កីឡា

បាល់ទះកម្ពុជានឹងប្រកួតជាមួយម៉ាឡេស៊ី និងសិង្ហបុរី ចុងខែនេះត្រៀមស៊ីហ្គេម

បានផុស

២ years មុន

នៅ

ថ្ងៃពុធ ២២ មីនា ២០២៣

ដោយ

ក្រុមបាល់ទះជម្រើសជាតិកម្ពុជា នឹងធ្វើការប្រកួតមិត្តភាពអន្តរជាតិ២ប្រកួតនាចុងខែនេះដើម្បីត្រៀមខ្លួន និងកម្តៅសាច់ដុំសម្រាប់កីឡាស៊ីហ្គេម លើកទី៣២ ឆ្នាំ២០២៣ ដែលកម្ពុជាធ្វើជាម្ចាស់ផ្ទះ។

សម្រាប់ការប្រកួតមិត្តភាពអន្តរជាតិនេះមានម្ចាស់ផ្ទះម៉ាឡេស៊ី ក្រុមភ្ញៀវ សិង្ហបុរី និងកម្ពុជាដែលនឹងចាប់ផ្តើមប្រកួតពីថ្ងៃទី២៩ ខែមីនា ដល់ថ្ងៃទី១ ខែមេសា ឆ្នាំ២០២៣។ នេះជាព្រឹត្តិការណ៍ប្រកួតមិត្តភាពកម្តៅសាច់ដុំ និងត្រៀមខ្លួនរបស់ក្រុមជម្រើសជាតិទាំង៣ដែលនឹងត្រូវប្រកួតក្នុងកីឡាស៊ីហ្គេម លើកទី៣២ នាខែឧសភា ដូចគ្នា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រឡេកមើលប្រវត្តិក្រុមបាល់ទះជម្រើសជាតិទាំង៣ក្នុងព្រឹត្តិការណ៍កីឡាស៊ីហ្គេម ម៉ាឡេស៊ី ធ្លាប់ធ្វើបានល្អជាងគេដោយបានឡើងដល់វគ្គផ្តាច់ព្រ័ត្រកាលពីឆ្នាំ២០០១ ប៉ុន្តែបានចាញ់ជម្រើសជាតិថៃ ០-៣ ហើយទទួលបានមេដាយប្រាក់ ហើយក៏ជាការការឈ្នះមេដាយលើកដំបូងរបស់ខ្លួន។

ចំពោះសិង្ហបុរីធ្លាប់ឈ្នះមេដាយសំរឹទ្ធ២ដងគឺឆ្នាំ១៩៨៣ និង១៩៨៥ ខណៈកម្ពុជាទើបឈ្នះមេដាយសំរឹទ្ធលើកដំបូងកាលស៊ីហ្គេម ចុងក្រោយឆ្នាំ២០២២នៅប្រទេសវៀតណាម។ ដូច្នេះក្រុមទាំង៣នេះមានគុណភាព និងបច្ចេកទេសមិនលើសខ្វះគ្នាប៉ុន្មានឡើយ។

ទោះបីជាយ៉ាងណា ក្រុមកម្ពុជាត្រូវបានគេមើលឃើញមានការអភិវឌ្ឍគួរឲ្យចាប់អារម្មណ៍ប៉ុន្មានឆ្នាំចុងក្រោយនេះរហូតបង្កើតកំណត់ត្រាឈ្នះជម្រើសជាតិថៃ និងឈ្នះមេដាយជាលើកដំបូង។ ស្របពេលម៉ាឡេស៊ី និងសិង្ហបុរីមិនដែលបានឡើងដល់វគ្គ៤ក្រុមចុងក្រោយទេគិតចាប់តាំងពីឆ្នាំ២០០៣មក៕

អត្ថបទ៖ វីរបុត្រ