កីឡា

ធន់ ផានិត ប្រាប់បច្ចេកទេចផ្តួលថៃសន្លប់ទឹក២យប់មិញឡើងឈរកំពូលតារាង

បានផុស

១ year មុន

នៅ

ថ្ងៃចន្ទ ១០ មេសា ២០២៣

ដោយ

ធន់ ផានិត ទទួលបានជ័យជម្នះលើកទី២ ក្នុងការប្រកួតវគ្គសន្សំពិន្ទុខ្សែក្រវាត់ខារ៉ាបាវ ឆ្នាំ២០២៣ នៅសង្វៀនបាយ័នស្ទឹងមានជ័យ បន្ទាប់ពីផ្តួលកីឡាករថៃ ថៈឡេងើន ប៉.អាវបាងសារ៉េ ឲ្យសន្លប់ក្នុងទឹកទី២ ដើម្បីទទួលបាន៣ពិន្ទុពេញបន្ថែមទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្រាប់ការប្រកួតកាលពីល្ងាច ថ្ងៃអាទិត្យ ទី៩ ខែមេសា អ្នកលេងគុនខ្មែរ ធន់ ផានិត និងកីឡាករថៃ ថៈឡេងើន ហាក់គ្មានការស្ទាបស្ទង់គ្នាទេ ប៉ុន្តែកីឡាករទាំងពីរចាប់ផ្តើមវាយសម្រុកគ្នាតែម្តង។ នៅទឹកទី១ឃើញថា កីឡាករកម្ពុជាព្យាយាមទាត់ជើងក្រោម ខណៈកីឡាករថៃព្យាយាមចូលអោបឡើងជង្គង់ និងវាយកែងដែលមើលទៅប្រដំប្រសងគ្នា។

ចូលទឹកទី២ កីឡាករទាំងពីររឹតតែព្យាយាមចូលអោបឡើងជង្គង់ ទាត់ និងលេងកែង។ អ្វីដែលគួរឲ្យកត់ចំគាល់នោះ អ្នកទាំងពីរបានឡាំជង្គង់គ្នាទៅវិញទៅមក ប៉ុន្តែឃើញថា ធន់ ផានិត មានគោលជំហររឹងមាំជាងដែលងាយស្រួលក្នុងការឡើងជង្គង់ ហើយបុកជង្គង់ពេញៗលើពោះរបស់ ថៈឡេងើន ជាច្រើនដែលបណ្តាលឲ្យដួលសន្លប់រាប់៨ក៏មិនអាចក្រោករួច។

សម្រាប់ការផ្តួលដៃគូនេះ ធន់ ផានិត បានប្រាប់ថា ៖«សម្រាប់ការប្រកួតថ្ងៃនេះ ខ្ញុំគិតថា ខ្ញុំធ្វើបានល្អ ពីព្រោះខ្ញុំផ្តួលដៃគូបានលឿន។ ខ្ញុំបានព្យាយាមឡាំជង្គង់ជាមួយគាត់ មួយទៅ មួយមក ដោយសារខ្ញុំមើលឃើញថា ខ្ញុំអាចវ៉ៃក្បាច់ឡាំបានល្អច្រើន។ ក្បាច់របស់ខ្ញុំមែនទែនទៅគឺចូលវ៉ៃកៀក»។

គិតត្រឹមសប្តាហ៍ទី១ ក្នុងជុំទី២ ធន់ ផានិត ជាបេក្ខភាពជានមុខគេក្នុងតារាងពិន្ទុបណ្ណោះអាសន្ន បន្ទាប់ពីឆ្លងកាត់២ប្រកួត ឈ្នះទាំងពីរ រកបាន៦ពិន្ទុពេញ ខណៈ សេក គឹមសាន បានចាញ់ក្នុងទឹកទី២សម្រាប់ការប្រកួតជុំទី២នេះ។