កំពុងជោគជ័យស្រាប់ Man City ដាក់ផែនការពង្រីកកីឡដ្ឋាន Etihad ដល់​៦ម៉ឺន​កៅអី

ក្រុមការពារតំណែងជើងឯក Premier League រដូវកាល២០២១-២០២២ Manchester City កំពុងដាក់ផែនការបង្កើនចំនួនផ្ទុកទស្សនិកជន​នៅ​កីឡដ្ឋាន Etihad នាពេលបច្ចុប្បន្ននេះ ពីចំនួន ៥៣,៥០០ ទៅ ៦០,០០០។ 

គម្រោងពង្រីកនេះគឺនៅផ្នែកខាងជើង​កីឡដ្ឋាន ដែលជាផ្នែកមួយ​ត្រូវ​ធ្វើឱ្យប្រសើរឡើង​រួមទាំងនៅក្នុង និងជុំវិញកីឡដ្ឋាន រួមទាំងតំបន់អ្នកគាំទ្រ ដែលមានសណ្ឋាគារ ចំនួន ៤០០គ្រែ និងសារមន្ទីរថ្មីមួយទៀតផងដែរ។

លោក Danny Wilson នាយកគ្រប់គ្រង​ក្លិប Manchester City បាននិយាយនៅក្នុងសេចក្តីថ្លែងការណ៍មួយថា ៖«ក្នុងរយៈពេលជាច្រើនខែ យើងបាននិងកំពុងបង្កើតគំនិត និងការរចនាសម្រាប់បទពិសោធ​អ្នកគាំទ្រដ៏ល្អបំផុតនៅក្នុងលំដាប់ខ្ពស់។ ការកម្សាន្តពេញមួយឆ្នាំ និងកន្លែងកម្សាន្តនៅកីឡដ្ឋាន Etihad ហើយមានសេចក្តីសោមនស្សរីករាយដែលបានដាក់សំណើសុំផែនការទៅកាន់ក្រុមប្រឹក្សា Manchester City»។

កីឡដ្ឋានរបស់ Man City ដែលដើមឡើយត្រូវបានសាងសង់ឡើង​សម្រាប់​ធ្វើជាម្ចាស់ផ្ទះការប្រកួតព្រឹត្តិការណ៍កីឡា Commonwealth Games ឆ្នាំ២០០២។ បច្ចុប្បន្ន​​កីឡដ្ឋាន​នេះ​​អាច​ផ្ទុកធំជាងគេលំដាប់ទី៥ ទាក់ទងនឹងសមត្ថភាពផ្ទុកទស្សនកជននៅក្នុង Premier League ដោយមាន Manchester United, Tottenham Hotspur, Arsenal និង West Ham United ធំជាង។

City និយាយថា ការអភិវឌ្ឍ​ដែលបានស្នើឡើងតំណាងឱ្យការវិនិយោគ​ដែល​មាន​ទឹក​ប្រាក់ជាង ៣០០លានផោន (៣៧២.៩៦លានដុល្លារ) ទៅកាន់ទីក្រុង Manchester ភាគខាងកើត ដែលអាចបង្កើតការងារថ្មីចំនួន ២,៦០០សម្រាប់ប្រជាជនក្នុងតំបន់។ ចំពោះការងារកែសម្រួលត្រូវចំណាយពេល ៣ឆ្នាំ​ទើប​រួច​រាល់៕

ប្រែសម្រួល៖ មន្នីរ័ត្ន
ប្រភព៖ reuters.com