កីឡា

ពិធីការិនីកំពុងល្បីនៅកម្ពុជា Mara មានប្រវត្តិមិនធម្មតា ធ្លាប់ធ្វើនៅកីឡាអូឡាំពិក

បានផុស

២ years មុន

នៅ

ថ្ងៃអង្គារ ២០ មិថុនា ២០២៣

ដោយ

ពិធីការិនីកីឡា Mara Aquino ដែលកំពុងទទួលបានការចាប់អារម្មណ៍យ៉ាងខ្លាំងនៅប្រទេសកម្ពុជាតាមរយៈព្រឹត្តិការណ៍ប្រកួតកីឡាអេឡិចត្រូនិក Mobile Legends Southeast Asian Cup ២០២៣ (MSC 2023) មានបទពិសោធច្រើនទាំងក្នុងប្រទេស និងក្រៅប្រទេស រហូតដល់កីឡាអូឡាំពិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពិធីការិនីសញ្ជាតិហ្វីលីពីន Mara Aquino បានធ្វើជាពិធីការិនីក្នុងព្រឹត្តិការណ៍ Mobile legend Southeast Asian Cup នៅប្រទេសផ្សេងៗក្នុងរយៈពេលប៉ុន្មានឆ្នាំចុងក្រោយ។ អ្នកគាំទ្រនៅកម្ពុជាបានត្រឹមតែឮសំឡេងអត្ថាធិប្បាយជាភាសាអង់គ្លេសប៉ុណ្ណោះ ប៉ុន្តែមិនដឹងពីប្រវត្តិ ឬរូបរាងកាយរបស់ពិធីការិនីរូបនេះច្បាស់លាស់ឡើយកន្លងមក។

នៅពេលសហព័ន្ធកីឡាអេឡិចត្រូនិកកម្ពុជាសហការជាមួយក្រុមហ៊ុន Moonton បានរៀបចំធ្វើជាម្ចាស់ផ្ទះលើកដំបូងសម្រាប់ការប្រកួតជើងឯក MSC 2023 ក៏មានវត្តមានពិធីការិនីហ្វីលីពីនរូបនេះនៅលើទឹកដីនៃព្រះរាជាណាចក្រកម្ពុជា។ ក្នុងសម្លៀកបំពាក់ប្រពៃណីខ្មែរ Mara Aquino បានធ្វើអត្ថាធិប្បាយដ៏គួរឲ្យទាក់ទាញ និងជាពិសេសស្រែកជាភាសាខ្មែរថា «ហ៊ោមួយ ហ៊ោមួយ»ធ្វើឲ្យអ្នកគាំទ្រខ្មែរចាប់អារម្មណ៍ខ្លាំងមែនទែន។

បើក្រឡេកមើលប្រវត្តិរបស់ពិធីការិនីហ្វីលីពីនរូបនេះពិតជាមិនធម្មតាឡើយពោលគឺធ្លាប់ឆ្លងកាត់ធ្វើក្នុងព្រឹត្តិការណ៍កីឡាធំៗជាច្រើនរហូតដល់កីឡាអូឡាំពិក។ Mara បានចាប់ផ្តើមធ្វើជាអ្នករាយការណ៍ព័ត៌មានឲ្យសមាគមអត្តពលិកជាតិហ្វីលីពីន (NCAA) ពីឆ្នាំ ២០១២-១៤ និងបន្ទាប់មកបានចូលរួមជាមួយសមាគមបាល់បោះហ្វីលីពីន (PBA)។

ក្រោយមកទៀត នាងបានចូលរួមធ្វើជាពិធីការិនីក្នុងព្រឹត្តិការណ៏ NBA ៣លើកពីឆ្នាំ ២០១៣-១៦ និងព្រឹត្តិការណ៍កីឡាបាល់បោះដ៏ល្បីល្បាញលើពិភពលោក FIBA ៣ទល់៣ World Tour នៅប្រទេសកាណាដា និងប្រទេសជប៉ុន។

អ្វីដែលពិសេសបំផុត នៅឆ្នាំ២០២០ Mara Aquino ទទួលបានឱកាសធ្វើជាពិធីការិនីសម្រាប់ការប្រកួតកីឡាបាល់បោះក្នុងព្រឹត្តិការណ៍កីឡាអូឡាំពិករដូវក្តៅ នៅទីក្រុងតូក្យូ ប្រទេសជប៉ុន។

ក្រៅពីអាជីពពិធីការិនី នារីហ្វីលីពីនរូបនេះធ្វើការឲ្យ Sports Center Philippines ដែលជាស្ថាប័នព័ត៌មានដ៏ល្បីរបស់ One Sports ជាបណ្តាញផ្សព្វផ្សាយដ៏ធំបំផុតមួយនៅក្នុងប្រទេសហ្វីលីពីន។ នាងក៏ជាអ្នកឆ្លើយឆ្លងព័ត៌មានរបស់ Sport 5 និង ESPN5 ព្រមទាំងជាសហពិធីការិនីក្នុងកម្មវិធី OnCAM។

នៅនៅឆ្នាំ២០២១ Mara Aquino បានចូលធ្វើជាពិធីការិនីក្នុងព្រឹត្តិការណ៍ប្រកួតកីឡាអេឡិចត្រូនិកលីគអាជីពរបស់ហ្វីលីពីន Mobile Legends Bang Bang Professional League Philippines ដែលជាកន្លែងអភិវឌ្ឍជំនាញកីឡា E-sports កាន់តែល្អ និងទទួលបានការកោតសរសើរយ៉ាងខ្លាំងពីអ្នកគាំទ្រទូទាំងតំបន់អាស៊ានតាមរយៈសមត្ថភាពអធិប្បាយដ៏ទាក់ទាញ និងរូបសម្រស់ដ៏ស្រស់សោភាដែលធ្វើឲ្យនាងទទួលបានប្រជាប្រិយភាពកាន់តែខ្លាំង៕