កីឡា

កម្ពុជានឹងអញ្ជើញអ្នកកាសែតអន្តរជាតិធ្វើទស្សនកិច្ចស្តីពីការត្រៀមធ្វើស៊ីហ្គេម

បានផុស

២ years មុន

នៅ

ថ្ងៃពុធ ១ មីនា ២០២៣

ដោយ

គណៈកម្មាធិការជាតិរៀបចំការប្រកួតកីឡាស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ នឹងអញ្ជើញអ្នកសារព័ត៌មានពីប្រទេសក្នុងតំបន់អាស៊ាន និងសារព័ត៌មានអន្តរជាតិធំៗដើម្បីធ្វើទស្សនកិច្ចផ្សព្វផ្សាយស្តីពីការរៀបចំ និងត្រៀមខ្លួនរបស់កម្ពុជាសម្រាប់ការធ្វើម្ចាស់ផ្ទះកីឡាស៊ីហ្គេម លើកទី៣២ និងអាស៊ានប៉ារ៉ាហ្គេម លើកទី១២។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បញ្ជាក់ក្នុងសន្និសីទសារព័ត៌មានស្តីពីការត្រៀមខ្លួនធ្វើម្ចាស់ផ្ទះកីឡាស៊ីហ្គេម និងអាស៊ានប៉ារ៉ាហ្គេម ឆ្នាំ២០២៣ លោក វ៉ាត់ ចំរើន អគ្គលេខាធិការគណៈកម្មាធិការជាតិរៀបចំការប្រកួតកីឡាស៊ីហ្គេម-អាស៊ានប៉ារ៉ាហ្គេម បានលើកឡើងថា ៖«រៀងរាល់មុនស៊ីហ្គេម គេមានការហៅអ្នកសារព័ត៌មានក្នុងប្រទេសជាសមាជិក និងអ្នកកាសែតពីស្ថាប័នសារព័ត៌មានអន្តរជាតិធំៗនៅលើពិភពលោកដើម្បីជួបជុំគ្នា ឬហៅថា ធ្វើទស្សនកិច្ចសិក្សានៅប្រទេសដែលជាម្ចាស់ផ្ទះ»។

«ការមកទស្សនកិច្ចសិក្សានេះគឺយើងជាម្ចាស់ផ្ទះបង្ហាញគេឲ្យដឹង ឲ្យឃើញពីសមិទ្ធផល និងការត្រៀមខ្លួនរបស់យើង។ ការងារនេះយើងត្រៀមហើយ។ មែនទែនទៅ សារព័ត៌មាននៅតំបន់អាស៊ានដែលជាប្រទេសសមាជិកបានផ្សព្វផ្សាយពីស៊ីហ្គេមបានច្រើន ហើយសារព័ត៌មានធំៗនៅលើពិភពលោកក៏បានផ្សាយច្រើនដែរ។ ជាពិសេសគេផ្សាយពីពហុកីឡដ្ឋានជាតិមរតកតេជោដែលបញ្ជាក់ពីការធ្វើម្ចាស់ផ្ទះកីឡាស៊ីហ្គេម»។ លោក វ៉ាត់ ចំរើន បានបញ្ជាក់បន្ថែម។

តាមការគ្រោងទុក អ្នកសារព័ត៌មានក្នុងតំបន់អាស៊ាន និងអន្តរជាតិធំៗនឹងធ្វើដំណើរទស្សនកិច្ចសិក្សាស្តីពីការត្រៀមខ្លួនធ្វើម្ចាស់ផ្ទះកីឡាស៊ីហ្គេម និងអាស៊ានប៉ារ៉ាហ្គេម ក្នុងខែមីនា ឆ្នាំ២០២៣នេះពោលគឺមុនពេលដំណើរការប្រកួតចាប់ផ្តើមពីចុងខែមេសាទៅ៕

អត្ថបទ៖ វីរបុត្រ

Related Topics:កីឡាស៊ីហ្គេម ឆ្នាំ២០២៣