កីឡា

កើតនៅបរទេស កីឡាករជម្រើសជាតិវាយកូនបាល់កម្ពុជា រំពឹងដណ្តើមមេដាយជូនជាតិ

បានផុស

២ years មុន

នៅ

ថ្ងៃសៅរ៍ ២៩ មេសា ២០២៣

ដោយ

កីឡាករ កីឡាការិនី ជម្រើសជាតិកម្ពុជា ផ្នែកវាយកូនបាល់ (Tennis) បានរំពឹងថា នឹងទទួលបានមេដាយពីការប្រកួតស៊ីហ្គេមលើកទី៣២ ក្នុងនាមកម្ពុជាជាម្ចាស់ផ្ទះ ពីព្រោះពួកគេបានត្រៀមខ្លួន និងហ្វឹកហាត់បានយ៉ាងល្អ។

ថ្លែងប្រាប់អ្នកព័ត៌មាននៅលើទីលានហ្វឹកហាត់ក្នុងខេត្តសៀមរាប កាលពីល្ងាចថ្ងៃទី២៨ ខែមេសា ឆ្នាំ២០២៣ នេះ កីឡាករ ប៊ុន កេននី បានឲ្យដឹងថា តាមការសង្កេតរបស់លោក ការហ្វឹកហាត់និងការតាំងចិត្តរបស់ក្រុមជម្រើសជាតិកម្ពុជា មានភាពប្រហាក់ប្រហែលនឹងក្រុមកីឡាករផ្សេងៗ ហើយលោកថាមិនមានក្រុមណាមានសមត្ថភាពលើសពីក្រុមកម្ពុជានោះទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ចំណែកកីឡាការិនី ឡៅ ពេជ្ររស្មី ក៏បានអះអាងដែរថា ការប្រកួតនេះពិតជាសំខាន់ណាស់ ហើយក្រុមបានត្រៀមខ្លួនរួចជាស្រេចនៅក្នុងការស្វែងរកជ័យជំនះជូនជាតិ មាតុភូមិខ្លួន ។

អគ្គលេខាធិការសហព័ន្ធកីឡាវាយកូនបាល់កម្ពុជា លោក ទេព រិទ្ធីវិទ្ធ បានឲ្យដឹងដែរថា មិនថាការប្រកួតលើកណានោះទេ លោកតែងតែប្រាប់ដល់កីឡាករ កីឡាការិនីទាំងអស់ ត្រូវតាំងស្មារតីឲ្យបានល្អ កុំបែកអារម្មណ៍ ត្រូវតាំងអារម្មណ៍១០០ភាគរយលើការប្រកួត និង២០០ភាគរយលើទង់ជាតិប្រទេសជាតិ។

លោកបានបញ្ជាក់ថា កម្មវិធីបោះជំរុំហ្វឹកហាត់នៅខេត្តសៀមរាប មានរយៈពេល ៣ថ្ងៃ ចាប់ពីថ្ងៃទី២៦-២៨ ខែមេសានេះ។ ក្រៅពីការហ្វឹកហាត់ មន្ដ្រីសហព័ន្ធ ក៏បាននាំកីឡាករ-កីឡាការិនីទាំងអស់ ចូលប្រោះព្រំសុំក្តីសុខ និងជោគជ័យ សម្រាប់ការប្រកួតកីឡាស៊ីហ្គេម លើកទី៣២ ដែលគ្រោងប្រារព្ធពិធីបើកនាថ្ងៃទី០៥ ខែឧសភា ឆ្នាំ២០២៣ ខាងមុខផងដែរ។ ម៉្យាងទៀត ការជ្រើសរើសកន្លែងហ្វឹកហាត់នៅខេត្តសៀមរាបនេះ ដោយទីតាំងមានលក្ខណៈត្រូវតាមស្តង់ដាអន្តរជាតិ ដូចទីតាំងសម្រាប់ប្រកួតស៊ីហ្គេម នៅពហុកីឡាដ្ឋានជាតិមរតកតេជោអញ្ចឹងផងដែរ។

លោក ទេព រិទ្ធីវិទ្ធ បានគូសបញ្ជាក់ថា ការសម្រេចជ្រើសរើសយកខេត្តសៀមរាប សម្រាប់ការបោះជំរុំហ្វឹកហាត់នេះ ដោយសារចង់ឲ្យកីឡាករបានស្គាល់ប្រវត្តិសាស្ត្ររបស់កម្ពុជាដែលមានដូនតាដ៏ខ្លាំងពូកែ និង ម្យ៉ាងក៏បានផ្តល់ឱកាសឲ្យកីឡាករកីឡាការិនីទាំងអស់បានផ្លាស់ប្តូរបរិយាកាសក្នុងការហ្វឹកហាត់ ពីទីក្រុងមកខេត្ត ដោយទទួលបានបរិស្ថានល្អ មានខ្យល់បរិសុទ្ធទៀតផង។ ក្នុងនោះលោកក៏មានសង្ឃឹមជឿជាក់ចំពោះកីឡាករ កីឡាការិនី វាយកូនបាល់កម្ពុជា និងទទួលបានជោគជ័យជូនជាតិមាតុភូមិរបស់ខ្លួន។

លោកក៏បានបញ្ជាក់ឲ្យដឹងផងដែរថា កីឡាករ កីឡាការិនី គឺសុទ្ធសឹងមានឈាមជ័រជាកូនខ្មែរ ទោះបីគាត់កើតនៅក្រៅប្រទេសពិតមែន តែឪពុកម្តាយជាខ្មែរ និងមានកីឡាការិនីអ្នកខេត្តសៀមរាប ក៏បានធ្លាប់ចេញទៅប្រកួតនៅក្រៅប្រទេសផងដែរ ហើយពួកគាត់មានមនសិក្កាចំពោះប្រទេសខ្មែរ ក្នុងការលើកកម្ពស់វិស័យកីឡាវាយកូនបាល់កម្ពុជា ឲ្យមានភាពលី្បល្បាញនៅលើពិភពលោក ក្នុងការលើកកិត្តិយសប្រទេសជាតិខ្លួនផងដែរ៕

អត្ថបទ៖ វេត