កីឡា

ខាន់ ចេសា ស្រក់ទឹកភ្នែកពីការឈ្នះមេដាយមាសពិភពលោកជាលើកទី២

បានផុស

២ years មុន

នៅ

ថ្ងៃអង្គារ ៦ មិថុនា ២០២៣

ដោយ

វីរកីឡាការិនីជឺជីស៊ូជម្រើសជាតិកម្ពុជា ខាន់ ចេសា បានរំភើបរហូតស្រក់ទឹកភ្នែក បន្ទាប់ពីបានយកឈ្នះកីឡាការិនីប្រេស៊ីល Thamires Aquino វគ្គផ្តាច់ព្រ័ត្រ ដើម្បីឈ្នះមេដាយមាសពិភពលោក ក្នុងប្រភេទទម្ងន់ Light-Feather (៥៣.៥គីឡូក្រាម) ក្នុងការប្រកួតជើងឯកជឺជីតស៊ូពិភពលោកឆ្នាំ២០២៣ (IBJJF World Champion 2023) ចាប់ពីថ្ងៃទី១ដល់ទី៤ ខែមិថុនា នៅសហរដ្ឋអាមេរិក។

ការប្រកួតដែលប្រជុំដោយកីឡាការិនីជឺជីតស៊ូកម្រិតពិភពលោក កីឡាការិនីកម្ពុជា ខាន់ ចេសា ធ្វើបានយ៉ាងល្អនៅវគ្គជម្រុះរហូតដល់វគ្គផ្តាច់ព្រ័ត្រជួបនឹងកីឡាការិនីឆ្នើមរបស់ប្រេស៊ីល Thamires Aquino។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្រាប់ការប្រកួតវគ្គផ្តាច់ព្រ័ត្រពិតជាស្វិតស្វាញខ្លាំងមែនទែនដោយកីឡាការិនីទាំងពីរមានឱកាសឃ្លេ និងស្វែងរកពិន្ទុបានទៅវិញទៅមកដូចគ្នាដោយពិន្ទុស្មើ ៦-៦។ ទោះបីជាយ៉ាងណា នៅវិនាទីចុង ក្រោយ ខាន់ ចេសា មានឱកាសល្អជាងដោយបានចាប់ឱបពីក្រោយ និងឡើងជិះពីលើធ្វើឲ្យកីឡាការិនីប្រេស៊ីលដួលទៅក្តារហើយក៏នាទីអស់តែម្តង។ នៅពេលនោះ អាជ្ញាកណ្តាលបានលើកដៃផ្តល់ឲ្យកីឡាការិនីកម្ពុជា២ពិន្ទុទៀតដើម្បីទទួលបានជ័យជម្នះដោយលទ្ធផល ៨-៦។

ក្រោយចប់ការប្រកួត និងឃើញពិន្ទុរបស់ខ្លួនឈ្នះ ខាន់ ចេសា បានអង្គុយចុះ ហើយបានស្រក់ទឹកភ្នែកដែលកើតចេញពីការរំភើបចំពោះជ័យជម្នះរបស់ខ្លួន។

នេះជាមេដាយមាសពិភពលោកទី២សម្រាប់កីឡាការិនីជឺជីតស៊ូជម្រើសជាតិកម្ពុជា ខាន់ ចេសា ក្នុងកម្រិតពេញវ័យ បន្ទាប់ពីបានឈ្នះមេដាយមាសពិភពលោកលើកទី១តាមរយៈជ័យជម្នះវគ្គផ្តាច់ព្រ័ត្រលើកីឡាការិនីអេស្ប៉ាញ Matthews Martin Naiomi Anaians ក្នុងការប្រកួតកីឡាជឺជីតស៊ូជើងឯកពិភពលោកនៅប្រទេសអារ៉ាប់រួម ឆ្នាំ២០២២។

ការឈ្នះមេដាយមាសជឺជីតស៊ូពិភពលោកកាលឆ្នាំ២០២២ ខាន់ ចេសា ទើបតែទទួលបានប្រាក់រង្វាន់ពីរដ្ឋាភិបាលកម្ពុជានៅពេលមកប្រកួតកីឡាស៊ីហ្គេម លើកទី៣២ ឆ្នាំ២០២៣៕