ថៃ ត្អូញថា តម្លៃសិទ្ធិផ្សាយស៊ីហ្គេមនៅកម្ពុជា ថ្លៃពេក, ចង់សុំឲ្យបញ្ចុះខ្លះ (មានវីដេអូ)

ម្ចាស់ផ្ទះស៊ីហ្គេម២០២៣ គឺប្រទេសកម្ពុជា នឹងលក់សិទ្ធិ​ផ្សាយផ្ទាល់​ដល់​ប្រទេសជា​សមាជិក តម្លៃ ៨០ម៉ឺនដុល្លារ​អាមេរិក ឬ​ប្រហែល ២៨ លាន​បាត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យ៉ាងណាក្តី ប្រទេស​ថៃ ​គ្រោង​ធ្វើការ​ចរចាលើ​តម្លៃនេះ ​មុនពេលព្រឹត្តិការណ៍​ចាប់​ផ្ដើម​ក្នុង​ខែ​ឧសភា ដោយ​ថៃបានលើក​ឡើង​ថា ​តម្លៃ​នេះគឺថ្លៃ​ពេកហើយ។

យោង​តាមគេហទំព័រ KhaoSod របស់ប្រទេសថៃ បានចុះផ្សាយថា វៀតណាម និង​ម៉ាឡេស៊ី​បាន​ចំណាយ​លើការទិញ​សិទ្ធិ​ផ្សាយ​រួចទៅ​ហើយ។

ប៉ុស្តិ៍ទូរទស្សន៍ខ្សែកាបវៀតណាម VTVcab នឹងផ្សាយផ្ទាល់ព្រឹត្តិការណ៍កីឡានេះ ប៉ុន្តែម៉ាឡេស៊ី មិនទាន់ប្រកាសឈ្មោះទូរទស្សន៍នៅឡើយទេ។

អាជ្ញាធរ​កីឡា​ថៃ​ ​រាយការណ៍​ថា តម្លៃ​នៃ​សិទ្ធិ​ផ្សាយផ្ទាល់នេះគឺ​ថ្លៃ​ពេក ហើយពួកគេគ្រោងចរចាជាមួយកម្ពុជា និងអាចស្វែងរកជំនួយពីឧបនាយករដ្ឋមន្ត្រីលោក Prawit Wongsuwan ដែលជាប្រធានគណៈកម្មាធិការជាតិអូឡាំពិកថៃ (NOCT)។

យោងតាម NOCT, ប៉ុស្តិ៍ទូរទស្សន៍ថៃដែលនឹងផ្សាយផ្ទាល់ព្រឹត្តិការណ៍ស៊ីហ្គេម គឺស្ថានីយ៍ទូរទស្សន៍ Pool Thai ឬ T.V.Pool ហើយការផ្សាយតាមបណ្តាញទូរស័ព្ទ នឹងជាការទទួលខុសត្រូវរបស់ក្រុមហ៊ុន True Corporation។

គួរបញ្ជាក់ថា ព្រឹត្តិការណ៍ស៊ីហ្គេមឆ្នាំ២០២៣ ឬស៊ីហ្គេមលើកទី៣២ នឹងប្រព្រឹត្តទៅចាប់ពីថ្ងៃទី៥ ដល់ថ្ងៃទី១៧ ខែឧសភា នៅប្រទេសកម្ពុជា។ ព្រឹត្តិការណ៍នេះ នឹងមានការប្រកួតកីឡាចំនួន៣៦ប្រភេទ ហើយអ្នកចូលរួម នឹងប្រកួតប្រជែងដណ្តើមមេដាយមាសចំនួន៦០៨ ដែលជាចំនួនច្រើនបំផុតមិនធ្លាប់មានក្នុងប្រវត្តិសាស្ត្រស៊ីហ្គេម៕

សូមទស្សនាវីដេអូ

ប្រែសម្រួល៖ Vann Vann

ប្រភព៖ Thaiger

ចុចអាន៖ វៀតណាម ប្រទេសដំបូងគេទទួលបានសិទ្ធិផ្សាយស៊ីហ្គេម ២០២៣ នៅកម្ពុជា