដូវកាលនេះ»។

កីឡាករវ័យ ២៥ ឆ្នាំរូបនេះបានប្រាប់មូលហេតុនៃការចូលរួមនេះដូច្នេះថា៖ «ទី១ គឺឃើញរបៀបរៀបចំរបស់ក្លិបគឺបានល្អ ទី២ គឺចិត្តខ្ញុំស្រលាញ់ ព្រោះពីក្មេងក៏ខ្ញុំធ្លាប់បានមកហ្វឹកហាត់នៅក្លិបនេះផងដែរ»។

អតីតសមាជិកនៃក្រុមជម្រើសជាតិកម្ពុជាធ្លាប់បង្ហាញខ្លួន ២៣ប្រកួត និងទាត់ចូល ២គ្រាប់រូបនេះ ក៏បានប្តេជ្ញាចិត្តជួយក្រុមដើម្បីជួយក្រុមប្រជែងជើងឯកនៅរដូវកាល២០២៣-២៤៕

អត្ថបទ៖ មន្នីរ័ត្ន