កីឡា

ព្រះខ័នរាជស្វាយរៀងកម្តៅសាច់ដុំនៅថៃប៉ះក្លិបលីគទី១ និងលីគទី២

បានផុស

២ years មុន

នៅ

ថ្ងៃចន្ទ ២៦ មិថុនា ២០២៣

ដោយ

ក្លិបបាល់ទាត់ព្រះខ័នរាជស្វាយរៀងនឹងធ្វើដំណើរទៅកម្តៅសាច់ដុំពីរប្រកួតនៅប្រទេសថៃដើម្បីត្រៀមខ្លួនឲ្យបានល្អប្រសើរសម្រាប់ខេមបូឌានព្រីមៀរលីគរដូវកាលថ្មី ២០២៣-២៤ ដែលនឹងចាប់ផ្តើមនៅខែសីហា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Pep Muñoz គ្រូបង្គោលថ្មីរបស់ព្រះខ័នរាជស្វាយរៀងបានឲ្យដឹងថា តាមការគ្រោងទុកកូនក្រុមរបស់លោកនឹងធ្វើការប្រកួតមិត្តភាពអន្តរជាតិពីរប្រកួតគឺជាមួយក្លិបមួយមកពីលីគកំពូលរបស់ប្រទេសថៃ និងក្លិបមួយទៀតមកពីលីគលំដាប់ទី២របស់ថៃ។ ការប្រកួតមិត្តភាពអន្តរជាតិនេះផ្តោតសំខាន់លើការអភិវឌ្ឍស្មារតីក្រុម និងការត្រៀមខ្លួនចុងក្រោយសម្រាប់រដូវកាលថ្មី។

លោក Pep Muñoz បាននិយាយថា ៖«មិត្តភាពកម្តៅសាច់ដុំខាងមុខនេះជាពេលវេលាមួយដែលក្រុមរបស់យើងត្រូវស្វែងចិត្តគ្នាឲ្យកាន់តែល្អប្រសើរ។ គោលបំណងនៃការប្រកួតមិត្តភាពនៅថៃគឺដើម្បីអភិវឌ្ឍស្មារតីក្រុម។ យើងនឹងចំណាយពេលវេលានៅជាមួយគ្នា និងមានការប្រកួតមិត្តភាព។ ជាសប្តាហ៍ដែលយើងពង្រឹងក្រុមមុនពេលរដូវកាលថ្មីចូលមកដល់។ នេះជាឱកាសល្អដែលក្រុមត្រូវបង្កើតគំនិតរួមគ្នា»។

«គោលដៅសំខាន់នៃការប្រកួតមិត្តភាពនៅប្រទេសថៃដែលជិតនឹងពេលរដូវកាលថ្មីចូលមកដល់គឺពេលវេលាត្រៀមខ្លួនឲ្យបានល្អទាំងបច្ចេកទេស និងស្មារតីក្រុម។ ការប្រកួតមិត្តភាពនៅថៃនឹងកាន់តែធ្វើឲ្យក្រុមល្អប្រសើរក្នុងការត្រៀមខ្លួន»។ លោកបានបញ្ជាក់។

បុរសញ្ជាតិអេស្ប៉ាញអាយុ៤៣ឆ្នាំ Pep Muñoz កាន់អាជ្ញាប័ណ្ណ UEFA Pro-License រីករាយនឹងអាជីពរបស់ខ្លួនដែលទើបតែចូលខ្លួនដឹកនាំព្រះខ័នរាជស្វាយរៀងបានប្រមាណ២ខែកន្លងមកទៅនេះ។

លោកបានឲ្យដឹងថា លោកសប្បាយចិត្តដែលឃើញកូនក្រុមចាប់បានយ៉ាងលឿននូវជំនាញ និងបច្ចេកទេសថ្មីៗដែលលោកបានផ្តល់ឲ្យ ដូច្នេះការជ្រើសរើសអាជីពមកកម្ពុជាពិតជាពេញចិត្ត។ ជាងនេះទៀតនោះ លោកក៏បានសិក្សាស្វែងយល់ពីរបៀបរស់នៅ និងវប្បធម៌ប្រពៃណីរបស់កម្ពុជាដែរ៕

អត្ថបទ៖ វីរបុត្រ