កីឡា

អគ្គលេខាធិការសហព័ន្ធ៖«ការបង្ហោះសាររបស់ សេរីវ៉ាន់ថង ជាការលេងសើច»

បានផុស

២ years មុន

នៅ

ថ្ងៃចន្ទ ១៩ មិថុនា ២០២៣

ដោយ

កាលពីម្សិលមិញនេះ កីឡាករប្រដាល់គុនខ្មែរ ឈុត សេរីវ៉ាន់ថង បានធ្វើឲ្យអ្នកគាំទ្រចាប់អារម្មណ៍យ៉ាងខ្លាំងតាមរយៈសំណេររបស់ខ្លួនដែលហាក់បង្ហាញចេតនាចង់ឃ្លាតឆ្ងាយពីពិភពប្រដាល់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឈុត សេរីវ៉ាន់ថង បានបង្ហោះសារកាលពីព្រឹកថ្ងៃទី១៨ ខែមិថុនា ឆ្នាំ២០២៣ថា ៖«គ្រប់គ្រាន់ហើយ ចង់រស់ជាខ្លួនឯងតាមបែបធម្មជាតិ មានឬក្រតាមយថាកម្ម អនុស្សាវរីយ៍បន្សល់ទុកឲ្យបងប្អូនត្រឹមហ្នឹងចុះ»។

សារខ្លីនេះបានធ្វើឲ្យអ្នកស្នេហាប្រដាល់គុនខ្មែរចាប់អារម្មណ៍យ៉ាងខ្លាំងដោយយល់ឃើញថា កីឡាករប្រដាល់នៅខេត្តបាត់ដំបងរូបនេះអាចចេញពីប្រដាល់ និងរស់នៅលក្ខណៈឯកជន។

ពាក់ព័ន្ធនឹងខ្លឹមសារនេះ លោក ហេង សុឃន អគ្គលេខាធិការសហព័ន្ធកីឡាប្រដាល់គុនខ្មែរដែលជាអ្នកគ្រប់គ្រងកីឡាករ កីឡាការិនីផ្ទាល់បាននិយាយថា ៖«កីឡាករជារឿងរបស់គាត់។ គាត់ផុសលេងធម្មតា។ គាត់កំពុងតែល្បីអីចឹង គាត់មិនឈប់ទេ។ គ្រាន់តែគាត់និយាយលេង។ គាត់ជាកីឡាករល្បីចង់ឲ្យគេចាប់អារម្មណ៍។ ក្នុងគំនិតគាត់ គាត់មានទៅឈប់អី។ គាត់និយាយលេងឲ្យសប្បាយៗទាំងអស់គ្នា។ ទីពីរគាត់គ្រាន់តែទាក់ទាញអារម្មណ៍អ្នកគាំទ្រ គ្មានអីធំដុំទេ»។

សារព័ត៌មាន«កម្ពុជាថ្មី»បានព្យាយាមទាក់ទងទៅលោក ឈុត សេរី ដែលជាឪពុកបង្កើតរបស់ ឈុត សេរីវ៉ាន់ថង ប៉ុន្តែទូរសព្ទមិនចូល។

ប្រហែលជាមួយឆ្នាំចុងក្រោយនេះ ឈុត សេរីវ៉ាន់ថង ទទួលបានជោគជ័យយ៉ាងខ្លាំងក្នុងអាជីពប្រដាល់របស់ខ្លួន។ រូបគេបានប្រកួតឈ្នះទទួលបានផ្ទះមួយខ្នងនៅខេត្តសៀមរាប។ បន្ទាប់មក រូបគេបានឈ្នះមេដាយមាសគុនខ្មែរក្នុងព្រឹត្តិការណ៍កីឡាស៊ីហ្គេម និងបានឈ្នះខ្សែក្រវាត់មួយគ្រឿងដែលមានប្រាក់រង្វាន់៤០លានរៀល និងខ្សែកមាស២តម្លឹង៕