ការលក់ Man Utd ឈាន​ដល់ការដេញថ្លៃជុំទី៣​ដែល​នឹង​​ស្នើ​ត្រឹមចុងខែមេសានេះ

ដំណើរការលក់ក្លិប Manchester United នឹងឈានចូលដល់ការដេញថ្លៃជុំទី៣ ខណៈអ្នកដេញថ្លៃគូប្រជែងត្រូវបានស្នើសុំដោយ​ Raine Group ជាក្រុមហ៊ុនគ្រប់គ្រងលើការលក់ ដើម្បីដាក់សំណើចុងក្រោយរបស់ពួកគេនៅចុងខែមេសា​នេះ។

គេជឿថា មាន​ភាគីចាប់អារម្មណ៍ចំនួន ៧ ដែលភាគច្រើនចង់ទិញភាគហ៊ុនភាគតិច​ក្នុងក្លិប។ អ្នកដេញថ្លៃនាំមុខគេចំនួន២ ដែលចង់ទិញពីគ្រួសារត្រកូល Glazers គឺសេដ្ឋីកាតា Sheikh Jassim និងសេដ្ឋីអង់គ្លេស Sir Jim Ratcliffe  ដែល​ត្រូវបានគេរំពឹងថា នឹងដាក់សំណើដេញថ្លៃចុងក្រោយមុនថ្ងៃផុតកំណត់ចូលមកដល់។

គ្រួសារត្រកូល Glazers ចង់បានយ៉ាងហោចណាស់ ៦ពាន់លានផោន ដើម្បីលក់​ក្លឹប​ United។ លោក Sheikh Jassim ត្រូវបានគេជឿថា “មានឆន្ទៈក្នុងការបង់ប្រាក់លើសសម្រាប់​ United  ជាមួយនឹងតួលេខជិតទៅនឹងការចង់បានរបស់ Glazers។

វាត្រូវបានគេយល់ថា បុរសកាតារូបនេះ បានតាំង​ចិត្ត​​មិន​ចំណាយ​ប្រាក់​លើស​ហាងឆេងសម្រាប់ក្លិបនោះទេ ប៉ុន្តែជំហរនោះបានបន្ទន់ បន្ទាប់ពីប្រតិភូរបស់លោកបានទៅដល់កីឡដ្ឋាន Old Trafford ​កាល​ពីខែមីនា។

អ្នកតំណាងរបស់ លោក Sheikh Jassim បានស្នើសុំការពន្យារពេលក្នុងការដេញថ្លៃជុំមុន ប៉ុន្តែក្រុមកាតា ទីបំផុតបានដាក់សំណើមួយដែលត្រូវបានគេនិយាយថាមានការប្រកួតប្រជែងខ្ពស់ ប៉ុន្តែក៏មានការពិចារណា និងសមហេតុផលផងដែរ។

គណៈប្រតិភូនៃក្រុមហ៊ុន INEOS របស់មហាសេដ្ឋីអង់គ្លេស Ratcliffe ក៏បានទៅកីឡដ្ឋាន Old Trafford និង Carrington ដូចគ្នាកាលពីខែមុន មុនពេលដេញថ្លៃជាលើកទី​២សម្រាប់ក្លឹប United ចាប់​ផ្តើម។

វាត្រូវបានគេបញ្ជាក់ទៀត គ្រួសារ​ Glazer ស្នើឱ្យមានការដេញថ្លៃជុំទី៣ នៅចុងខែមេសានេះ ពីព្រោះពួកគេមានអារម្មណ៍ថាការផ្តល់ជូនបច្ចុប្បន្នមិនទាន់ខ្ពស់គ្រប់គ្រាន់នៅឡើយទេ៕

ប្រែសម្រួល៖ មន្នីរ័ត្ន
ប្រភព៖ skysports