អនុប្រធានគណៈកម្មាធិការអូឡាំពិកថៃ សរសើរ​​ទីលាន​កីឡា​កម្ពុជា ប្រសើរជាងថៃ

អនុប្រធានគណៈកម្មាធិការជាតិ​អូឡាំពិកថៃ និងជាប្រធានប្រតិបត្តិសហព័ន្ធកីឡា​អាស៊ីអាគ្នេយ៍ លោក​ Dato Seri Chaiyapak Siriwat ​បាន​សរសើរ​ទីលានប្រកួត​កីឡា​របស់កម្ពុជា មានភាពប្រសើរជាងប្រទេសថៃ។

ក្នុងកិច្ចសម្ភាសន៍ក្រោយបញ្ចប់ពិធីរត់ភ្លើងគប់កីឡាស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ នៅទីក្រុងបាងកក កាលពីល្ងាចថ្ងៃទី១៧ ខែមេសា ឆ្នាំ២០២៣ ម្សិលមិញ លោក Siriwat បានសម្ដែងក្ដី​រីករាយ ដែលមានការរៀបចំពិធីរត់ភ្លើងគប់ឆ្លងពីប្រទេសមួយទៅប្រទេសមួយបែប។ នេះជាការជម្រុញទឹកចិត្តប្រជាជនឱ្យចាប់អារម្មណ៍លើ​ព្រឹត្តិការណ៍ស៊ីហ្គេម លើកទី៣២ និងអាស៊ានប៉ារ៉ាហ្គេម លើកទី១២ ឆ្នាំ២០២៣ នៅកម្ពុជា កាន់តែខ្លាំង។

លោក​បា​ន​លើក​ឡើងថា ៖«យើងមានប្រតិភូប្រមាណ ១៨៥០នាក់ ដែលជាចំនួនដ៏ច្រើន ប៉ុន្តែជាមួយឪពុកម្ដាយរបស់ពួកគេទៀតអាចនិយាយបានថាមានដល់ទៅជាង ៣០០០នាក់ ដែលនឹងទៅលេងកម្ពុជា។ យើងក៏បានប្រាប់ពួកគេថា ទីនោះដំណើរការដល់ណាហើយ មានភាពទំនើបកម្មបែបណាហើយ។ ឥឡូវ​នេះ​ មានទីតាំងប្រកួត​ប្រសើរជាងប្រទេសថៃ។ ជាពិសេសគឺទីលានកីឡាលើទឹក (ទីលានកីឡាលើទឹកនៃពហុកីឡដ្ឋានជាតិមរតកតេជោ) ដូច្នេះ​​ឥឡូវ​នេះ យើងកំពុងព្យាយាមតាមពីក្រោយ។ កម្ពុជា​មានទាំងទីលានកីឡាហុកគី។ នេះគឺជាការចាប់ផ្ដើមដ៏ល្អសម្រាប់កម្ពុជា»។

លោក Dato’ Seri Chaiyapak Siriwat បន្ត​ថា ៖«ខ្ញុំគិតថា ប្រជាជនថៃក៏រំភើបសម្រាប់ស៊ីហ្គេមនៅកម្ពុជា ពីព្រោះវាជាលើកដំបូង ហើយ​នៅជិតយើង។ ពិតជាកៀកនឹងប្រទេសថៃ ហើយកម្ពុជាមិនដែលរៀបចំព្រឹត្តិការណ៍នេះពីមុនមកទេ អ៊ីចឹងរយៈពេល ៦៤ឆ្នាំដែលអ្នកបានរង់ចាំវាពិតជាយូរ។ ខ្ញុំអរគុណដល់រាជរដ្ឋាភិបាល​កម្ពុជា​ខ្លាំងមែនទែន។ អរគុណ​ឯកឧត្តមដែលមានវត្តមាននៅទីនេះ (វត្តមានឯកឧត្ត ហោ សារុន)។ យើងដឹងថា យើងនឹងរៀបចំពិធីរត់ភ្លើងគប់មុនមីយ៉ាន់ម៉ា និងឡាវ ដូច្នេះពិធីនេះមានអត្ថន័យខ្លាំងណាស់សម្រាប់យើង។ អ៊ីចឹងហើយប្រសិនបើអ្នកចង់ជម្រុញអារម្មណ៍អ្នកទស្សនាដើម្បីទៅចូលរួមព្រឹត្តិការណ៍ស៊ីហ្គេម នៅកម្ពុជា»។

គួររម្លឹក​​ថា ថៃ បានដាក់គោលដៅដើម្បីប្រជែងយកមេដាយមាស ១៦៤គ្រឿងពីការប្រកួតកីឡាស៊ីហ្គេម លើកទី៣២ ឆ្នាំ២០២៣ នៅកម្ពុជា ដែលនឹងចូលមកដល់នាប៉ុន្មានសប្ដាហ៍ខាងមុខនេះ៕

អត្ថបទ៖ មន្នីរ័ត្ន