កីឡា

APSF អំពាវនាវឲ្យអាស៊ានពួតដៃគ្នាដើម្បីធានាជោគជ័យអាស៊ានប៉ារ៉ាហ្គេមនៅកម្ពុជា

បានផុស

២ years មុន

នៅ

ថ្ងៃពុធ ១ កុម្ភៈ ២០២៣

ដោយ

សហព័ន្ធកីឡាជនពិការអាស៊ីអាគ្នេយ៍ (APSF) បានអំពាវនាវដល់ប្រទេសជាសមាជិក អត្តពលិក និងប្រតិភូអាស៊ានទាំងអស់ខិតខំប្រឹងប្រែងរួមគ្នាដើម្បីធានាបាននូវជោគជ័យនៃព្រឹត្តិការណ៍កីឡាអាស៊ានប៉ារ៉ាហ្គេម លើកទី១២ នាខែមិថុនា ឆ្នាំ២០២៣ នៅរាជធានីភ្នំពេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពិធីរាប់ថយក្រោយ១០០ថ្ងៃនៃដំណើរឆ្ពោះទៅស៊ីហ្គេម លើកទី៣២ ត្រូវបានប្រារព្ធកាលពីថ្ងៃទី២៥ ខែមករា នៅពហុកីឡដ្ឋានជាតិមរតកតេជោ ខណៈពិធីរាប់ថយក្រោយ១០០ថ្ងៃនៃដំណើរឆ្ពោះទៅកីឡាអាស៊ានប៉ារ៉ាហ្គេម លើកទី១២ គ្រោងនឹងថ្ងៃទី២៣ ខែកុម្ភៈនេះ។

ក្នុងការចូលរួមអបអរសាទរពិធីរាប់ថយក្រោយ១០០ថ្ងៃ លោក Osoth Bhavilai ប្រធាន APSF បានសម្តែងការអរគុណដល់កម្ពុជាដែលបានប្តេជ្ញាចិត្ត និងប្រឹងប្រែងដើម្បីរៀបចំព្រឹត្តិការណ៍ពហុកីឡាទាំងពីរ។

លោកមានប្រសាសន៍ថា ៖«ក្នុងនាមប្រធានក្រុមប្រឹក្សាភិបាល (BOG) និងគណៈកម្មាធិការប្រតិបត្តិ (EXCO), ខ្ញុំសូមអបរដល់រាជរដ្ឋាភិបាលកម្ពុជា និងគណៈកម្មាធិការរៀបចំការប្រកួតក្នុងស្រុកសម្រាប់ការប្រឹងប្រែងដើម្បីធានាបាននូវកីឡាអាស៊ានប៉ារ៉ាហ្គេម នាខែមិថុនា ខាងមុខក្លាយជាព្រឹត្តិការណ៍ដ៏អស្ចារ្យ សុវត្ថិភាព និងផាសុកភាពសម្រាប់អ្នកចូលរួមទាំងអស់គ្នាដែលជាចំណុចអាទិភាព»។

«APSF ដូចមុនៗដែរ នឹងបន្តសហការ និងជួយដល់ប្រទេសម្ចាស់ផ្ទះឲ្យអស់ពីលទ្ធភាពដើម្បីធានាបាននូវការរៀបចំហ្គេមប្រកបដោយយុត្តិធម៌ និងស្មារតីកីឡា សំខាន់បំផុតគឺលើកកម្ពស់ស្មារតីសាមគ្គីភាព និងសមភាពសម្រាប់អត្តពលិករបស់យើង»។

ជាមួយគ្នានេះ លោកស្រី Wandee Tosuwan អគ្គលេខាធិការ APSF បានលើកឡើងថា រហូតដល់ពេលនេះ APSF មានកិច្ចប្រជុំផ្ទាល់មុខគ្នា២លើក និងកិច្ចប្រជុំតាមអនឡាញជាច្រើនទៀតជាមួយ CAMAPGOC ដោយទទួលបានលទ្ធផលវិជ្ជមានពាក់ព័ន្ធនឹងគណៈកម្មការជាច្រើន ដូចជា គណៈកម្មការកីឡា បច្ចេកទេស វេជ្ជសាស្ត្រ ការប្រឆាំងសារធាតុហាមឃាត ការដឹកជញ្ជូន ស្នាក់នៅ និងម្ហូបអាហារ។

«យើងត្រូវការសាងទំនុកចិត្ត បន្ទាប់ពីរៀបចំកីឡាអាស៊ានប៉ារ៉ាហ្គេម លើកទី១១ នៅសូឡូ កាលពីឆ្នាំមុនបានជោគជ័យ ទោះជាប្រឈមនឹងកូវីដ-១៩។ CAMAPGOC និង APSF ត្រូវធ្វើការជិតស្និទ្ធគ្នា នៅពេលយើងកំពុងសម្លឹងឆ្ពោះទៅរកហ្គេមដ៏អស្ចារ្យដើម្បីបន្សល់ទុកមរតកនៅកម្ពុជា ក៏ដូចជាអាស៊ានទាំងមូល»៕