កីឡា

ទីលានដែលសម្តេចប្រធាន CAMSOC បារម្ភជាងគេរួចរាល់សម្រាប់ស៊ីហ្គេម

បានផុស

២ years មុន

នៅ

ថ្ងៃចន្ទ ១៧ មេសា ២០២៣

ដោយ

ទីលានបាល់ទាត់ក្នុងពហុកីឡដ្ឋានជាតិ (អូឡាំពិក) ត្រូវបានជួសជុលរួចរាល់ជាស្ថាពរហើយសម្រាប់រៀបចំការប្រកួតកីឡាស៊ីហ្គេម លើកទី៣២ ដែលនឹងចូលមកដល់នាប៉ុន្មានថ្ងៃខាងមុខនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កាលពីថ្ងៃទី៦ ខែមេសា សម្តេចពិជ័យសេនា ទៀ បាញ់ ឧបនាយករដ្ឋមន្ត្រី រដ្ឋមន្ត្រីក្រសួងការពារជាតិ និងជាប្រធានគណៈកម្មាធិការជាតិរៀបចំការប្រកួតកីឡាស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ បានអញ្ជើញទៅត្រួតពិនិត្យទីលានទាំង៨ប្រភេទកីឡានៅក្នុងពហុកីឡដ្ឋានជាតិដែលត្រៀមរៀបចំការប្រកួតកីឡាស៊ីហ្គេម។

ក្នុងឱកាសនោះ សម្តេចពិជ័យសេនា ទៀ បាញ់ មានប្រសាសន៍ថា ទីលានរៀបចំការប្រកួតបាល់ទាត់នៅពហុកីឡដ្ឋានជាតិគឺជាទីលានដែលគួរឲ្យព្រួយបារម្ភជាងគេ ដោយសាររៀបចំដាំស្មៅធមម្មជាតិឡើងវិញ និងដាក់កៅអីជ័រអង្គុយជុំវិញ។ ការដាំស្មៅកៀកនឹងពេលវេលាស៊ីហ្គេម ដូច្នេះមានការព្រួយបារម្ភខ្លាចស្មៅដុះមិនបានល្អដូចការគ្រោងទុក។ ទោះបីជាយ៉ាងណា ពេលសម្តេចចុះទៅត្រួតពិនិត្យផ្ទាល់ឃើញថា ក្តីបារម្ភលែងមានទៀត ខណៈស្មៅដុះបានល្អ ហើយហេដ្ឋារចនាសម្ព័ន្ធនានាក៏រួចរាល់។

«ជារួមយើងមានភាពកក់ក្តៅជុំវិញទីលានកីឡាទាំង៨នៅក្នុងបរិវេណអូឡាំពិក។ ក្នុងនោះយើងក៏បានចូលពិនិត្យមើលទាំងទីលានហ្វឹកហាត់ថែមទៀត។ ឃើញថា ការងារនេះយើងបានដំណើរការល្អ។ នៅសល់តិចតូចប៉ុណ្ណោះ ស្របពេលក្រុមជំនាញនីមួយៗចូលតុបតែងឲ្យបានស្អាត»។ សម្តេចពិជ័យសេនាបានបញ្ជាក់។

កីឡាបាល់ទាត់ផ្នែកបុរស សម្រាប់ពូល A ដែលមានម្ចាស់ផ្ទះកម្ពុជានឹងរៀបចំការប្រកួតនៅស្តាតអូឡាំពិក ចាប់ពីថ្ងៃទី២៩ ខែមេសានេះទៅ ខណៈពូល B រៀបចំការប្រកួតនៅកីឡដ្ឋានព្រីនស៍។

កីឡាបាល់ទាត់ស្ថិតក្នុងចំណោមកីឡា៨ប្រភេទនៃកីឡាស៊ីហ្គេមដែលត្រូវប្រកួតនៅបរិវេណពហុកីឡដ្ឋានជាតិមាន បាល់ទឹក កាយសម្ព័ន្ធ ប៉េតង់ សីប៉ាតាក្រ បាល់ទះ លើកទម្ងន់ សូហ្វយតិន្នីស និងកីឡារាំ៕