កីឡា

ម្ចាស់មេដាយមាសស៊ីហ្គេម ឈឿង ល្វៃ សងសឹក Sammy ខែក្រោយ

បានផុស

២ years មុន

នៅ

ថ្ងៃចន្ទ ២៩ ឧសភា ២០២៣

ដោយ

កីឡាករប្រដាល់ឃីកបុកស៊ីងកម្ពុជា ឈឿង ល្វៃ នឹងសងសឹកសត្រូវចាស់ឆ្លងដែនមកពីថៃ Sammy នៅថ្ងៃទី២៦ ខែមិថុនា ឆ្នាំ២០២៣ នៅសង្វៀនទូរទស្សន៍ជាតិកម្ពុជា។

នេះជាលើកទី២ដែលពួកគេជួបគ្នា បន្ទាប់ពីលើកទី១អ្នកលេងគុនខ្មែរបានបរាជ័យក្នុងទឹកទី៣។ ការជួបគ្នាលើកទី១នោះ ការប្រកួតមាន៥ទឹក និងទទួលបានការចាប់អារម្មណ៍យ៉ាងខ្លាំងពីអ្នកមហាជន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅចាំបានថា ឈឿង ល្វៃ បានវាយកែងឲ្យអាជ្ញាកណ្តាលរាប់ Sammy ៨ម្តងក្នុងទឹកទី២ ប៉ុន្តែកីឡាករថៃបានទាត់ជើងក្រោមឲ្យអាជ្ញាកណ្តាលរាប់អ្នកលេងគុនខ្មែរ៨វិញម្តងក្នុងទឹកដដែល។ នៅចុងទឹកអ្នកលេងគុនខ្មែរទាត់កញ្ចង់កឲ្យអាជ្ញាកណ្តាលរាប់កីឡាករថៃ៨លើកទឹកទី២មុនពេលចប់ទឹកទី២។ នៅទឹកទី៣ កីឡាករថៃបានទាត់ឲ្យ ឈឿង ល្វៃ ដើរលែងរួច និងបោះបង់ចោលការប្រកួតតែម្តង។

លទ្ធផលនោះបានធ្វើឲ្យអ្នកគាំទ្រ និងមហាជនមួយចំនួនមិនពេញចិត្ត ព្រមទាំងរិះគន់យ៉ាងខ្លាំងលើការសម្រេចចិត្តរបស់អាជ្ញាកណ្តាល។

ចាប់តាំងពីពេលនោះមក ឈឿង ល្វៃ មិនបានឡើងប្រកួតទៀតទេ ដោយសាររូបគេបានហ្វឹកហាត់ដើម្បីប្រកួតឃីកបុកស៊ីងក្នុងកីឡាស៊ីហ្គេម។ ជាលទ្ធផល រូបគេបានយកឈ្នះកីឡាករថៃនៅវគ្គផ្តាច់ព្រ័ត្រ និងបានឈ្នះមេដាយមាសទម្ងន់៧១គីឡូក្រាម។

ពេលនេះ ឈឿង ល្វៃ បានត្រៀមខ្លួនរួចរាល់ហើយសម្រាប់ការប្រកួតសងសឹកដែលប្រើពេលតែ៣ទឹកប៉ុណ្ណោះ។ ការប្រកួត៣ទឹក អ្នកលេងគុនខ្មែររូបនេះអាចសង្ឃឹមឈ្នះច្រើន ដោយសាររូបគេមានភាពរឹងមាំ និងស៊ុហ្វខ្លាំងភាគច្រើន៣ទឹកដំបូងប៉ុណ្ណោះ។

យ៉ាងណា កីឡាករថៃ Sammy ជាប្រភេទកីឡារឹងមាំ កម្លាំងស៊ុហ្វល្អ និងបច្ចេកទេសល្អ ដូច្នេះពិតជាមិនងាយស្រួលក្នុងការឈ្នះរូបគេឡើយ។ រូបគេធ្លាប់ចាញ់សន្លប់ក្រោមកណ្តាប់ដៃ ព្រំ សំណាង ម្តងកាលមកកម្ពុជាលើកដំបូង ប៉ុន្តែប្រកួតជាមួយកីឡាករកម្ពុជាប៉ុន្មានលើកចុងក្រោយគ្មានកីឡាកររូបណាផ្តួលរូបគេបានឡើយ៕