កីឡាការិនីវៀតណាម ទទួលបានមេដាយមាស លើវិញ្ញាសាកង់គួកផ្នែកនារី ចម្ងាយជាង១០០គីឡូម៉ែត្រ

សៀមរាប៖ ការប្រកួតកីឡាស៊ីហ្គេមលើកទី៣២ លើវិញ្ញាសាកង់គួកនារី ថ្ងៃទី​៣ ដែលមានចម្ងាយផ្លូវ ១០០,៤គីឡូម៉ែត្រ នៅតំបន់ឧទ្យានប្រាសាទអង្គរវត្ត ប្រាសាទបាយ័ន និងតំបន់វង់ធំ ក្នុងខេត្តសៀមរាប  ដែលបានចាប់ផ្ដើមដំណើរការ នៅវេលាម៉ោង៩ ព្រឹកថ្ងៃទី១៣ ខែឧសភា ឆ្នាំ២០២៣នេះ បានបញ្ចប់ដោយជោគជ័យហើយ ខណៈដែលការប្រកួតកង់​គួកនាពេលនេះ គឺ មានកីឡាការិនីចូលរួម ចំនួន២៩រូប មកពីប្រទេសចំនួន៧ រួមមាន ៖ ៖ ប្រទេសកម្ពុជា , វៀតណាម , ថៃ , ម៉ាឡេស៊ី , ហ្វីលីពីន , ឥណ្ឌូនេស៊ី និង ប្រទេសសឹង្ហបុរី។

ក្រោយពីការប្រកួតដ៏ស្វិតស្វាញអស់ជាច្រើនម៉ោងរួចមក ជាលទ្ធផលគឺ កីឡាការិនីមកពីប្រទេសវៀតណាម ទទួលជ័យលាភី មេដាយមាស , កីឡាការិនីមកពីប្រទេសថៃ ទទួលជ័យលាភី មេដាយប្រាក់ និងកីឡាការិនីមក​ពីប្រទេស​ម៉ាឡេស៊ីទទួលជ័យលាភី មេដាយសំរិទ្ធ ។

សូមបញ្ជាក់ថា ការប្រកួតកីឡាស៊ីហ្គេមលើវិញ្ញាកង់គួកនេះ ធ្វើឡើងមានរយ:ពេលបីថ្ងៃចាប់ពីថ្ងៃទី១១ ដល់ថ្ងៃទី១៣ ខែឧសភា ឆ្នាំ២០២៣ ដោយនៅថ្ងៃប្រកួតទីបី គឺជាថ្ងៃបញ្ចប់ការប្រកួតប្រភេទកីឡាទោចក្រយាន និងប្រភេទកីឡា​អត្តពលកម្ម នៃព្រឹត្តិការណ៍ស៊ីហ្គេមលើកទី៣២ នៅខេត្តសៀមរាប ចាប់ពីថ្ងៃទី៦ ដល់ថ្ងៃទី១៣ ខែឧសភា ឆ្នាំ២០២៣ ដែលបានប្រព្រឹត្តឡើងនៅតំបន់ឧទ្យានប្រាសាទអង្គរវត្ត ប្រាសាទបាយ័ន តំបន់វង់ធំ និងនៅតំបន់ឧទ្យាជាតិភ្នំគូលែន ក្នុងស្រុកបន្ទាយស្រី ក្នុងអំឡុងពេលកម្ពុជាធ្វើជាម្ចាស់ផ្ទះ៕

អត្ថបទ៖ គឿន វេត