កីឡា

ល្ងាចនេះ សម្តេចតេជោ ហ៊ុន សែន ជួបមហាគ្រួសារកីឡាកម្ពុជា

បានផុស

២ years មុន

នៅ

ថ្ងៃចន្ទ ៣ មេសា ២០២៣

ដោយ

សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជានឹងជួបមហាគ្រួសារកីឡាកម្ពុជា នៅល្ងាចថ្ងៃចន្ទ ទី៣ ខែមេសានេះ ដើម្បីលើកទឹកចិត្ត ផ្តល់អនុសាសន៍ណែននាំ និងទទួលទានអាហារសាមគ្គីរួមគ្នាដើម្បីឆ្ពោះកីឡាស៊ីហ្គេម និងអាស៊ានប៉ារ៉ាហ្គេម ជាប្រវត្តិសាស្ត្រដំបូងនៅលើទឹកដីនៃព្រះរាជាណាចក្រកម្ពុជាឲ្យទទួលបានជោគជ័យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមទម្លាប់ សម្តេចតេជោ ហ៊ុន សែន ត្រូវជួបមហាគ្រួសារកីឡាកម្ពុជានៅថ្ងៃទី៤ ខែមេសា រៀងរាល់ឆ្នាំ ប៉ុន្តែនៅឆ្នាំនេះបានផ្លាស់មកជួបនៅថ្ងៃទី៣ ខែមេសាវិញ។ នេះបើតាមការប្រកាសរបស់គណៈកម្មាធិការជាតិអូឡាំពិកកម្ពុជា (NOCC) នៅល្ងាចថ្ងៃទី២ ខែមីនានេះ។

នេះជាការជួបជាមួយកីឡាករ កីឡាការិនី គ្រូបង្វឹក មន្ត្រីកីឡា និងអ្នកពាក់ព័ន្ធលើកទី៥ បន្ទាប់ពីសម្តេចតេជោនាយករដ្ឋមន្ត្រីធ្លាប់ជួប៤លើកកន្លងមក ប៉ុន្តែ២ឆ្នាំចុងក្រោយនេះមិនបានរៀបចំពិធីជួបជុំទេដោយសារវិបត្តិជំងឺកូវីដ-១៩។

ការជួបមហាគ្រួសារកីឡាកម្ពុជារបស់សម្តេចតេជោពិតជាមានសារសំខាន់ខ្លាំងដើម្បីផ្តល់អនុសាសន៍ សំណេះសំណាល បង្កើនភាពស្និទ្ធស្នាល លើកទឹកចិត្ត និងពិសាអាហារសាមគ្គីរួមគ្នា ក៏ដូចជារាំលេងកម្សាន្តដើម្បីរួមដៃគ្នាឆ្ពោះទៅរកភាពជោគជ័យកីឡា ស៊ីហ្គេម លើកទី៣២ និងអាស៊ានប៉ារ៉ាហ្គេម លើកទី១២ ទាំងអស់គ្នា។

សម្តេចតេជោ ហ៊ុន សែន បានជួបមហាគ្រួសារកីឡាកម្ពុជាចុងក្រោយកាលពីថ្ងៃទី៤ ខែមេសា ឆ្នាំ២០១៩ ដែលជាការជួបសំណេះសំណាលលើកទី៤ មុនពេលវិបត្តិជំងឺកូវីដ-១៩បានកើតមានឡើងហើយក៏ខកខានប៉ុន្មានឆ្នាំចុងក្រោយ៕

អត្ថបទ៖ វីរបុត្រ

Related Topics:កីឡាស៊ីហ្គេម ឆ្នាំ២០២៣