កីឡា

ដង្ហែព្រះអគ្គិជ័យកីឡាឆ្លងខេត្ត១១នេះទើបចូលដល់ពិធីបើកស៊ីហ្គេមថ្ងៃទី៥ឧសភា

បានផុស

២ years មុន

នៅ

ថ្ងៃអង្គារ ២៥ មេសា ២០២៣

ដោយ

ព្រះអគ្គិជ័យកីឡា និងភ្លើងគប់កីឡាស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ បានដង្ហែទៅដល់ឡាវដែលជាប្រទេសចុងក្រោយហើយ បន្ទាប់ពីដង្ហែឆ្លងកាត់ប្រទេសអាស៊ាន៩រួចរាល់រាល់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ព្រះអគ្គិជ័យកីឡា និងភ្លើងគប់ស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ នឹងត្រូវដង្ហែឆ្លងកាត់ព្រំដែនឡាវ-កម្ពុជាចូលមកទឹកដីខេត្តស្ទឹងត្រែង និងបន្តឆ្លងកាត់ខេត្តក្រចេះ ត្បូងឃ្មុំ និងកណ្តាល មុនពេលដង្ហែតាមបណ្តាខេត្តជុំវិញបឹងទន្លេសាប រួចចូលមករាជធានីភ្នំពេញ ហើយចូលពហុកីឡដ្ឋានជាតិមរតកតេជោ នៅថ្ងៃទី៥ ខែឧសភា ដែលជាពេលវេលាពិធីបើកជាផ្លូវការ។

ខេត្តស្ទឹងត្រែង

តាមការគ្រោងទុក ព្រះអគ្គិជ័យកីឡាចូលមកខេត្តស្ទឹងត្រែងតាមច្រកអន្តរជាតិត្រពាំងក្រៀល-ណងណុកឃៀន នៅម៉ោង១១:៣០នាទីព្រឹក ថ្ងៃទី២៧ ខែមេសានេះ ដោយមានពិធីស្វាគមន៍ ពិធីព្រះសង្ឃជយោត្តោ សុន្ទរកថារបស់អភិបាលខេត្ត តំណាង CAMSOC។ ម៉ោង២រសៀលដង្ហែមកកាន់ទីរួមខេត្តរហូតដល់ម៉ោង៤រសៀល។ វេលាម៉ោង៦ព្រឹក នៅថ្ងៃទី២៨ ខែមេសា បន្តពិធីដង្ហែឆ្ពោះមកខេត្តក្រចេះ។

ខេត្តក្រចេះ

ព្រឹកម៉ោង៨:៣០នាទីព្រឹក ពិធីដង្ហែគ្រោងមកដល់ស្រុកសំបូរ និងដល់ម៉ោង១០ព្រឹកមកដល់ទីរួមខេត្តក្រចេះដោយមានពិធីទទួលស្វាគមន៍ពីថ្នាក់ដឹកនាំខេត្ត។ វេលាម៉ោង១១ព្រឹកត្រូវដង្ហែបន្តមកខេត្តត្បូងឃ្មុំ។

ខេត្តត្បូងឃ្មុំ

ម៉ោង១១ព្រឹកថ្ងៃទី២៨ ខែមេសា ពិធីដង្ហែចូលមកដល់ស្រុកតំបែរ ខេត្តត្បូងឃ្មុំដោយមានពិធីទទួលស្វាគមន៍ និងម៉ោង១២ថ្ងៃត្រង់រៀបចំពិធីនៅមុខសាលាខេត្តត្បូងឃ្មុំ។ វេលាម៉ោង២:៣០នាទីរសៀលដង្ហែមកកាន់ស្ពានគីហ្សូណា ព្រំប្រទល់ខេត្តត្បូងឃ្មុំ-កំពង់ចាម។

ខេត្តកំពង់ចាម

ម៉ោង២:៣០នាទីរសៀល ថ្ងៃទី២៨ ខែមេសា ពិធីដង្ហែមកដល់សាលាខេត្តកំពង់ចាម និងមានរៀបចំពិធីទទួលស្វាគមន៍ដោយថ្នាក់ដឹកនាំខេត្ត និងបន្តដង្ហែឆ្លងកាត់ផ្សារព្រៃទទឹង ស្គន់ ផ្អាវ ភ្នំដិល រហូតដល់ស្រុកមុខកំពូល ខេត្តកណ្តាលប្រហែលជាម៉ោង៥ល្ងាច។

ខេត្តកណ្តាល

វេលាម៉ោង៥ល្ងាច ថ្ងៃទី២៨ ពិធីដង្ហែមានរៀបចំទទួលស្វាគមន៍នៅស្រុកមុខកំពូលដើម្បីដង្ហែឆ្លងកាត់ទីប្រជុំជនជាច្រើនដូចជា ផ្សារកំពង់ប្រាសាទ រហូតដល់ផ្សារព្រែកញ្ជាញ ស្ពានទី១២ ដែលជាព្រំប្រទល់ខេត្តកណ្តាល-រាជធានីភ្នំពេញ ប្រហែលជាម៉ោង៦ល្ងាច។

ដង្ហែតាមខេត្តជុំវិញបឹងទន្លេសាប

ខេត្តកំពង់ឆ្នាំង

ម៉ោង៧ព្រឹក ថ្ងៃទី២៩ ខែមេសា រៀបចំពិធីនៅវិមានឯករាជ្យ ឆ្ពោះទៅវត្តភ្នំដើម្បីដង្ហែចេញរាជធានីភ្នំពេញទៅខេត្តកំពង់ឆ្នាំង និងមានពិធីដង្ហែក៏ដូចជាទទួលស្វាគមន៍ជាច្រើននៅខេត្តកំពង់ឆ្នាំងរហូតដល់ពេលល្ងាច។

ខេត្តពោធិ៍សាត់

ម៉ោង៧ព្រឹក ថ្ងៃទី៣០ ខែមេសា ដង្ហែចេញពីខេត្តកំពង់ឆ្នាំងឆ្ពោះទៅខេត្តពោធិ៍សាត់ដែលនៅទីនោះនឹងមានពិធីដង្ហែ និងទទួលស្វាគមន៍រហូតដល់ម៉ោងប្រហែលជា៣រសៀល។

ខេត្តបាត់ដំបង

ម៉ោង៦ព្រឹក ថ្ងៃទី១ ខែឧសភា ដង្ហែព្រះអគ្គិជ័យកីឡាចេញពីខេត្តពិធិ៍សាត់ឆ្ពោះទៅខេត្តបាត់ដំបង។ វេលាម៉ោង៧ព្រឹកដល់សាលាស្រុកសង្កែ និងបន្តរៀបចំពិធីដង្ហែ និងស្វាគមន៍ជាច្រើនរហូតដល់ល្ងាច។

ខេត្តបន្ទាយមានជ័យ

វេលាម៉ោង៦ព្រឹក ថ្ងៃទី២ ខែឧសភា ដង្ហែព្រះអគ្គិជ័យកីឡាចេញពីខេត្តបាត់ដំបងឆ្ពោះទៅខេត្តបន្ទាយមានជ័យ។ ម៉ោង៧ព្រឹកដល់សាលាខេត្តបន្ទាយមានជ័យ និងបន្តរៀបចំពិធីទទួលស្វាគមន៍ និងដង្ហែរហូតដល់ពេលល្ងាច។

ខេត្តសៀមរាប

ម៉ោង៦ព្រឹក ថ្ងៃទី៣ ខែឧសភា ពិធីដង្ហែព្រះអគ្គិជ័យកីឡាចេញពីខេត្តបន្ទាយមានជ័យឆ្ពោះទៅខេត្តសៀមរាប។ ម៉ោង៧ព្រឹកដល់ព្រំប្រទល់ខេត្តបន្ទាយមានជ័យ-សៀមរាប ព្រមទាំងបន្តរៀបចំពិធីទទួល និងដង្ហែក្នុងខេត្តសៀមរាបរហូតពេលល្ងាច។

ខេត្តកំពង់ធំ

ម៉ោង៦ព្រឹក ថ្ងៃទី៤ ខែឧសភា ដង្ហែព្រះអគ្គិជ័យកីឡាចេញពីខេត្តសៀមរាបតាមផ្លូវជាតិលេខ៦ឆ្ពោះមកខេត្តកំពង់ធំ។ ប្រហែលជាម៉ោង៧ព្រឹកដល់ព្រំប្រទល់ខេត្តសៀមរាប-កំពង់ធំ និងបន្តដង្ហែមកដល់ទីរួមខេត្តកំពង់ធំដោយមានពិធីទទួលស្វាគមន៍ និងដង្ហែក្នុងទីរួមខេត្តរហូតដល់ល្ងាច។

ខេត្តកំពង់ចាម

ម៉ោង៦ព្រឹក ថ្ងៃទី៥ ខែឧសភា ដង្ហែព្រះអគ្គិជ័យកីឡាចេញពីខេត្តកំពង់ធំឆ្ពោះមកខេត្តកំពង់ចាមរហូតដល់ទីប្រជុំស្គន់ និងបន្តមករាជធានីភ្នំពេញតាមផ្លូវជាតិលេខ៦។

រាជធានីភ្នំពេញ

វេលាម៉ោង៤រសៀល ពិធីដង្ហែព្រះអគ្គិជ័យកីឡាដល់ស្តុបម៉ាក្រូ និងវិថីឈ្នះឈ្នះ ហើយមានពិធីទទួលស្វាគមន៍ និងដង្ហែតាមវិថីឈ្នះឆ្ពោះចូលទៅពហុកីឡដ្ឋានជាតិមរតកតេជោជាទីកន្លែងរៀបចំពិធីបើកកីឡាស៊ីហ្គេម លើកទី៣២ យប់ថ្ងៃទី៥ ខែឧសភា ឆ្នាំ២០២៣៕

អត្ថបទ៖ វីរបុត្រ
រូបថត៖ វត្តរាជបូណ៍

Related Topics:កីឡាស៊ីហ្គេម ឆ្នាំ២០២៣