កីឡា

កម្ពុជាបានចុះឈ្មោះអត្តពលិកជាង១៣០០នាក់ហើយដើម្បីប្រកួតស៊ីហ្គេម២០២៣

បានផុស

២ years មុន

នៅ

ថ្ងៃអង្គារ ២១ មីនា ២០២៣

ដោយ

ប្រទេសកម្ពុជាក្នុងនាមជាម្ចាស់ផ្ទះបានចុះឈ្មោះប្រតិភូកីឡារបស់ខ្លួនចំនួន១៣១២នាក់ហើយសម្រាប់ការប្រកួតកីឡាស៊ីហ្គេម លើកទី៣២ ចាប់ពីថ្ងៃទី៥ ដល់ទី១៧ ខែឧសភា ឆ្នាំ២០២៣។

តាមរបាយការណ៍របស់លោក ថោង ខុន រដ្ឋមន្ត្រីក្រសួងទេសចរណ៍ ប្រធានគណៈកម្មាធិការជាតិអូឡាំពិកកម្ពុជា និងជាអនុប្រធានអចិន្ត្រៃយ៍នៃគណៈកម្មាធិការជាតិរៀបចំការប្រកួតកីឡាស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ បានបង្ហាញក្នុងព្រះរាជពិធីសុំព្រះអគ្គិជ័យកីឡា នៅប្រាសាទអង្គរវត្ត នាព្រឹកថ្ងៃទី២១ ខែមីនា ឃើញថា កម្ពុជាបានចុះឈ្មោះប្រតិភូកីឡារបស់ខ្លួនចំនួន១៣១២នាក់ហើយ។ យ៉ាងណា ចំនួននេះប្រហែលជាមានការប្រែប្រួលនៅដំណាក់កាលចុងក្រោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើក្រឡេកមើលប្រទេសអាស៊ានទាំង១០ផ្សេងក៏សុទ្ធតែបានចុះឈ្មោះប្រតិភូកីឡាច្រើនហើយ ក្នុងនោះថៃបានចុះឈ្មោះប្រតិភូកីឡារបស់ខ្លួនបានច្រើនជាងគេរហូតដល់១៨៥៥នាក់ បន្ទាប់មកប្រទេសឥណ្ឌូនេស៊ី និងបន្តបន្ទាប់ទៀតដែលមានទិន្នន័យដូចខាងក្រោម៖

ព្រុយណេ ៨២នាក់
កម្ពុជា ១៣១២នាក់
ឥណ្ឌូនេស៊ី ១៧៣៦នាក់
ឡាវ ៥៨៣នាក់
ម៉ាឡេស៊ី ១៤៤០នាក់
មីយ៉ាន់ម៉ា ៦៦៣នាក់
ហ្វីលីពីន ១១២១នាក់
សិង្ហបុរី ១២៧១នាក់
ថៃ ១៨៥៥នាក់
ទីម័រខាងកើត ១៦៧នាក់
វៀតណាម ១២២៣នាក់

ក្នុងសន្នសីទសារព័ត៌មានស្តីពីការរៀបចំការប្រកួតកីឡាស៊ីហ្គេម និងអាស៊ានប៉ារ៉ាហ្គេម កាលពីថ្ងៃទី២៣ ខែកុម្ភៈ ឆ្នាំ២០២៣កន្លងទៅ លោក វ៉ាត់ ចំរើន អគ្គលេខាធិការនៃគណៈកម្មាធិការជាតិរៀបចំការប្រកួតកីឡាស៊ីហ្គេម-កីឡាអាស៊ានប៉ារ៉ាហ្គេម បានប្រាប់ថា កម្ពុជាបានដាក់គ្រប់ប្រភេទកីឡាទាំង៣៦ និងកីឡាប្រកួតសម្តែង១ សម្រាប់ការប្រកួតស៊ីហ្គេម ឆ្នាំ២០២៣។ «ក្នុងនាមជាម្ចាស់ផ្ទះ យើងមិនដាក់ប្រភេទកីឡាណាដែលយើងគ្មានអត្តពលិកចូលរួមប្រកួតទេ អីចឹងគ្រប់ប្រភេទកីឡាដែលយើងដាក់ឲ្យប្រកួតគឺយើងមានកីឡាករ កីឡាការិនីចូលរួមប្រកួត»។