Ramazanov ឡើង​ការពារ​ខ្សែក្រវាត់​ទល់ Capitan ខណៈ Aoki ប៉ះ Nakashima នៅ ONE: UNBREAKABLE

ONE Championship នឹង​ចាប់ផ្តើម​ឆ្នាំ​២០២១​ជាមួយនឹង​ព្រឹត្តិការណ៍​ផ្សាយ​ផ្ទាល់ ONE: UNBREAKABLE ចេញពី​កីឡដ្ឋាន Singapore Indoor Stadium ថ្ងៃ​សុក្រ ទី​២២ ខែមករា នេះ​។​

​បន្ទាប់ពី​ទន្ទឹងរង់ចាំ​ជាច្រើន​សប្តាហ៍​កន្លងទៅ ម្ចាស់​ខ្សែក្រវាត់​ឃី​ក​បុក​សី​ង​ពិភពលោក ONE Bantamweight Kickboxing World Champion គឺ​កីឡាករ Alaverdi “Babyface Killer” Ramazanov ត្រូវ​ឡើង​ការពារ​ខ្សែក្រវាត់​របស់ខ្លួន​ក្នុង​តំណែង​គូ​ឯក​។​

​ជើង​ខ្លាំង Ramazanov បាន​បាន​យកឈ្នះ​កីឡាករ​ចិន “Zhang Chenglong ដើម្បី​ក្លាយជា​ម្ចាស់​ខ្សែក្រវាត់​ពិភពលោក​កាលពី​ខែធ្នូ ឆ្នាំ​២០១៩​។ រហូតដល់​សព្វថ្ងៃនេះ រូបគេ​ជា​កីឡាករ​លេចធ្លោ​ម្នាក់ និង​ឆ្នើម​ប្រចាំ​កម្មវិធី ONE Super Series​។​

​កីឡាករ​រុស្ស៊ី​ម្នាក់នេះ​មាន​អាវុធ​វ៉ៃ​ចេញ​ល្អ ល្បឿន​រហ័ស​លឿន និង​កម្លាំង​ផ្តួល​ដៃគូ​ឲ្យ​សន្លប់​ដ៏​អស្ចារ្យ​ដែល​ស័ក្តិ​សមជា​កីឡាករ​ឆ្នើម​លំដាប់​ពិភពលោក​។ រហូតដល់​ពេលនេះ ជើងឯក​ឃី​ក​បុក​សី​ង​រូបនេះ​មានបទពិសោធន៍​នៅលើ​សង្វៀន​ឈ្នះ​៦១​ដង និង​ចាញ់​តែ​៥​ដង​ប៉ុណ្ណោះ​។​

​

នៅក្នុង​ប្រទេស​សិង្ហ​បុរី​ខាងមុខនេះ ជើង​ខ្លាំង Ramazanov នឹង​ការពារ​ខ្សែក្រវាត់​របស់ខ្លួន​ទល់នឹង​ជើង​ខ្លាំង​ដែលមាន​បទពិសោធ​ជោកជាំ និង​កណ្តាប់ដៃ​មហា​ទម្ងន់ Capitan Petchyindee Academy​។​

Capitan ជា​ជើងឯក​មួយ​ថៃ​ពិភពលោក​ជាច្រើន​សម័យកាល និង​មាន​បទពិសោធ​នៅលើ​សង្វៀន​ឈ្នះ​១៤២​ដង និង​ចាញ់​៤០​ដង និង​ជា​កីឡាករ​ម្នាក់​ដែលមាន​កណ្តាប់ដៃ​គ្រោះថ្នាក់​ខ្លាំង​។​

​កាលពី​ខែកញ្ញា ឆ្នាំមុន ជើង​ខ្លាំង​ថៃ​រូបនេះ​បាន​យកឈ្នះ​តារា​ប្រដាល់​ឃី​ក​បុក​សី​ង Petchtanong Petchfergus ដោយ​ប្រើពេល​ត្រឹមតែ​៦​វិនាទី​ប៉ុណ្ណោះ​គឺ​បាន​ក្លាយជា​ជ័យជម្នះ​លឿន​បំផុត​ក្នុង​ប្រវត្តិ ONE Super Series​។

​ជ័យជម្នះ​នោះបាន​រុញច្រាន​ឲ្យ Capitan ឡើងទៅ​ឈរ​នៅ​ចំណាត់ថ្នាក់​លេខ​២​នៃ​តារាង​ចំណាត់ថ្នាក់​អត្ត​ព​លិ​ក និង​មានឈ្មោះ​ប្រកួត​ដណ្តើម​ខ្សែក្រវាត់​ពិភពលោក​ជាមួយ Ramazanov​។​

​ជាមួយគ្នានេះ អតីត​ជើងឯក​ពិភពលោក ONE Lightweight World Champion តារា​ឆ្នើម​ជប៉ុន Shinya Aoki ក៏​វិលត្រឡប់​មកកាន់​សង្វៀន​វិញ​ដែរ​នៅ​ព្រឹត្តិការណ៍​ប្រកួត ONE: UNBREAKABLE ក្នុង​តំណែង​គូ​ឯក​រង​។

ចាប់តាំងពី​បាត់បង់​ខ្សែក្រវាត់​ពិភពលោក​ដោយសារ​ជើង​ខ្លាំង​វ័យក្មេង Christian Lee កាលពី​ខែឧសភា ឆ្នាំ​២០១៩​មក តារា​គុន​ចម្រុះ​ជប៉ុន​នេះ​ទទួលបាន​ជោគជ័យ​២​លើក​ជាប់​គ្នា​។​

Aoki បាន​បញ្ឈប់ Honorio “The Rock” Banario ដោយ​ប្រើពេល​ត្រឹមតែ​៥៤​វិនាទី​ប៉ុណ្ណោះ​កាលពី​ខែតុលា ឆ្នាំ​២០១៩ និង​បន្ទាប់មក​បាន​យកឈ្នះ​ពិន្ទុ​កីឡាករ Kimihiro Eto កាលពី​ខែកញ្ញា ឆ្នាំ​២០២០។

ឥឡូវនេះ អ្នកលេង​គុន​ចម្រុះ​ចំណាត់ថ្នាក់​លេខ​៤​នៃ​ទម្ងន់ របស់​ជប៉ុន​នេះ​កំពុង​សម្លឹង​ឆ្ពោះទៅរក​ជ័យជម្នះ​លើក​ទី​៤៦​ក្នុង​អាជីព​និង​សន្សំ​កេរ្តិ៍ឈ្មោះ​ទៅ​ប្រកួត​សាជាថ្មី​ជាមួយ Lee ដើម្បី​យក​ខ្សែក្រវាត់​មកវិញ​។ ប៉ុន្តែ​នៅពេលនេះ គាត់​ស្វែងរក​ជ័យជម្នះ​ជាមុនសិន​។

ចំណែក James Nakashima បាន​កំពុង​បង្ហាញខ្លួន​ជា​អ្នកលេង​ដ៏​គ្រោះថ្នាក់​នៅក្នុង​ប្រភេទ​ទម្ងន់​នេះ​។ កីឡាករ​អាមេរិក​នេះ​មាន​ជំនាញ​កីឡា​ចំបាប់​កម្រិត​ខ្ពស់ និង​ហ្វឹកហាត់​នៅ​ក្លឹប Team Petrosyan ដែលមាន​ប្រវត្តិ​ប្រកួត​ឈ្នះ​១២​ដង ដោយ​មិនដែល​ធ្លាប់​ចាញ់​សោះ​។ រូបគេ​ក៏​ទទួលបាន​ឱកាស​ទៅ​ប្រកួត​ដណ្តើម​ខ្សែក្រវាត់​ពិភពលោក ONE Welterweight World Championship ជាមួយ Kiamrian “Brazen” Abbaso កាលពី​ខែវិច្ឆិកា ប៉ុន្តែ រង​បរាជ័យ​នៅ​ទឹក​ទី​៤ និង​ជាការ​ចាញ់​លើកដំបូង​។

​ក្រោយ​ការប្រកួត​នោះ កីឡាករ​ក្លឹប MMA Lab បានសម្រេច​ចិត្ត​ទម្លាក់​ទម្ងន់ និង​ចាប់ផ្តើម​ស្វះ​ស្វែងរក​ការប្រកួត​ដណ្តើម​ខ្សែក្រវាត់​ពិភពលោក ONE Lightweight World Title វិញ​ម្តង​។​

​ក្នុង​ព្រឹត្តិការណ៍​នេះ អ្នកគាំទ្រ​ពិសេស​២៥០​នាក់ ត្រូវបាន​អនុញ្ញាត​ឲ្យ​ចូល​ទស្សនា​ផ្ទាល់​នៅ​កីឡដ្ឋាន Singapore Indoor Stadium​។ កញ្ចប់​សំបុត្រ​ពិសេស​នេះ​គឺមាន​តម្លៃ​ម្នាក់​១៤៨​ដុល្លារ​សិង្ហ​បុរី ដែលមាន​រៀបចំ​លក្ខណៈពិសេស​សម្រាប់​ប្រកបដោយ​សុវត្ថិភាព​។ សម្រាប់​សំបុត្រ​អ្នកគាំទ្រ​ពិសេស “Superfan” លោកអ្នក​អាច​ចូល​ទិញ​បាន​តាម​៖ ticketmaster.sg ។

​សមាសភាព​គូប្រកួត​ទាំងអស់​នៅ ONE: UNBREAKABLE

•​ ​Alaverdi Ramazanov ប៉ះ Capitan Petchyindee Academy (​ប្រកួត​ខ្សែក្រវាត់​ឃី​ក​បុក​សី​ង​ពិភពលោក​)

•​ ​Shinya Aoki ប៉ះ James Nakashima (​ប្រកួត​គុន​ចម្រុះ – lightweight)

•​ ​Rade Opacic ប៉ះ Patrick Schmid (​ប្រកួត​ឃី​ក​បុក​សី​ង​-​ទម្ងន់ heavyweight)

•​ ​Zebaztian Kadestam ប៉ះ Gadzhimurad Abdulaev (​ប្រកួត​គុន​ចម្រុះ​- welterweight)

•​ ​Meng Bo ប៉ះ Samara Santos (​ប្រកួត​គុន​ចម្រុះ​នារី​-atomweight)

•​ ​Hexigetu ប៉ះ Lito Adiwang (​ប្រកួត​គុន​ចម្រុះ​-strawweight)៕