កីឡា

U22 វៀតណាម ទៅហាត់នៅកាតាត្រៀមការពារមេដាយមាសស៊ីហ្គេម នៅកម្ពុជា

បានផុស

២ years មុន

នៅ

ថ្ងៃពុធ ២២ កុម្ភៈ ២០២៣

ដោយ

ក្រុមបាល់ទាត់ជម្រើសជាតិវៀតណាមអាយុក្រោម២២ឆ្នាំ (U22) គ្រោងនឹងទៅហ្វឹកហាត់នៅប្រទេសកាតារយៈពេលមួយខែដើម្បីការពារមេដាយមាសនៃព្រឹត្តិការណ៍កីឡាស៊ីហ្គេម លើកទី៣២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមផែនការរបស់សហព័ន្ធកីឡាបាល់ទាត់វៀតណាម (VFF) បានឲ្យដឹងថា នៅថ្ងៃអាទិត្យ ទី២៦ ខែកុម្ភៈ ខាងមុខនេះ លោក Philippe Troussier ជនជាតិបារាំងនឹងចុះកុងត្រាជាផ្លូវការដើម្បីក្លាយជាគ្រូបង្គោលជម្រើសជាតិវៀតណាមទាំងឈុតធំ និងយុវជនអាយុក្រោម២២ឆ្នាំ។

លោក Park Hang-seo ក្រោយដឹកនាំវៀតណាមឈ្នះមេដាយមាស

បន្ទាប់ពីចុះហត្ថលេខារួចរាល់ លោកគ្រូបង្វឹកសញ្ជាតិបារាំងដែលមានបទពិសោធជោកជាំរូបនេះនឹងកោះហៅជម្រើសជាតិទាំងពីរឈុតក្នុងពេលតែមួយក្នុងនោះឈុតធំមាន២៨នាក់ និង U22 មាន៣៥ នាក់។ តាមផែនការក្នុងខែមីនាដែលជាពេលវេលា FIFA Day ក្រុមវៀតណាមនឹងមិនមានការប្រកួតមិត្តភាពអន្តរជាតិទេ។

អ្វីដែលគ្រូបង្វឹកថ្មីរូបនេះត្រូវធ្វើនៅចំពោះមុខគឺការហ្វឹកហាត់ដើម្បីត្រៀមការពារតំណែងមេដាយមាសស៊ីហ្គេម។ តាមការគ្រោងទុក លោកនឹងដឹកនាំ U22 វៀតណាមចំនួន៣៥នាក់ និងអ្នកចាំទី៥នាក់ទៅបោះជំរំហ្វឹកហាត់នៅប្រទេសកាតាចាប់ពីថ្ងៃទី១ ដល់ទី២៩ ខែមីនា ខាងមុខ។ នៅទីនោះក៏នឹងមានការប្រកួតមិត្តភាពអន្តរជាតិផងដែរជាមួយក្រុមក្នុងស្រុករបស់កាតា។

សូមបញ្ជាក់ថា មុនឈានដល់ការដឹកនាំទាំងក្រុមធំ និង U22 វៀតណាម លោក Philippe Troussier ធ្លាប់ដឹកនាំ U19 វៀតណាមពីឆ្នាំ២០១៩-២០២១ និងបន្តដឹកនាំ U22/U23 និងឈុតធំ ចាប់ពីឆ្នាំ២០២៣នេះ បន្ទាប់ពីគ្រូបង្វឹកសញ្ជាតិកូរ៉េខាងត្បូងលោក Park Hang-seo បានចាកចេញ។ សម្រាប់ការចូលខ្លួនមកដល់នាំរហូតដល់ឆ្នាំ២០២៦ គ្រូបង្វឹកសញ្ជាតិបារាំងរូបនេះទទួលបានប្រាក់ខែ៦ម៉ឺនដុល្លារអាមេរិកក្នុងមួយខែ និងដាក់គោលដៅនាំយកជម្រើសជាតិវៀតណាមទៅកាន់ជុំផ្តាច់ព្រ័ត្រ World Cup ឆ្នាំ២០២៦។

ក្រុម U23 វៀតណាម បានឈ្នះមេដាយមាសស៊ីហ្គេម លើកទី៣១ ឆ្នាំ២០២១ (លើកឆ្នាំ២០២២) ដែលវៀតណាមធ្វើជាម្ចាស់ផ្ទះ ដូច្នេះពួកគេមានកាតព្វកិច្ចការពារតំណែងមេដាយមាសរបស់ខ្លួន៕

អត្ថបទ៖ វីរបុត្រ

Related Topics:កីឡាស៊ីហ្គេម ឆ្នាំ២០២៣ កីឡាបាល់ទាត់