កីឡា

Joe Craven ដៃគូរបស់ Thiago គឺជាជើងឯក MTGP ទ្វីបអឺរ៉ុប

បានផុស

២ years មុន

នៅ

ថ្ងៃសុក្រ ១៧ មីនា ២០២៣

ដោយ

អ្នកប្រដាល់ប្រេស៊ីល Thiago Teixeira ដែលកំពុងហ្វឹកហាត់ និងស្នាក់នៅលើទឹកដីប្រទេសកម្ពុជានឹងប្រកួតជាមួយកីឡាករអង់គ្លេស Joe Craven ដើម្បីដណ្តើមខ្សែក្រវាត់អន្តរជាតិ នាថ្ងៃទី១ ខែមេសា ឆ្នាំ២០២៣ នៅប្រទេសអាល្លឺម៉ង់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

Joe Craven ជាកីឡាករពេញកម្លាំងម្នាក់ដែលទើបអាយុ២៥ឆ្នាំប៉ុណ្ណោះ និងធ្លាប់ប្រកួតបាន៣៧ដង ក្នុងនោះឈ្នះ៣១ដង និងចាញ់៦ដង ប្រៀបធៀបជាមួយកីឡាករ Thiago Teixeira ដែលមានអាយុជិត៤០ឆ្នាំ និងធ្លាប់ប្រកួតប្រហែល១០០ដង។

កីឡាករអង់គ្លេស Joe Craven ប្រកួតចុងក្រោយបំផុតកាលពីខែកញ្ញា ឆ្នាំ២០២២ នៅសង្វៀន Liverpool Olympia ប្រទេសអង់គ្លេស ជាកន្លែងដែលរូបគេផ្តួលកីឡាករអ៉ីតាលី Jacopo Tarantino ឲ្យសន្លប់ក្នុងទឹកទី៣ ដើម្បីក្លាយជាម្ចាស់ខ្សែក្រវាត់អឺរ៉ុប MTGP ក្នុងប្រភេទទម្ងន់៧២.៥គីឡូក្រាម និងជាកីឡាករលំដាប់លេខ១នៅប្រទេសអង់គ្លេសលើប្រភេទទម្ងន់នេះ។

បើនិយាយពីចំណាត់ថ្នាក់កម្រិតពិភពលោកក្នុងប្រភេទទម្ងន់ Middleweight (៧២.៥គីឡូក្រាម) របស់សង្វៀន Thai Fight កីឡាករ Joe Craven ស្ថិតនៅលេខ៧ ខណៈកីឡាករ Youssef Boughanem ស្ថិតនៅចំណាត់ថ្នាក់លេខ១ និងកីឡាករគុនខ្មែរ ធឿន ធារ៉ា ចំណាត់ថ្នាក់លេខ២។

Joe Craven បានប្រកួតចាញ់កីឡាករ Youssef Boughanem ដោយសន្លប់ក្នុងទឹកទី៤ កាលពីឆ្នាំ២០១៩ នៅប្រទេសបែលហ្ស៊ិក។

រូបគេជាកីឡាករពេញកម្លាំងស៊ុហ្វល្អ ហើយក៏មានអាវុធចេញល្អទាំងកណ្តាប់ដៃ ទាត់ ជង្គង់ និងកែងផងដែរ ដូច្នេះនឹងក្លាយជាដៃគូពិបាកមួយសម្រាប់កីឡាករ Thiago Teixeira ដែលត្រូវប្រកួតតំណាងឲ្យគុនខ្មែរ៕