កីឡា

អ្នកគាំទ្រ Arsenal ក្នុងប្រទេសអ៊ូហ្គង់ដា ត្រូវបានចាប់ខ្លួន បន្ទាប់ពីអបអរជ័យជម្នះលើ Man United

បានផុស

២ years មុន

នៅ

ថ្ងៃពុធ ២៥ មករា ២០២៣

ដោយ

យ៉ាងហោចណាស់មានអ្នកគាំទ្រក្រុមកាំភ្លើងធំ Arsenal ៨ នាក់ ត្រូវបានចាប់ខ្លួននៅទីក្រុង Jinja នៃប្រទេសអ៊ូហ្គង់ដា បន្ទាប់ពីអបអរជ័យជម្នះរបស់ក្លិប លើក្រុម Manchester United ក្នុងក្របខ័ណ្ឌ English Premier League ចុងសប្ដាហ៍ថ្មីៗនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ្នកគាំទ្របានពាក់អាវក្រហមរបស់ក្លឹប ហើយកាន់ពានជានិមិត្តរូប ខណៈប៉ូលិសបាននិយាយថា ពួកគេមិនមានការអនុញ្ញាតឲ្យធ្វើពិធីដង្ហែដែលជាបទល្មើសសណ្ដាប់ធ្នាប់សាធារណៈ។

Arsenal បានស៊ុតបាល់បញ្ចូលទីនៅនាទីចុងក្រោយដើម្បីឈ្នះ ៣-២ ក្នុងការប្រកួតកាលពីថ្ងៃអាទិត្យ ជាមួយនឹងគូប្រជែងដ៏តានតឹងមួយ។

លទ្ធផលនេះបានផ្ដល់ឲ្យក្រុមកាំភ្លើងធំ មាន ៥ ពិន្ទុ នៅលើកំពូលតារាង ដោយផ្ដល់ក្ដីសង្ឃឹមដល់អ្នកគាំទ្រជុំវិញពិភពលោកថា ក្លិបអាចបញ្ចប់ការរង់ចាំរយៈពេល ១៩ ឆ្នាំ របស់ខ្លួន ដើម្បីឈ្នះពានរង្វាន់ក្របខ័ណ្ឌ English Premier League។

អ្នកគាំទ្រក្រុមកាំភ្លើងធំ Arsenal បានធ្វើដំណើរតាមក្បួនរថយន្តចំនួន ៥ គ្រឿង កាលពីព្រឹកថ្ងៃចន្ទ នៅពេលដែលពួកគេត្រូវបានរារាំងដោយប៉ូលិស។ ម្នាក់ក្នុងចំណោមពួកគេកាន់ពានដែលពួកគេបានទិញនៅហាងក្នុងស្រុកមួយ។

អ្នកគាំទ្រក្រុម Arsenal ម្នាក់ឈ្មោះ Baker Kasule ត្រូវបានដកស្រង់សម្ដីដោយគេហទំព័រព័ត៌មាន Daily Monitor ក្នុងស្រុកថា “ខ្ញុំមិនដឹងថាយើងបានធ្វើអ្វីនោះទេ ប៉ុន្តែយើងគ្រាន់តែអបអរជ័យជម្នះរបស់យើងលើគូប្រជែង Manchester United”។

លោក James Mubi ដែលជាមេប៉ូលិសប្រចាំតំបន់ និងជាអ្នកគាំទ្រក្រុម Arsenal ដែលប្រកាសខ្លួនឯង បានប្រាប់ BBC ថា លោកមិនបានពិនិត្យមើលការចោទប្រកាន់របស់អ្នកគាំទ្រទេ ប៉ុន្តែឆ្ងល់ថា ហេតុអ្វីបានជាពួកគេអបអរនៅពេលដែលការប្រកួតត្រឹមតែពាក់កណ្ដាល នៃរដូវកាលនេះ ត្រូវបានលេង។

លោក Mubi បាននិយាយថា “តើនឹងមានអ្វីកើតឡើង ប្រសិនបើជម្លោះជាមួយអ្នកគាំទ្រគូប្រកួតបានផ្ទុះឡើង? ពួកគេមិនបានប្រាប់ប៉ូលិសដើម្បីផ្ដល់សន្តិសុខសម្រាប់ក្បួនដង្ហែរបស់ពួកគេពាក់ក្រហម”។

ក្រុមសិទ្ធិមនុស្សនិយាយថា ច្បាប់គ្រប់គ្រងសណ្ដាប់ធ្នាប់សាធារណៈបានផ្ដល់អំណាចឆន្ទានុសិទ្ធិដល់ប៉ូលិសដែលត្រូវបានប្រើដើម្បីរារាំងសិទ្ធិពលរដ្ឋ។

Arsenal និង Manchester United រីករាយនឹងការគាំទ្រដ៏ធំនៅក្នុងប្រទេសអ៊ូហ្គង់ដា និងនៅទូទាំងទ្វីបអាហ្វ្រិក ហើយនៅពេលដែលពួកគេចាក់បញ្ចាំងក្នុងសាលទស្សនារួម នៅអ៊ូហ្គង់ដា តែងតែមានអ្នកជិះក្បួនដង្ហែ៕

ប្រភព ៖ bbc.com

អត្ថបទ ៖ មន្នីរ័ត្ន