កីឡា

នេះជើងខ្លាំងពិតដែលអ្នកគាំទ្រចង់ឃើញប៉ះ ព្រំ សំណាង

បានផុស

២ years មុន

នៅ

ថ្ងៃអង្គារ ៧ មីនា ២០២៣

ដោយ

អ្នកប្រដាល់គុនខ្មែរ ព្រំ សំណាង ទទួលបានជ័យជម្នះ២ប្រកួតជាប់គ្នា និងជាការផ្តួលដៃគូឲ្យសន្លប់ក្នុងទឹកទី១ទាំងពីរដងនៅសង្វៀន Thai Fight ប៉ុន្តែអ្នកគាំទ្រមើលឃើញថា ដៃគូទាំងពីររូបរបស់អ្នកលេងគុនខ្មែររូបនេះមិនទាន់ជាជើងខ្លាំងពិតប្រាកដទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទាំងអ្នកគាំទ្រនៅខ្មែរ និងថៃពិតជាចង់ឃើញជើងខ្លាំងគុនខ្មែរ ព្រំ សំណាង ជួបអ្នកខ្លាំងពិតប្រាកដដើម្បីបញ្ជាក់ឲ្យច្បាស់ថា កីឡាករកម្ពុជារូបនេះពិតជាជើងខ្លាំងមែន។ សង្វៀន Thai Fight មានកីឡាករខ្លាំងៗជាច្រើនមិនថា កីឡាករថៃ ឬបរទេសទេដែលអាចប្រកួតជាមួយ ព្រំ សំណាង ប៉ុន្តែបច្ចុប្បន្ន អ្នកគាំទ្រកម្ពុជា និងថៃពិតជាចង់ឃើញកីឡាករកម្ពុជារូបនេះប្រកួតជាមួយជើងខ្លាំងថៃឈ្មោះ Tengnueng Sitjaesairoong។

សូមបញ្ជាក់ដល់អ្នកស្នេហាប្រដាល់គុនខ្មែរឲ្យច្បាស់ថា Tengnueng នេះពិតជាជើងខ្លាំងទម្ងន់ចាប់ពី៧១គីឡូក្រាមឡើងមែន។ រូបគេមានកម្ពស់ ១,៨០ម៉ែត្រ ទម្ងន់ប្រកួតក្រោម៨០គីឡូក្រាម និងអាយុ៣០ឆ្នាំ។

បទពិសោធ

រូបគេមានបទពិសោធលើសង្វៀនចំនួនប្រកួត១១០ដងគឺឈ្នះ៩២ ចាញ់១៤ និងស្មើ៤។ បើគិតត្រឹម២៤ប្រកួតចុងក្រោយតាំងពីឆ្នាំ២០១៩ រូបគេមិនដែលបរាជ័យសោះ ហើយឈ្នះពិន្ទុតែ៤ដងប៉ុណ្ណោះ ក្រៅពីនោះផ្តួលដៃគូទាំងអស់។

Tengnueng ប្រកួតជាមួយកីឡាករអង់គ្លេស Corey beldon

ខ្សែក្រវាត់

ឆ្នាំ២០២០ ជើងឯក Kard Chuek ទម្ងន់៧២គីឡូក្រាម នៅសង្វៀន Thai Fight
ឆ្នាំ២០១៩ ជើងឯក Kard Chuek ទម្ងន់៨១គីឡូក្រាម នៅសង្វៀន Thai Fight
ឆ្នាំ២០១៥ ជើងឯក King’s Cup ទម្ងន់៧០គីឡូក្រាម នៅសង្វៀន Thai Fight
ឆ្នាំ២០១៥ ជើងឯក Isuzu Cup ទម្ងន់៧០គីឡូក្រាន នៅសង្វៀន Thai Fight
ឆ្នាំ២០១៤ ជើងឯក WMC King’s Cup នៅស្ថាប័ន World Mauythai Council
ឆ្នាំ២០១៤ ជើងឯក សង្វៀន Omnoi Stadium ទម្ងន់៧០គីឡូក្រាម
ឆ្នាំ២០១២ ជើងឯក IFMA ពិភពលោកទម្ងន់៧៥គីឡូក្រាម

រូបគេមានគោលជំហររឹងមាំ កម្លាំងស៊ុហ្វល្អ និងវ៉ៃដោយបច្ចេកទេស។ រូបគេចេញអាវុធច្បាស់ល្អ និងមានទម្ងន់គឺកណ្តាប់ដៃ ទាត់ ជង្គង់ និងកែង។ បើប្រៀបធៀបជាមួយ ព្រំ សំណាង គឺកីឡាករថៃរូបនេះមានស្នៀត និងបច្ចេកទេសច្បាស់ជាង។

ទោះបីជាយ៉ាងណា សង្វៀន Thai Fight ដើម្បីទាក់ទាញអ្នកគាំទ្រកម្ពុជាប្រហែលជាមិនទាន់រៀបចំឲ្យ Tengnueng ជួប ព្រំ សំណាង ឆាប់ៗទេ។ គេអាចរៀបចំឲ្យកីឡាករកម្ពុជាប្រកួតជាមួយកីឡាករប្រទេសផ្សេងពីរឬបីប្រកួតទៀតសិន ហើយក៏ជាពេលវេលាដែលគេសិក្សាស្វែងយល់ពីកីឡាករកម្ពុជា៕

អត្ថបទ៖ វីរបុត្រ