កីឡាករវាយកូនបាល់កម្ពុជារំពឹងបានមេដាយនៅក្នុងការប្រកួតស៊ីហ្គេម

កីឡាករ កីឡាការិនីជម្រើសជាតិកម្ពុជាផ្នែកវាយកូនបាល់ (Tennis) បានរំពឹងថា នឹងទទួលបានមេដាយពីការប្រកួតស៊ីហ្គេមលើកទី ៣២ ក្នុងនាមកម្ពុជាជាម្ចាស់ផ្ទះ ខណៈពួកគេបានត្រៀមខ្លួន និងហ្វឹកហាត់យ៉ាងល្អ។

ថ្លែងប្រាប់អ្នកព័ត៌មាននៅលើទីលានហ្វឹកហាត់ក្នុងខេត្តសៀមរាបនៅល្ងាចថ្ងៃទី ២៨ ខែមេសា ឆ្នាំ២០២៣នេះ កីឡាករ ប៊ុន កេននី បានឲ្យដឹងថា តាមការសង្កេតរបស់លោក ការហ្វឹកហាត់ និងការតាំងចិត្តរបស់ក្រុមជម្រើសជាតិកម្ពុជា មានភាពប្រហាក់ប្រហែលជាមួយក្រុមកីឡាករផ្សេងៗ មិនមានក្រុមណាមានសមត្ថភាពលើសពីក្រុមកម្ពុជាទេ។

ចំណែកកីឡាការិនី ឡៅ ពេជ្ររស្មី ក៏បានអះអាងដែរថា ការប្រកួតនេះពិតជាសំខាន់ណាស់ ហើយនាង និងក្រុមបានត្រៀមខ្លួនរួចជាស្រេចនៅក្នុងការស្វែងរកជ័យជំនះជូនជាតិ។ កីឡាករ កីឡាការិនីដទៃទៀត សុទ្ធតែបានអះអាងដូចគ្នាថា ពួកគេពិតជាបានត្រៀមខ្លួនជាស្រេចក្នុងការដណ្តើមមេដៃជូនជាតិ។

អគ្គលេខាធិការសហព័ន្ធកីឡាវាយកូនបាល់កម្ពុជា លោក ទេព រិទ្ធីវិទ្ធ បានឲ្យដឹងថា លោកតែងតែប្រាប់ដល់កីឡាករ ទាំងអស់ ត្រូវតាំងស្មារតីឲ្យបានល្អ តាំងអារម្មណ៍១០០ភាគរយលើការប្រកួត និង២០០ភាគរយលើទង់ជាតិ លើប្រទេសជាតិយើង។ លោកបានបញ្ជាក់ថា កម្មវិធីបោះជំរុំហ្វឹកហាត់ នៅខេត្តសៀមរាបខាងលើ មានរយៈពេល ៣ថ្ងៃ ចាប់ពីថ្ងៃទី ២៦-២៨ ខែមេសានេះ។

ក្រៅពីការហ្វឹកហាត់ មន្ដ្រីសហព័ន្ធរូបនេះក៏បាននាំកីឡាករ-កីឡាការិនីទាំងអស់ ចូលប្រោះព្រំសុំក្តីសុខ និងជោគជ័យ សម្រាប់ការប្រកួតកីឡាស៊ីហ្គេមលើកទី៣២ ដែលគ្រោងប្រារព្ធពិធីបើកនាថ្ងៃទី ០៥ ខែឧសភា ឆ្នាំ២០២៣ ខាងមុខនេះ។

ម៉្យាងទៀត ការជ្រើសរើសកន្លែងហ្វឹកហាត់នៅខេត្តសៀមរាបនេះ ដោយទីតាំងមានលក្ខណៈត្រូវតាមស្តង់ដាអន្តរជាតិ ដូចទីតាំងសម្រាប់ប្រកួតស៊ីហ្គេមនៅពហុកីឡាដ្ឋានជាតិមរតកតេជោដែរ។

លោក ទេព រិទ្ធីវិទ្ធ បានបញ្ជាក់ថា ការសម្រេចជ្រើសរើសយកខេត្តសៀមរាប សម្រាប់ការបោះជំរុំហ្វឹកហាត់នេះ ដោយសារ​ចង់ឲ្យកីឡាករបានស្គាល់ប្រវត្តិសាស្ត្ររបស់កម្ពុជាដែលមានដូនតាដ៏ខ្លាំងពូកែ និងផ្តល់ឱកាសឲ្យកីឡាករកីឡាការិនីទាំងអស់បានផ្លាស់ប្តូរបរិយាកាសក្នុងការហ្វឹកហាត់ពីទីក្រុង មកខេត្ត ដោយទទួលបានបរិស្ថានល្អ មានខ្យល់បរិសុទ្ធទៀតផង។

ក្នុងនោះលោកក៏មានសង្ឃឹមជឿជាក់ចំពោះកីឡាករ កីឡាការិនី វាយកូនបាល់កម្ពុជា និងទទួលបានជោគជ័យជូនជាតិមាតុភូមិរបស់ខ្លួន។

បើតាមមន្ត្រីរូបនេះ កីឡាករ កីឡាការិនី គឺសុទ្ធសឹងមាន ឈាមជ័រជាកូនខ្មែរ ទោះបីគាត់កើតនៅក្រៅប្រទេសពិតមែន តែឪពុម្តាយជាខ្មែរ និងមានកីឡាការិនីអ្នកខេត្តសៀមរាប ក៏បានធ្លាប់ចេញទៅប្រកួតនៅក្រៅប្រទេសផងដែរ ហើយពួកគាត់មានមនសិការចំពោះប្រទេសខ្មែរ ក្នុងការលើកកម្ពស់វិស័យកីឡាវាយកូនបាល់កម្ពុជា ឲ្យមានភាពលី្បល្បាញនៅលើពិភពលោក ក្នុងការលើកកិត្តិយសប្រទេសជាតិខ្លួនផងដែរ៕

អត្ថបទ៖ គឿនវេត