កីឡា

អ្នកគាំទ្រព្រឹត្តិការណ៍កីឡារាប់លាននាក់ នៅអាស៊ីអាគ្នេយ៍ ប្រើប្រាស់ TikTok អំឡុងស៊ីហ្គេម

បានផុស

២ years មុន

នៅ

ថ្ងៃអង្គារ ៤ កក្កដា ២០២៣

ដោយ

អ្នកគាំទ្រព្រឹត្តិការណ៍កីឡាប្រចាំតំបន់រាប់លាននាក់ បានប្រើប្រាស់ TikTok ជាទម្រង់វីដេអូខ្លីៗ លើទូរស័ព្ទដៃឈានមុខគេ ក្នុងការតាមដានដំណើរការ នៃព្រឹត្តិការណ៍កីឡាស៊ីហ្គេមលើកទី ៣២ និងអាស៊ានប៉ារ៉ាហ្គេមលើកទី ១២ ដែលកម្ពុជាធ្វើជាម្ចាស់ផ្ទះ ក៏ដូចជាបន្តផ្សព្វផ្សាយទស្សនីយភាពកីឡាដ៏អស្ចារ្យនេះនៅទូទាំងពិភពលោក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមទិន្នន័យដែលផ្ដល់ដោយ TikTok បានបង្ហាញថា អំឡុងពេលដំណើរការកីឡាស៊ីហ្គេមលើកទី ៣២ និងអាស៊ានប៉ារ៉ាហ្គេមលើកទី ១២ សញ្ញាទ្រុងជ្រូកផ្លូវការ #SEAGames2023 បានទទួលអ្នកចូលទស្សនាជាង ២៧ លានដង។ សរុបការផ្សាយដោយប្រើសញ្ញាទ្រុងជ្រូក #SEAGames2023 មានចំនួនលើស ២ លានដង។ លើសពីនេះ នៅក្នុងព្រឹត្តិការណ៍ជាប្រវត្តិសាស្ត្ររបស់កម្ពុជានេះ មានការផ្សាយលើ TikTok ដោយប្រើសញ្ញាទ្រុងជ្រូក # Cambodia2023 ជាង ២៣០០០ ដង ដែលទទួលបានអ្នកចូលទស្សនាជាង ១,៣៥ លានដង។

ក្រុមហ៊ុន TikTok បានប្រកាសភាពជាដៃគូក្នុងនាមជាម្ចាស់ឧបត្ថម្ភធំមួយ នៃព្រឹត្តិការណ៍កីឡាស៊ីហ្គេមលើកទី ៣២ និងអាស៊ានប៉ារ៉ាហ្គេមលើកទី ១២ កាលពីខែមេសា។ ដើម្បីអបអរសាទរភាពជាដៃគូនេះ TikTok បានផ្ដល់អត្ថប្រយោជន៍ជាច្រើនសម្រាប់អ្នកប្រើប្រាស់ រួមទាំងការបន្ថែមរចនាម៉ូដប្លែកៗ តាមរយៈមុខងារផ្សេងៗ និងការផ្សារភ្ជាប់ទំនាក់ទំនងយ៉ាងពិសេសជាមួយអ្នកបង្កើតមាតិកានៅលើភ្លេតហ្វម។ TikTok បានគាំទ្រព្រឹត្តិការណ៍កីឡានេះ ដោយបង្កើនកិច្ចចូលរួមគាំទ្រពីសំណាក់អ្នកប្រើប្រាស់ និងជំរុញព្រឹត្តិការណ៍ប្រវត្តិសាស្ត្រនេះកាន់តែអធិកអធមអំឡុងពេលប្រកួតប្រជែង កីឡានីមួយៗ។

លោក Angga Anugrah Putra នាយកគ្រប់គ្រងទូទៅផ្នែកប្រតិបត្តិការ និងទីផ្សារ បានមានប្រសាសន៍ថា “យើងមានមោទនភាពដែលបានក្លាយជាដៃគូសំខាន់មួយ នៃព្រឹត្តិការណ៍កីឡាលើកដំបូងរបស់កម្ពុជា ជាមួយការរៀបចំប្រកបដោយជោគជ័យ។ យើងមានសេចក្ដីសោមនស្សរីករាយដែលយើងបានបន្ថែមមុខងារផ្សេងៗ ដើម្បីឲ្យក្រុមអ្នកគាំទ្ររីករាយជាមួយទស្សនីយភាពកីឡាដ៏អស្ចារ្យទាំងនេះ ក៏ដូចជាអ្វីដែលយើងអាចចូលរួមកៀរគរមនុស្សឲ្យមកជួបជុំគ្នា។ យើងក៏សូមកោតសរសើរដល់បងប្អូនទាំងអស់ដែលបានចូលរួមការប្រកួតកីឡាស៊ីហ្គេមលើកទី ៣២ និងអាស៊ានប៉ារ៉ាហ្គេមលើកទី ១២ រួមទាំង អត្តពលិក មន្ត្រីរាជការ និងអ្នករៀបចំព្រឹត្តិការណ៍ទាំងអស់។ ព្រឹត្តិការណ៍ទាំងនេះ គឺជាមោទនភាពសម្រាប់អ្នកពាក់ព័ន្ធទាំងអស់ ហើយយើងពិតជារីករាយដែលបានក្លាយជាផ្នែកមួយ នៃភាពជោគជ័យនេះ ដោយមតិយោបល់ ៩៥ ភាគរយ ផ្ដល់តម្លៃជាវិជ្ជមាន”។

នៅប្រទេសកម្ពុជា មានអ្នកទស្សនាវីដេអូកីឡាដែលមានភ្ជាប់សញ្ញាទ្រុងជ្រូក #SEAGames2023 ប្រមាណ ៣៨២ ដង។

ក្នុងនាមជាអ្នកឧបត្ថម្ភពិសេស នៃព្រឹត្តិការណ៍ស៊ីហ្គេមនេះ ក្រុមហ៊ុន TikTok អាចផ្ដល់ជូនអ្នកគាំទ្រនូវវីដេអូខ្លីៗ និងព័ត៌មានអំពីអត្តពលិកចុងក្រោយបំផុតតាមរយៈការធ្វើបច្ចុប្បន្នភាពទៅតាមពេលវេលាជាក់ស្ដែងលើភ្លេតហ្វម។ តាមរយៈមាតិកាវីដេអូដែលត្រូវបានចែករំលែក និងផ្សាយផ្ទាល់ពីទីភ្នាក់ងារផ្លូវការ ដៃគូប្រព័ន្ធផ្សព្វផ្សាយព័ត៌មាន រួមទាំងអត្តពលិក ក៏ដូចជាមុខងារបន្ថែមពិសេសក្នុងកម្មវិធី និងមាតិកាពិសេសផ្ដាច់មុខ អ្នកគាំទ្រនៅក្នុងប្រទេសកម្ពុជាអាចទទួលបានបទពិសោធន៍ទំនាក់ទំនងជិតស្និទ្ធពិសេសជាងគេ និងការប្រាស្រ័យទាក់ទងជាមួយអត្តពលិកជាតិ ព្រមទាំងឱកាសបង្ហាញពីការគាំទ្ររបស់ពួកគេពីផ្ទះផងដែរ។

គួរបញ្ជាក់ផងដែរថា ការប្រកួតកីឡាអាស៊ានប៉ារ៉ាហ្គេមលើកទី ១២ បានបញ្ចប់នៅថ្ងៃទី ៩ ខែមិថុនា ឆ្នាំ ២០២៣។ ព្រឹត្តិការណ៍ស៊ីហ្គេមលើកទី ៣២ បានបិទបញ្ចប់នៅថ្ងៃទី ១៧ ខែឧសភា៕

Related Topics:tiktok