កីឡា

Burn X Flash ចេញទៅប្រកួតជម្រុះជើងឯកពិភពលោកនៅអារ៉ាប៊ីសាអូឌីតយប់នេះ

បានផុស

២ years មុន

នៅ

ថ្ងៃសុក្រ ៧ កក្កដា ២០២៣

ដោយ

សហព័ន្ធកីឡាអេឡិចត្រូនិកកម្ពុជា (EFC) បញ្ជូនក្រុមកីឡាអេឡិចត្រូនិកជម្រើសជាតិកម្ពុជា Burn X Flash ទៅចូលរួមប្រកួតព្រឹត្តិការណ៍ Gamers8 Asia Championship ប្រចាំតំបន់អាស៊ីចាប់ពីថ្ងៃទី៨ ដល់ទី១៤ ខែកក្កដា ឆ្នាំ២០២៣ នៅទីក្រុង Riyadh ប្រទេសអារ៉ាប៊ីសាអូឌីត។

ការប្រកួតដែលមានវិញ្ញាសាជាច្រើនប្រចាំតំបន់អាស៊ីជាផ្នែកមួយនៃវគ្គជម្រុះដើម្បីជ្រើសរើសយក៥ក្រុមឡើងទៅប្រកួតជើងឯកពិភពលោក WE Championship លើកទី១៥ ដែលគ្រោងធ្វើនៅប្រទេសរ៉ូមានីនាពេលខាងមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមតំណាងកម្ពុជា Burn X Flash នឹងប្រកួតលើវិញ្ញាសា Mobile Legends: Bang Bang ដែលមានក្រុមមកពី៨ប្រទេសចូលរួមប្រកួតប្រជែងគឺម្ចាស់ផ្ទះ អារ៉ាប៊ីសាអូឌីត អារ៉ាប់រួម កម្ពុជា ម៉ុងហ្គោលី នេប៉ាល់ កាហ្សាក់ស្ថាន ហ្វីលីពីន និងបង់ក្លាដែស។

ការប្រកួតនឹងត្រូវបានបែងចែកជាពីរពូលគឺពូល A មាន កម្ពុជា អារ៉ាប់រួម ម៉ុងហ្គោលី និងនេប៉ាល់ ខណៈពូល B មាន កាហ្សាក់ស្ថាន អារ៉ាប៊ីសាអូឌីត ហ្វីលីពីន និង បង់ក្លាដែស។ បន្ទាប់ពីចប់វគ្គវិលជុំសន្សំពិន្ទុក្នុងពូល ត្រូវបន្តប្រកួតលក្ខណៈ Upper Bracket និង Lower Bracket ដើម្បីរកក្រុមពីរឡើងទៅវគ្គផ្តាច់ព្រ័ត្រសម្រាប់ជយលាភីជើងឯក។

សម្រាប់ជើងឯកទទួលបានប្រាក់រង្វាន់៧០០០ដុល្លារ ចំណាត់ថ្នាក់លេខ២ទទួលបាន៣៥០០ដុល្លារ និងលេខ៣ទទួលបាន២០០០ដុល្លារ។

ទោះបីជាយ៉ាងណា ក្រុមចំណាត់ថ្នាក់លេខ១ និងលេខ២ នៃពូលទាំងពីរទទួលកៅអីដោយស្វ័យប្រវត្តិទៅចូលរួមប្រកួតជើងឯកពិភពលោក និង១ក្រុមទៀតជាក្រុមចំណាត់ថ្នាក់លេខ៣ល្អបំផុតដើម្បីបង្ក្រប់៥ក្រុមឡើងទៅជើងឯកពិភពលោក។

ដោយសារក្រុមចូលរួមសរុបមាន៨សម្រាប់វិញ្ញាសា MLBB នេះ ដូច្នេះក្រុមតំណាងកម្ពុជា Burn X Flash ក៏សង្ឃឹមខ្ពស់ក្នុងការទទួលបានកៅអី១ឡើងទៅប្រកួតជើងឯកពិភពលោកនៅប្រទេសរ៉ូម៉ានី៕

អត្ថបទ៖ វីរបុត្រ

Related Topics:កីឡាអេឡិចត្រូនិក