កីឡា

គណៈកម្មាធិការជាតិ ប៉ារ៉ាឡាំពិកកម្ពុជា ទទួលបានការឧបត្ថម្ភជាថវិកា និងសម្ភារៈពីទឹកពិសាវីតាល់

បានផុស

១ year មុន

នៅ

ថ្ងៃអង្គារ ៤ មេសា ២០២៣

ដោយ

ក្រុមហ៊ុនទឹកពិសាវីតាល់ នៅព្រឹកថ្ងៃទី ០៤ ខែមេសា ឆ្នាំ ២០២៣ បានរៀបចំទទួលស្វាគមន៍ គណៈប្រតិភូកីឡា នៃគណៈកម្មាធិការជាតិ ប៉ារ៉ាឡាំពិកកម្ពុជា អញ្ជើញមកទស្សនកិច្ច រោងចក្រផលិតទឹក ពិសាវីតាល់ក្នុង «គម្រោង វីតាល់ ជាមួយអាស៊ានប៉ារ៉ាហ្គេម» ដែលបានរៀបចំឡើង ក្នុងគោលបំណង បង្ហាញការគាំទ្រ និងសេចក្តីស្រលាញ់ចេញពីបេះដូង ក្នុងស្មារតីខ្មែរតែមួយ ពីវីតាល់ តាមរយៈការចូលរួមគាំទ្រជាសម្ភារៈ និងថវិកា ដើម្បីបានជួយសម្រួលតម្រូវការចាំបាច់របស់បងប្អូនកីឡាករ កីឡាការិនី ដែលកំពុងហ្វឹកហាត់យ៉ាងសកម្ម ការសម្រាប់ត្រៀមប្រកួត អាស៊ានប៉ារ៉ាហ្គេមនាពេលខាងមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កម្មវិធីនេះប្រព្រឹត្តទៅក្រោមវត្តមាន លោក យី វាសនា អគ្គលេខាធិការ គណៈកម្មាធិការជាតិ ប៉ារ៉ាឡាំពិកកម្ពុជា និងជាអគ្គលេខាធិការរង គណៈកម្មាធិការជាតិរៀបចំ ការប្រកួតកីឡាអាស៊ាន ប៉ារ៉ាហ្គេម លើកទី ១២ ឆ្នាំ ២០២៣ និងលោក ហេង វ៉ាន់សាក់ ប្រធានប្រតិបត្តិការធុរកិច្ច ក្រុមហ៊ុន វ័ន ហ្វ្រេតធើនីធី (វីតាល់) និងវត្តមានថ្នាក់ដឹកនាំ គ្រូបង្វឹកកីឡាករ កីឡាការនីប៉ារ៉ាហ្គេមច្រើននាក់។

លោក ហេង វ៉ាន់សាក់ ប្រធានប្រតិបត្តិការធុរកិច្ច ក្រុមហ៊ុន វ័ន ហ្វ្រេតធើនីធី (វីតាល់) បានសម្តែង នូវការថ្លែងអំណរគុណ ជូនចំពោះគណៈកម្មាធិការជាតិ ប៉ារ៉ាឡាំពិកកម្ពុជា ដែលបានផ្តល់ការគាំទ្រយ៉ាងពេញទំហឹង ចំពោះគម្រោង វីតាល់ ជាមួយអាស៊ានប៉ារ៉ាហ្គេម។

លោកបានមានប្រសាសន៍ថា វត្ថុបំណងជារួម នៃការរៀបចំកម្មវិធីពេលនេះ គឺបង្ហាញពីការគាំទ្រ របស់វីតាល់ក្នុងនាមជាវិស័យឯកជន ក៏ដូចជាប្រជាជាតិខ្មែរគ្រប់រូប ដែលមានមោទនភាព ក្នុងការធ្វើជាម្ចាស់ផ្ទះ នៃព្រឹត្តិការណ៍កីឡាស៊ីហ្គេមលើកទី ៣២ និងកីឡាអាស៊ានប៉ារ៉ាហ្គេមលើកទី ១២។

លោកប្រធានប្រតិបត្តិការធុរកិច្ច បានបន្ថែមទៀតថា ជាមួយគ្នានេះផងដែរ វីតាល់ ក៏ទទួលបានការទទួលស្គាល់ជាដៃគូគាំទ្រ ដោយមោទនៈ នៃយុទ្ធនាការ Beyond The Games នៃស.ស.យ.ក. ក្នុងការចូលរួមផ្សព្វផ្សាយ ការសាទរស៊ីហ្គេម ២០២៣ ជាមួយការចេញ សំបកឡាប៊ែលស៊ីហ្គេម រចនាឡើងយ៉ាងពិសេសសម្រាប់ព្រឹត្តិការណ៍ ជាប្រវត្តិសាស្ត្ររបស់កម្ពុជា។

លោក យី វាសនា អគ្គលេខាធិការ នៃគណៈកម្មាធិការជាតិប៉ារ៉ាឡាំពិកកម្ពុជា មានប្រសាសន៍កោតសរសើរនូវគំនិតផ្ដួចផ្ដើម និងការគាំទ្ររបស់វីតាល់ ជាមួយកីឡាករកីឡាការនីប៉ារ៉ាហ្គេម ក្នុងកំឡុងពេលហ្វឹកហាត់ត្រៀមសម្រាប់ការប្រកួតដែលនឹងខិតជិតមកនាប្រមាណជាង ៦០ ថ្ងៃខាងមុខ។

ជាមួយគ្នានេះ លោកក៏បានបន្ថែមទៀតកាយវិការ នៃការចូលរួមរបស់វីតាល់ នាពេលនេះបង្ហាញពីសាមគ្គីភាព និងការគាំទ្រយ៉ាងពេញទំហឹង នៃវិស័យឯកជន ដែលជាកម្លាំងចលករ នៃសេដ្ឋកិច្ច ចូលរួមគាំទ្រដល់កីឡាករ កីឡាការិនី របស់យើងក្នុងការហ្វឹកហាត់ត្រៀមប្រកួត និងយកជ័យជម្នះ ជូនជាតិមាតុភូមិរបស់យើង។

គួរបញ្ជាក់ផងដែរថា ជំហានដំបូង នៃគម្រោង វីតាល់ ជាមួយអាស៊ានប៉ារ៉ាហ្គេម ដែលវីតាល់ បានផ្តល់ជូនថវិកា និងសម្លៀកបំពាក់ហ្វឹកហាត់ ជូនកីឡាករកីឡាការិនីបាល់ទះអង្គុយ និងបាល់បោះជិះរទេះ នៃគណៈកម្មាធិការជាតិប៉ារ៉ាឡាំពិកកម្ពុជា ក្រោមកញ្ចប់បូរេប្រទាន នៃមូលនិធិ ២៥៛ ដែលជាការបរិច្ចាគរបស់អ្នកប្រើប្រាស់ទឹកពិសាវីតាល់៕